នៅថ្ងៃទី១៨ ខែកក្កដា ឆ្នាំ២០២៣នេះ លោក នឹម វ៉ាន់សំ ប្រធានលេខាធិកាដ្ឋានរៀបចំការបោះឆ្នោតខេត្តសៀមរាប និងមន្ត្រី នៃគណៈកម្មការរៀបចំការបោះឆ្នោត ហៅកាត់ថា គ.ជ.ប ពិនិត្យយ៉ាងយកចិត្តទុកដាក់នូវ ឯកសារ និងសម្ភារៈសំខាន់ៗ ដែលបម្រើឱ្យការបោះឆ្នោតជ្រើសតាំងតំណាងរាស្ដ្រអាណត្ដិទី៧ បន្ទាប់ពីបានធ្វើការដឹកជញ្ជូនមកដល់ខេត្តសៀមរាប ជាមួយនឹងកងកម្លាំងការពារប្រកបដោយសុវត្តិភាព។
លោក នីម វ៉ាន់សំ បង្ហាញឱ្យដឹងថា ឯកសារ និងសម្ភារៈសំខាន់ៗ ដែលលេខាធិកាដ្ឋានរៀបចំការបោះឆ្នោតខេត្តទទួលបាននោះរួមមាន បញ្ជីបោះឆ្នោត សន្លឹកឆ្នោត ត្រាសម្ងាត់ និងទឹកខ្មៅលុបមិនជ្រះ ព្រមទាំងសម្ភារសំខាន់ៗមួយចំនួនទៀត ព្រមជាមួយការការពារយ៉ាងត្រឹមត្រូវ។ លោកបន្តថា នៅថ្ងៃស្អែក សម្ភារៈ និងឯកសារបម្រើឱ្យការបោះឆ្នោតនោះ នឹងដឹកជញ្ជូនទៅតាមបណ្ដាឃុំ សង្កាត់បន្ដទៀត ដែលមានកិច្ចសហការ និងសម្របសម្រួលដឹកជញ្ជូនពីសមត្ថកិច្ច អាជ្ញាធរដែនដី។
លោក ក៏បានបង្ហាញដែរថា នៅទូទាំងខេត្ដសៀមរាប អ្នកមានសិទ្ធបោះឆ្នោតមានចំនួន ៦១៨,៨៣៥នាក់ និងមានការិយាល័យបោះឆ្នោតចំនួន ១៥២១ការិយាល័យ។ អ្នកសង្កេតការជាតិ មកពីអង្គការ និងសមាគមជាង ៧,៦០០នាក់ ។
អត្ថបទ និងរូបភាព៖ លោក បូ សាវី
កែសម្រួល៖ សេង ផល្លី
