ប្រជាពលរដ្ឋរស់នៅក្នុងស្រុកអង្គរធំ ខេត្ដសៀមរាប បានឲ្យដឹងថា សម្រាប់មកទល់នឹងពេលនេះ ពួកគាត់បានត្រៀមខ្លួនជាស្រេចហើយ ដើម្បីចូលរួមក្នុងការបោះឆ្នោតជាតិ អាណត្ដិទី៧ នៃរដ្ឋសភា ដើម្បីជ្រើសរើសថ្នាក់នាំប្រទេសជាតិដែលខ្លួនស្រលាញ់ នាថ្ងៃទី២៣ ខែកក្កដា ឆ្នាំ២០២៣ពេលខាងមុខ។
លោក ស្វាយ ពុំសែន រស់នៅក្នុងឃុំពាក់ស្នែង ស្រុកអង្គរធំ បាននិយាយថា ការបោះឆ្នោតជ្រើសរើសតំណាងរាស្ដ្រ លោកធ្លាប់បានបោះឆ្នោតជាច្រើនសារមកហើយ នឹងមិនអាចអាក់ខានឡើងព្រោះ មានសារៈសំខាន់បំផុតសម្រាប់ប្រជាពលរដ្ឋខ្មែរ ខណៈដែលការបោះឆ្នោតនេះ មានរយៈពេល ៥ឆ្នាំទើបកើតមានព្រឹត្ដិការណ៍នេះម្ដង។ លោកបន្ដថា ការបោះឆ្នោតព្រឹទ្ធសភានេះ ពីមួយអាណត្តិទៅមួយអាណត្តិ កម្ពុជាមានអភិវឌ្ឍន៍រីកចម្រើនស្ទើរគ្រប់វិស័យ ហើយសមិទ្ធិផលនៅបច្ចុប្បន្ននេះ ធ្វើឲ្យប្រជាពលរដ្ឋពេញចិត្ត និងនៅតែគាំទ្រគណបក្ស ដែលធ្វើប្រទេសកម្ពុជាមានសន្ដិភាព។ លោកក៏បានអំពាវដល់ប្រជាពលរដ្ឋនៅក្នុងស្រុកក៍ដូចជាពលករធ្វើការនៅក្រៅប្រទេស សូមចូលរួមបោះឆ្នោតជ្រើសតាំងតំណាងរាស្ដ្រអាណត្ដិទី៧ ឲ្យបានគ្រប់ៗគ្នា។
ប្រជាពលរដ្ឋរស់នៅក្នុងខេត្តសៀមរាប ពីររូបទៀត ក៏បានសម្ដែងការគាំទ្រចំពោះការចូលរួមបោះឆ្នោតនេះ ដោយពួកគាត់លើកឡើងថា ក្នុងនាមជាពលរដ្ឋមួយរូប ពួកគាត់ត្រូវតែទៅបោះឆ្នោត ព្រោះការបោះឆ្នោតជាកាតព្វកិច្ច និងថាការជ្រើសរើសថ្នាក់ដឹកនាំតំណាងរបស់ខ្លួនមានសារៈសំខាន់ណាស់ ប្រជាពលរដ្ឋត្រូវពិចារណាឲ្យច្បាស់ ហើយបន្ដបោះឆ្នោតជ្រើសថ្នាក់ដឹកនាំបក្សណាដែលបំរើប្រជាពលរដ្ឋ និងធ្វើឱ្យប្រទេសបន្តរីកមច្រើនទៅមុខទៀត ព្រោះនឹងមានសុខសន្ដិភាព។
អត្ថបទ និងរូបភាព៖ លោក បូ សាវី
កែសម្រួល៖ អ៊ុន ណារាជ្យ
