ថ្លែងនៅក្នុងសិក្ខាសាលាស្តីពីការគ្រប់គ្រងចំណីសត្វនៅខេត្តសៀមរាប នាព្រឹកថ្ងៃទី២៣ ខែមេសា ឆ្នាំ២០១៩នេះ លោក សុខ ស៊ាងលីម ប្រធាននាយកដ្ឋានផលិតកម្មសត្វ នៃក្រសួងកសិកម្មរុក្ខាប្រមាញ់ និងនេសាទ បានមានប្រសាសន៍ថា នៅក្នុងឆ្នាំ២០១៨កន្លងមកនេះ អត្រាចិញ្ចឹមសត្វ ដើម្បីពាណិជ្ជកម្មមានកើនឡើងលើសផែនការ បើធៀបទៅនឹងឆ្នាំ២០១៧ ខណៈឯការចិញ្ចឹមសត្វ ដើម្បីយកម្លាំងសម្រាប់អូសទាញមានការថយចុះ ដូច្នេះនៅពេលដែលការចិញ្ចឹមសត្វដើម្បីយកសាច់សម្រាប់បរិភោគមានការកើនឡើងនោះ ការគ្រប់គ្រង និងត្រួតពិនិត្យចំណីសត្វ គឺជាកត្តាមួយដ៏សំខាន់សម្រាប់មន្ត្រីជំនាញ ព្រោះថា បើអ្នកផលិតចំណីសត្វធ្វើមិនបានត្រឹមត្រូវ បណ្តាលឱ្យចំណីដែលសត្វស៊ីនោះ មានមេរោគនៅក្នុងសាច់ ហើយយកទៅលក់នៅលើទីផ្សារ វានឹងធ្វើឱ្យប៉ះពាល់ដល់សុខភាពអ្នកបរិភោគ ដូច្នេះនូវរាល់ការធ្វើអាជីវកម្មផលិតចំណីសត្វ ឬការចែកចាយចំណីសត្វទាំងអស់ ត្រូវមានការគ្រប់គ្រងនិងត្រួតពិនិត្យពីមន្ត្រីជំនាញយ៉ាងយកចិត្តទុកដាក់បំផុត ។
លោក សុខ ស៊ាងលីម បានបញ្ជាក់ទៀតថា ថ្ងៃនេះ នាយកដ្ឋានផលិតកម្មសត្វ នៃក្រសួងកសិកម្ម បានអញ្ជើញអ្នកផលិត និងអ្នកចែកចាយចំណីសត្វទាំងអស់នៅខេត្តសៀមរាប ឱ្យមកទទួលនូវចំណេះដឹងបន្ថែមទៀត ទាំងរបៀបផលិត និងច្បាប់ស្តីពីការគ្រប់គ្រងចំណីសត្វនេះ ដើម្បីឱ្យពួកគាត់បានដឹងកាន់តែច្បាស់ថា បើសិនអ្នកណាផលិតចំណីសត្វមិនបានត្រឹមត្រូវបណ្តាលឱ្យសាច់សត្វដែលស៊ីចំណីនោះមានមេរោគ និងបង្កបញ្ហាដល់អ្នកបរិភោគ ពួកគាត់នឹងត្រូវមានទោស ។
លោក ប៉ែន ប៊ុនធឿន អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានឱ្យដឹងថា ជាការពិតណាស់នៅក្នុងខេត្តសៀមរាបនេះ ក៏អត្រានៃការចិញ្ចឹមសត្វដើម្បីពាណិជ្ជកម្មមានការកើនឡើងដែរ ដែលកត្តាទាំងនេះបានធ្វើការផ្គត់ផ្គង់សាច់សត្វនៅលើកទីផ្សារក្នុងខេត្ត ភាគច្រើនជាសាច់សត្វនៅក្នុងស្រុក ហើយសាច់សត្វដែលនាំចូលគឺមានចំនួនតិច ខណៈបច្ចុប្បន្ននេះ ខេត្តសៀមរាបបានទទួលសាច់ជ្រូកប្រមាណជាង១៣តោន សម្រាប់ផ្គត់ផ្គង់នៅលើទីផ្សារ ក្នុងមួយថ្ងៃ ហើយសត្វជ្រូកភាគច្រើន គឺជាជ្រូកក្នុងស្រុក និងសាច់សត្វចិញ្ចឹមនៅក្នុងខេត្តច្រើនតោនទៀត ត្រូវបានយកមកផ្គត់ផ្គង់ ដែលសាច់ទាំងនោះ គឺជាសាច់ដែលមានគុណភាព និងសុវត្ថិភាព ៕
អត្ថបទ និង រូបថត ៖ លោក ឃុត សៅ
កែសម្រួលអត្ថបទ ៖ លោក លីវ សាន្ត
