នារសៀលថ្ងៃទី១៦ ខែកក្កដា ឆ្នាំ២០២៣នេះ គណៈចលនាសាសនិកឥស្លាមកម្ពុជា បានអញ្ជើញជួបសំណេះសំណាល និងបង្រៀនពីរបៀបគូសសន្លឹកឆ្នោត ជូនដល់សាសនិកឥស្លាមខេត្តសៀមរាប ដើម្បីឱ្យពួកគាត់យល់ដឹងកាន់ច្បាស់ពីគូសសន្លឹកឆ្នោតបានការឲ្យបានគ្រប់ៗគ្នា។
ឯកឧត្តម រ៉ូហ្វី អូស្មាន អនុប្រធានគណៈចលនាសាសនិកឥស្លាមកម្ពុជា មានប្រសាសន៍ថា សមិទ្ធផលសំខាន់ៗជាច្រើនដែលមាននៅទូទាំងប្រទេស គឺជាសមិទ្ធផលកើតមានដោយសារតែប្រទេសជាតិមានសុខសន្តិភាព និងស្ថេរភាពពេញលេញក្រោមការដឹកនាំដ៏ឈ្លាសវៃរបស់សម្តេចតេជោ ហ៊ុន សែន នាយករដ្ឋមន្ត្រី។ ជាមួយគ្នានោះគណបក្សប្រជាជន គឺជាគណបក្សដែលមាគ៌ាដឹកនាំដ៏ត្រឹមត្រូវ មានគោលនយោបាយមួយច្បាស់លាស់ ហើយកាន់តែសំខាន់នោះគឺការបង្រួបបង្រួមជាតិ សាមគ្គីផ្ទៃក្នុងជាតិ។ គណបក្សប្រជាជនកម្ពុជា គឺធ្វើអ្វីៗដើម្បីជាតិ និងប្រជាជនដូចនេះប្រជាពលរដ្ឋខ្មែរឥស្លាមយើងត្រូវចូលរួមគាំទ្រ និងបោះឆ្នោតជូនគណបក្សប្រជាជនកម្ពុជាបន្ដទៀត។
ឯកឧត្ដម បានបញ្ជាកថា ការបោះឆ្នោតជ្រើសតាំងតំណាងរាស្ត្រ ក៍ដូចជាការបោះឆ្នោតក្រុមប្រឹក្សាឃុំ/សង្កាត់ នៅគ្រប់ភូមិ ទទួលបានលទ្ធផលសំឡេងឆ្នោតគាំទ្រកើនឡើងខ្ពស់។ ជាក់ស្តែងដូចកាលបោះឆ្នោតជ្រើសតាំងតំណាងរាស្ត្រឆ្នាំ២០១៨ កន្លងទៅ បានបញ្ជាក់ឱ្យឃើញថា ការខិតខំរបស់គណៈចលនាសាសនិកឥស្លាមកម្ពុជាគ្រប់លំដាប់ថ្នាក់ ពិតជាបានឆ្លើយតបជាវិជ្ជមាន ហើយសាសនិកឥស្លាមពិតជាមិនភ្លេចគុណ ចំពោះគណបក្សប្រជាជននោះទេ។ ជាមួយគ្នានោះដែរ ឯកឧត្ដម ក៍បានអំពាវនាវឱ្យបងប្អូនសាសនិកឥស្លាមទាំងអស់ សូមទៅចូលរួមបោះឆ្នោតជ្រើសតាំងតំណាងរាស្ត្រនីតិកាលទី៧ នៅថ្ងៃទី២៣ ខែកក្កដា ឆ្នាំ២០២៣ ឲ្យបានគ្រប់ៗគ្នា ដើម្បីបំពេញតួនាទីជាពលរដ្ឋល្អ ដែលនាំនូវសុខសន្តិភាព និងការអភិវឌ្ឍពិតប្រាកដជូនប្រទេសជាតិ។
ព័ត៌មានជាតិ ថ្មីៗ
បើតាម ឯកឧត្តម អែល សៀត ប្រធានគណៈចលនាសាសនិកឥស្លាមខេត្តសៀមរាប បានឲ្យដឹងថា សាសនិកឥស្លាមមានភក្ដីភាពចំពោះគណបក្សប្រជាជនកម្ពុជា គឺដោយសារគណបក្សមួយនេះ បានរំដោះពួកយើងចេញពីរបបយង់ឃ្នង របបប្រល័យពូជសាសន៍ប៉ុលពត ហើយមានការបើកទូលាយអំពីជំនឿសាសនា ការផ្តល់សិទ្ធិសេរីភាព និងភាពស្មើភាពគ្នាក្នុងសង្គម និងការយកចិត្តទុកដាក់ផ្តល់គោលនយោបាយ លើកទឹកចិត្តសហគមន៍ឥស្លាមយ៉ាង ច្រើនសន្ធឹកសន្ធាប់ ដែលនេះពិតជាមោទនភាពរបស់បងប្អូនខ្មែរឥស្លាមនៅលើទឹកដីកម្ពុជា។ គណៈចលនាសាសនិកឥស្លាមបាននឹងកំពុងខិតខំពង្រឹងពង្រីកអូសទាញយកសំឡេងឆ្នោតគាំទ្របេក្ខជនតំណាងរាស្ត្ររបស់គណបក្សប្រជាជនកម្ពុជា ដោយចូលរួមសហការជាមួយ និងគណបក្សមូលដ្ឋានយ៉ាងសកម្មផងដែរ។
ជាមួយគ្នានោះដែរ ឯកឧត្តម ក៍បានក្រើនរំលឹកដល់សាសនិកឥស្លាម ឲ្យជ្រាបអំពីគុណូបការៈទៅចំពោះថ្នាក់ដឹកនាំដែលមានសម្តេចតេជោ និងឥស្សរជនកំពូលៗរបស់គណបក្សប្រជាជនកម្ពុជា ដែលពួកគាត់បានយកសាច់ស្រស់ ឈាមស្រស់មកជួយពួកយើង រំដោះពួកយើង ផ្តល់នូវសិទ្ធិសេរីភាព ឲ្យពួកគាត់ប្រតិបត្តិសាសនាដោយគ្មានការរឹតត្បិត និងបានផ្ដល់នូវកិត្តិយសមុខមាត់ដល់ពួកយើងតាមរយៈការផ្តល់គោលនយោបាយដល់គ្រូបង្រៀនសាសនារាប់ពាន់នាក់ ឲ្យបានចូលក្របខ័ណ្ឌ និងក្របខ័ណ្ឌមន្ត្រីរាជការរាប់រយនាក់ចាប់តាំងពីថ្នាក់តំណាងរាស្ត្រ មន្ត្រីជាន់ខ្ពស់ រហូតដល់ថ្នាក់មូលដ្ឋាន៕
អត្ថបទ និងរូពភាព៖ លោក បូ សាវី
កែសម្រួល៖ លោក អ៊ុន ណារាជ្យ
