តបតាមសំណូមពររបស់ប្រជាពលរដ្ឋក្នុងឃុំជីក្រែងដែលកំពុងតែជួបប្រទះនូវការខ្វះខាតទឹកប្រើប្រាស់ជាបណ្ដើរៗនោះ នៅព្រឹកនឹងថ្ងៃទី២៤ ខែមេសា ឆ្នាំ២០១៩នេះ លោក ពៅ ប៊ុនធឿន អភិបាលស្រុកជីក្រែងដោយមានការចូលរួមពីលោកស្រី ឮ ចិន្តា មេឃុំជីក្រែង , សមាជិកក្រុមប្រឹក្សាឃុំ , កងកម្លាំងប្រដាប់អាវុធទាំង៣ , មេភូមិ និង សមាជិកភូមិ បានដឹកជញ្ជូនទឹកសម្រាប់ប្រើប្រាស់ ជូនលោកគ្រូ អ្នកគ្រូ សិស្សានុសិស្ស និង ប្រជាពលរដ្ឋនៅភូមិព្រីង មានទីតាំងនៅសាលាបឋមសិក្សាវត្តជីក្រែង និង ភូមិកំពង់ មានទីតាំងនៅសាលាបឋមសិក្សាពោធិរស្មីសង្គម ក្នុងនោះបានចែកទឹកដោយប្រើប្រាស់រថយន្តពន្លត់អគ្គីភ័យ របស់អធិការដ្ឋាននគរបាលស្រុកដើម្បីដឹកជញ្ជូនទឹក សរុបចំនួន៤ឡាន ដែលក្នុងមួយឡានមានចំណុះទឹក ៦ពាន់លីត្រ សម្រាប់គ្រួសារទាំង២ភូមិ ដែលបានទទួលទឹកសរុបចំនួន៨៥ គ្រួសារ ក្នុង១គ្រួសារ បានចំនួន៤ធុងស៊ីប្រូធំ និងសាលារៀនទាំង២សាលា សិស្សានុសិស្ស និងលោកគ្រូ អ្នកគ្រូដែលបានទទួលទឹកប្រើប្រាស់ចំនួន ៤៥០នាក់ ។
គួររំលឹកថា មានប្រសាសន៍ក្នុងឱកាសប្រារព្ធពិធីកាត់ឬសសីមាវត្ត ជោរេនចេស្តា ហៅវត្តកណ្តាលស្ថិតនៅក្នុងភូមិបេង ឃុំជីក្រែង ស្រុកជីក្រែង កាលពីព្រឹកថ្ងៃទី២២ ខែមេសា ឆ្នាំ២០១៩ កន្លងទៅថ្មីៗនេះ លោក ពៅ ពិសិដ្ឋ អភិបាលរងខេត្តសៀមរាបបានអំពាវនាវឲ្យមន្ត្រីស្រុកជីក្រែង យកចិត្តទុកដាក់ ស្វែងរកប្រភពទឹកស្អាត ដើម្បីជួយដល់ប្រជាពលរដ្ឋ សម្រាប់បម្រើតាមតម្រូវការ រួមទាំងការតាមដានសភាពការណ៍ខ្វះខាតទឹករបស់ប្រជាពលរដ្ឋ ខណៈអាកាសធាតុ កើនមានឡើងកំដៅខ្លាំងនៅពេលបច្ចុប្បន្ន ៕
អត្ថបទ និង រូបថត ៖ រដ្ឋបាលស្រុកជីក្រែង
កែសម្រួលអត្ថបទ ៖ លោក លីវ សាន្ត