ក្នុងឱកាសជួបសម្ដែងការគួរសម និង ពិភាក្សាការងារមួយចំនួន ជាមួយឯកឧត្ដម ទៀ សីហា អភិបាលខេត្តសៀមរាប នៅសាលាខេត្តសៀមរាប នារសៀលថ្ងៃទី២៣ ខែមេសា ឆ្នាំ២០១៩ ម្សិលមិញនេះ ឯកឧត្តម Amphay KINDAVONG អគ្គរដ្ឋ ទូត វិសាមញ្ញនិងពេញសមត្ថភាព នៃសាធារណរដ្ឋប្រជាធិបតេយ្យប្រជាមានិតឡាវប្រចាំកម្ពុជា បានមានប្រសាសន៍ថា គោល បំណងសំខាន់របស់ប្រតិភូ មកកាន់ខេត្តសៀមរាបនាពេលនេះ គឺដើម្បីធ្វើការសិក្សាស្វែងយល់ អំពីស្ថានភាពនៃវិស័យទេសចរណ៍របស់ខេត្តសៀមរាប ដោយសារខេត្តនេះ មានសម្បត្តិវប្បធម៌ប្រវត្តិសាស្ត្រដ៏ល្បីល្បាញ គឺប្រាសាទអង្គរវត្ត ដែលជាសម្បត្តិបេតិកភណ្ឌពិភពលោក ជាសក្តានុពលមួយដ៏ខ្លាំងក្លាក្នុងការទាក់ទាញភ្ញៀវទេសចរណ៍ ខណៈពេលដែលវិស័យអាកាសចរណ៍ ក៏មានក្រុមហ៊ុនអាកាសចរណ៍ឡាវ មួយបានកំពុងធ្វើអាជីវកម្ម នៅក្នុងខេត្តសៀមរាបផងដែរ ។
ឯកឧត្តម Amphay KINDAVONG បានបញ្ជាក់ទៀតថា កិច្ចទំនាក់ទំនងជាប្រវត្តិសាស្ត្ររវាងកម្ពុជានិងឡាវ មានតាំងពីយូរលង់ណាស់មកហើយ ខណៈដែលប្រទេសទាំងពីរ មានភូមិ ផងរបងជាមួយគ្នា និង មានវប្បធម៌ ប្រពៃណី សាសនាដូចគ្នា ដែលប្រជាជនទាំងពីរបានធ្វើការប្រតិបត្តិគ្នាទៅវិញទៅមកទៀតផង ដូច្នេះក្នុងដំណើរបំពេញបេសកកម្មរបស់ប្រតិភូនាពេលនេះ ក្រៅពីធ្វើការសិក្សាស្វែងយល់ អំពីស្ថានភាពនៃវិស័យទេសចរណ៍របស់ខេត្តសៀមរាប ឯកឧត្តម និង ក្រុមការងារ នឹងធ្វើការទំនាក់ទំនងជាមួយបណ្តាខេត្តជាប់នៅព្រំដែនឡាវ ក្នុងការធ្វើពាណិជ្ជកម្មជាមួយគ្នាទៀតផង ។
មានប្រសាសន៍ឆ្លើយតប ឯកឧត្តម ទៀ សីហា បានលើកឡើងពីសក្តានុពលរបស់ខេត្តសៀមរាប ដោយពឹងផ្អែកទៅលើវិស័យទេសចរណ៍ និង កសិកម្ម ព្រមទាំងស្ថានភាពនៃភ្ញៀវទេសចរណ៍ ដែលបានចូលមកទស្សនាកម្សាន្តនៅខេត្តសៀមរាប ខណៈពេលដែលមានបងប្អូនប្រជាជនឡាវ បានមកស្នាក់នៅខេត្តសៀមរាបស្របច្បាប់ចំនួន ៤នាក់ ព្រមទាំងមានក្រុមហ៊ុនរបស់ជនជាតិឡាវ១ក្រុមហ៊ុន បានចុះបញ្ជីពាណិជ្ជកម្ម ប្រកបអាជីវកម្មនៅក្នុងខេត្តសៀមរាប ។
ឯកឧត្តម ទៀ សីហា មានប្រសាសន៍ទៀត ខេត្តសៀមរាបក៏មានទំនាក់ទំនង សហប្រតិបត្តិការជាមួយខេត្តចំប៉ាសាក់ នៃប្រទេសឡាវ តាមរយៈខ្លឹមសារអនុស្សរណៈនៃការយោគយល់គ្នា រវាងខេត្តចំប៉ាសាក់ និង ខេត្តសៀមរាប នាឆ្នាំ២០១១ ដោយ ផ្តោតលើវិស័យ ទេសចរណ៍ វប្បធម៌ កសិកម្ម វិនិយោគ ពាណិជ្ជកម្ម សេដ្ឋកិច្ច វប្បធម៌ និង វិស័យផ្សេងៗទៀត ប៉ុន្តែក្នុងរយៈពេលកន្លងមកនេះ ភាគីទាំងពីរមិនទាន់បានធ្វើអ្វីមួយរួមគ្នា ដើម្បីជាគុណប្រយោជន៍គ្នាទៅវិញទៅមកឡើយ គឺបានត្រឹមផ្លាស់ប្តូរនូវដំណើរទស្សនកិច្ចរបស់គណៈប្រតិភូខេត្តទាំងពីរតែប៉ុណ្ណោះ ដូច្នេះក្នុងឱកាសនេះ សូមសំណូមពរបន្តធ្វើកិច្ចសហប្រតិបត្តិការជាមួយគ្នា ទៅលើវិស័យកសិកម្ម និង ពាណិជ្ជកម្ម រួមទាំងវិស័យទេសចរណ៍ ដោយប្រទេសយើងទាំងពីរ មានស្ថានភាពភូមិសាស្ត្រដីដូចគ្នា រួមទាំងសម្បត្តិវប្បធម៌ ប្រាង្គប្រាសាទ ប្រពៃណី និង សាសនាផងដែរ ៕
អត្ថបទ និង រូបថត ៖ លោក ម៉ី សុខារិទ្ធ និង លោក គឿន វេត
កែសម្រួលអត្ថបទ ៖ លោក លីវ សាន្ត
