ក្រសួងអប់រំយុវជន និងកីឡា និងអង្គការអេដ អេ អាកស្យុង បានសហការជាមួយអង្គការ TDSO រៀបចំសិក្ខាសាលាឆ្លុះបញ្ចាំងកម្មវិធីបណ្ដុះបណ្ដាលវិធីសាស្ត្របង្រៀន និងរៀនបែបចម្រុះភាសាអង់គ្លេស ជូនដល់គ្រូបង្រៀនមកពីសាលាបឋមសិក្សាចំនួន៣១ ដែឡសិក្ខាសាលានេះ ធ្វើឡើងនៅសាលបឋមសិក្សាវត្ដបូព៌ ក្រុងសៀមរាប នាថ្ងៃទី០៨ ខែសីហា ឆ្នាំ២០២៣ ។
លោក កាន់ ពុទ្ធី អនុប្រធាននាយកដ្ឋានបឋមសិក្សាក្រសួងអប់រំ យុវជន និងកីឡា មានប្រសាសន៍ថា សិក្ខាសាលានេះ ផ្ដោតសំខាន់លើការផ្សព្វផ្សាយវឌ្ឍនភាពនៃការអនុវត្តគម្រោងដោយផ្តោតទៅលើការរៀបចំខ្លឹមសារ និងដំណើរការបណ្តុះបណ្តាលស្វែងយល់ពីក្របខណ្ឌធានាគុណភាពចំណុចខ្លាំង និងបញ្ហាប្រឈមនានានៃការអនុវត្តកម្មវិធីបណ្តុះបណ្តាលបង្រៀន និងរៀនបែបចម្រុះភាសាអង់គ្លេស សម្រាប់គ្រូបង្រៀននៅសាលាបឋមសិក្សា ដោយចាប់ផ្ដើមពីខែមេសា ឆ្នាំ២០២៣នេះ។ សម្រាប់កម្មវិធីបណ្តុះបណ្តាលចម្រុះភាសាអង់គ្លេសសម្រាប់គ្រូបឋមសិក្សា (EPST)មានរយៈពេលមួយឆ្នាំ ចែកចេញជា ២វគ្គ ដោយវគ្គទីមួយចំនួន១ឆ្នាំ សម្រាប់គ្រូបង្រៀនបឋមសិក្សាចំនួន ៤៨នាក់ និងគម្រោងទី២ ចំនួន១ឆ្នាំ ដែលមានសិក្ខាកាមចំនួន ៦៤នាក់ទៀត បង្រៀននៅថ្នាក់ទី៤ ទី៥ និងទី៦ មកពីសាលាចំនួន៣១ នៃក្រុងស្រុកចំនួន០៤ គឺស្រុកពួក ស្រុកប្រាសាទបាគង ស្រុកសូទ្រនិគម និង ក្រុងសៀមរាប។
លោក ងោ សុភ័ក្រ្ត នាយកអង្គការគាំទ្រការអភិវឌ្ឍសមត្ថភាពគ្រូបង្រៀន TDSO បានលើកឡើងថា វគ្គបណ្ដុះបណ្ដាលវិធីសាស្ដ្របង្រៀន និងរៀនបែបចំរុះភាសារអង់គ្លេសមានសារៈសំខាន់សម្រាប់លោកគ្រូ អ្នកគ្រូ ដែលធ្វើឱ្យធនធាននិងសមត្ថភាពរបស់ពួកគាត់កាត់តែវិវត្ដទៅរកគុណភាពល្អនូវវិស័យអប់រំ ដែលជាការឆ្លើយតបជាមួយគោលនយោបាយរដ្ឋាភិបាលក្នុងការចូលរួមប្រគួតប្រជែងនិងលើកកំពុងសេដ្ឋកិច្ចជាតិទាំងក្នុងស្រុក និងនៅក្នុងតំបន់អាស៊ាន ជាពិសេសលើកកម្ពស់យុទ្ធសាស្ដ្រគោលនយោបាយរបស់រដ្ឋាភិបាលកម្ពុជា ដែលនឹងសម្រេចអោយបាននូវប្រទេសដែលមានប្រាក់ចំណូលកំរិតមធ្យមនៅឆ្នាំ២០៣០និងប្រាក់ចំណូលខ្ពស់ឆ្នាំ២០៥០។
លោករំពឹងថា អ្នកពាក់ព័ន្ធទាំងអស់នឹងចូលរួមជាមួយគ្នាធ្វើឱ្យសម្រេចបាននូវធនធានមនុស្សដ៍ល្អប្រសើរនៅកម្រិតបឋមសិក្សា។លោកថា កម្មវិធីនេះ ក្រោមគម្រោងដៃគូរួមគ្នាផ្ដល់ឱកាសអប់រំដល់កុមារបាត់បង់ឱកាសនៅកម្ពុជា(CCOS) និងគម្រោងសហគមន៍នេសាទបង្កើតការងារជាសេដ្ឋកិច្ចវិលជុំនៅបឹងទន្លេសាបខាងលិច (FOSTER)។
បើតាមលោកស្រី ថុន ស៊ីណា អនុប្រធានមន្ទីរអប់រំ យុវជន និងកីឡា មានប្រសាសន៍ថា វិស័យអប់រំនៅខេត្តសៀមរាប ត្រូវបានពង្រឹងនិងពង្រីកជាបន្តបន្ទាប់ពីមួយឆ្នាំទៅមួយឆ្នាំស្ទើរគ្រប់ទីកន្លែង ខណៈដែលការផ្តល់សេវាអប់រំរបស់មន្ត្រី លោកគ្រូអ្នកគ្រូប្រកបដោយការទទួលខុសត្រូវខ្ពស់ ដែលបានធ្វើអោយប្រជាជនយល់កាន់តែច្បាស់អំពីតម្លៃនៃការអប់រំ។លោកស្រីបន្ដថា សាលាបឋមសិក្សាមានការរីកចម្រើនគួរអោយកត់សំគាល់ដែលមានសាលាបឋមសិក្សារដ្ឋមានចំនួន៥២៥សាលាស្មើនឹង ៨១កម្រង ស្មើនឹង៤៧៦៧ថ្នាក់ ខណៈដែលសិស្សានុសិស្សសរុបចំនួនជាង១៦ម៉ឺនាក់ទទួលបានការអប់រំ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
