លោកស្រី ជា ភឿយ សមាជិកក្រុមប្រឹក្សាសង្កាត់ទឹកវិល ក្រុងសៀមរាប បានឲ្យដឹងថា ពលរដ្ឋក្នុងភូមិចំនួន៥ រួមមានភូមិសណ្តាន់ , ភូមិទឹកវិល , ភូមិព្រៃថ្មី , ភូមិទឹកថ្លា និងភូមិជ័យ បានជួបប្រទះគ្រោះខ្វះខាតទឹកប្រើប្រាស់តាំងពីអំឡុងខែកុម្ភៈមកម្ល៉េះ ក្នុងនោះភូមិសណ្តាន់ , ភូមិទឹកវិល និងភូមិព្រៃថ្មី ពលរដ្ឋដែលខ្វះទឹកប្រើមានច្រើនជាងគេ គឺប្រមាណ ពី៦០ទៅ៧០ភាគរយ ។
លោកស្រី ជា ភឿយ បានឲ្យដឹងទៀតថា បន្ទាប់ពីតាមដានសភាពការណ៍នៃគ្រោះខ្វះទឹកនេះ អាជ្ញាធរក្រុងសៀមរាប បានសហការជាមួយរដ្ឋាករទឹកស្វយ័តខេត្តសៀមរាប បានតក្បាលរ៉ូប៊ីណេទឹកចំនួន២កន្លែង ក្នុងសង្កាត់ទឹកវិល ដើម្បីជូនប្រជាពលរដ្ឋដែលជួបប្រទះគ្រោះខ្វះទឹក បានប្រើប្រាស់ដោយឥតគិតថ្លៃ ខណៈទីតាំងទាំងពីរកន្លែងនោះមាន ទីតាំងទី១ ស្ថិតនៅភូមិព្រៃថ្មី ជិតអន្លង់ទឹកវិល និងទីតាំងទី២ ស្ថិតនៅផ្ទះរបស់លោកស្រីផ្ទាល់ ក្នុងភូមិទឹកវិល ហើយក្រៅពីផ្តល់ជូនទឹកដោយឥតគិតថ្លៃនេះ ខាងរដ្ឋាករទឹកស្វយ័តខេត្តសៀមរាប ក៏បានតបណ្តាញទឹកស្អាតចូលទៅតាមភូមិទាំងនោះផងដែរ។
គួររំលឹកថា នៅឆ្នាំ២០១៦ ប្រជាពលរដ្ឋនៅសង្កាត់ទឹកវិលនេះ ធ្លាប់ជួបបញ្ហាដូចគ្នានេះរួចម្ដងហើយ ដោយនៅឆ្នាំនោះអាកាសធាតុប្រហាក់ប្រហែលដូចឆ្នាំនេះដែរ រីឯទឹកក្នុងបារាយណ៍ខាងលិច ដែលជាអាងស្ដុកទឹកដ៏ធំមួយរបស់ក្រុងអង្គរ បានគោករីងស្ងួតអស់គ្មានសល់ ប៉ុន្តែសម្រាប់នៅឆ្នាំនេះ បរិមាណទឹកនៅតិចតួចបំផុត ។
ព័ត៌មានជាតិ ថ្មីៗ
បើតាមការព្យាករណ៍របស់ក្រសួងធនធានទឹកនិងឧតុនិយម ដែលបានចេញផ្សាយកាលពីថ្ងៃទី២២ ខែមេសា ឆ្នាំ២០១៩ម្សិលមិញនេះ បានឲ្យដឹងថា នៅសប្ដាហ៍នេះ ចាប់ពីថ្ងៃទី២២ ដល់ថ្ងៃទី២៨ ខែមេសា ឆ្នាំ២០១៩ នៅកម្ពុជាសីតុណ្ហភាពបានបន្តឡើងចាប់ពី ៤០ ទៅ ៤១ អង្សារសេ ខណៈភ្លៀងចុះខ្សោយ រីឯបាតុភូតរន្ទះ និង ខ្យល់កន្ត្រាក់កើតឡើងញឹកញាប់ និង មានឥទ្ធិពលខ្លាំង ៕
អត្ថបទ និង រូបថត ៖ លោក ជា ស្រស់ , លោក ខេង ឧត្ដម
កែសម្រួលអត្ថបទ ៖ លោក លីវ សាន្ត
