នាព្រឹកថ្ងៃទី២៤ ខែមេសា ឆ្នាំ២០១៩ នេះ អាជ្ញាធរខេត្តសៀមរាប ដែលមានលោកស្រី យូ សុភា អភិបាលរងខេត្ត តំណាងឯកឧត្តម ទៀ សីហា អភិបាលនៃគណៈអភិបាលខេត្តសៀមរាប បានទទួលធ្វើជាម្ចាស់ផ្ទះ នៃសន្និសីទអន្តរជាតិ ស្តីពីកិច្ចសហប្រតិបត្តិការទ្វេភាគី លើការងារទេសន្តរប្រវេសន៍ការងារ និងអំពើជួញដូរមនុស្ស លើកទី២ រវាងព្រះរាជាណាកម្ពុជា និងព្រះរាជាណាចក្រថៃ ដែលរៀបចំឡើងដោយអង្គក្រុមអ្នកស្ម័គ្រចិត្តស៊ីវិល (GVC) និងដៃគូពាក់ព័ន្ធផងដែរនៅសណ្ឋាគារអង្គរមឺរ៉ាខល ក្នុងក្រុងសៀមរាប ។
សូមបញ្ជាក់ថា សន្និសីទអន្តរជាតិលើកទី១ បានរៀបចំឡើងកាលពីខែឧសភា ឆ្នាំ២០១៨ នៅទីក្រុងបាងកក នៃព្រះរាជាណាចក្រថៃ ហើយលើកទី២នេះ ត្រូវបានជ្រើសរើសរៀបចំក្នុងខេត្តសៀមរាប នៃព្រះរាជាណាចក្រកម្ពុជា ហើយកិច្ចពិភាក្សាទ្វេភាគីនេះ រៀបចំឡើងក្នុងគោលបំណងបង្កើតជាកិច្ចសន្ទនា ដើម្បីពង្រឹងកិច្ចសហប្រតិបត្តិការរវាងស្ថាប័នពាក់ព័ន្ធនៃប្រទេសកម្ពុជានិងប្រទេសថៃ និងផ្លាស់ប្តូរបទពិសោធន៍ ពាក់ព័ន្ធនឹងការអនុវត្តគោលនយោបាយផ្សេងៗ ទាក់ទងនឹងការលើកម្ពស់ការធ្វើចំណាកស្រុកដោយស្របច្បាប់ ពីបណ្តាភ្នាក់ងារផ្សេងៗ ដូចជាតំណាងរាជរដ្ឋាភិបាលកម្ពុជា និងថៃ ប្រតិភូសហភាពអឺរ៉ុប ទីភ្នាក់ងារអង្គការសហប្រជាតិ អង្គការសង្គមស៊ីវិល និងវិស័យឯកជនពាក់ព័ន្ធ ៕
អត្ថបទ និង រូបថត ៖ លេខាធិការដ្ឋានប្រយុទ្ធប្រឆាំងអំពើជួញដូរមនុស្សខេត្តសៀមរាប
កែសម្រួលអត្ថបទ ៖ លោក លីវ សាន្ត
ព័ត៌មានជាតិ ថ្មីៗ
