ក្នុងឱកាសបំពេញបេសកកម្ម ក្នុងខេត្តសៀមរាប នៅថ្ងៃទី២៥ ខែមិថុនា ឆ្នាំ២០២៣ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បាន ដឹកនាំគណ:ប្រតិភូក្រសួង អញ្ជើញទៅសួរសុខទុក្ខលោកប្រាក់ សុផាន់ណា ដែលជាជនមានពិការភាព ប៉ុន្តែពោរពេញដោយសមត្ថភាព និងទេពកោសល្យផ្នែកសិល្ប:តែងនិពន្ធ និងចម្រៀង។ លោកត្រូវបានអញ្ជើញឱ្យចូលរួមសម្តែង នៅក្នុងពិធីបើកកម្មវិធីការប្រកួតកីឡាអាស៊ានប៉ារ៉ាហ្គេមលើកទី១២ ឆ្នាំ២០២៣ ដោយបាននាំបទចម្រៀង “មានដង្ហើម មានជីវិត” ទៅចូលរួមសម្តែងផងដែរ។
ក្នុងជំនួបសំណេះសំណាលនេះ ឯកឧត្តមទេសរដ្ឋមន្ត្រី បានកោតសរសើរ លោក ប្រាក់ សុផាន់ណា មានកម្លាំងចិត្ត ដែល មិនរាថយក្នុងការតស៊ូ ជាមួយនឹងការរើសអើងនានាតាំងពីដើមរហូតមក។ នេះគឺជាកម្លាំងចិត្តជំរុញដល់អ្នកដែលជួបប្រទះនឹងបញ្ហាដូចរូបលោក ឱ្យមានស្មរតី និងកម្លាំងចិត្តក្នុងការបន្តដំណើរជីវិតទៅមុខ។ ជាមួយគ្នានេះដែរ ឯកឧត្តមទេសរដ្ឋមន្ត្រី ក្នុងនាមក្រសួងសាធារណការ និងដឹកជញ្ជូន បានឧបត្ថមថវិកាចំនួន ២,៥០០ដុល្លារអាមេរិក ដោយឡែកក្រុមហ៊ុនជីបម៉ុង តាមរយ:ឯកឧត្តមទេសរដ្ឋមន្ត្រី ក៏បានឧបត្ថមថវិកាចំនួន ២,៥០០ដុល្លារអាមេរិកផងដែរ។ លើសពីនេះថ្នាក់ដឹកនាំក្រសួង ដែលបានចូលរួមនាឱកាសនោះ បានរួមគ្នាឧបត្ថម្ភថវិកាផ្ទាល់មួយចំនួនជូន លោក ប្រាក់ សុផាន់ណា ក្នុងការទ្រទ្រង់ជីវភាពគ្រួសារ។
ដើម្បីសម្រេចនូវគោលបំណងរបស់លោក ប្រាក់ សុផាន់ណា ក្នុងការមានផ្ទះ និងដីផ្ទាល់ខ្លួន បានរស់នៅ ដោយមិនចាំបាច់ជួលគេ ឯកឧត្តមទេសរដ្ឋមន្ត្រី បានឧបត្ថម្ភផ្ទះ និងដីមួយកន្លែង ជូនតាមសំណូមពរផងដែរ។ ទន្ទឹមនឹងនេះ ដើម្បីឱ្យជីវភាពគ្រួសាររបស់លោក សុផាន់ណា កាន់តែប្រសើរ ឯកឧត្តមទេសរដ្ឋមន្ត្រី គ្រោងពិភាក្សាជាមួយនឹងផលិតកម្មបារមី ក៏ដូចជាក្រុមហ៊ុនជីបម៉ុង ក្នុងការនាំយកសមត្ថភាព និងទេពកោសល្យផ្នែកសិល្ប:តែងនិពន្ធ និងចម្រៀង របស់លោកទៅរៀបចំផលិត និងបង្ហាញជូនសាធារណជន នៅផ្សារទំនើបជីបម៉ុងមេហ្គាម៉លនាពេលខាងមុខផងដែរ៕
អត្ថបទ និងរូបភាព: លោកយូ វង្ស កែសម្រួលដោយ លីវ សុខុន!!!
