ដើម្បីលើកកម្ពស់វិស័យបរិស្ថាន ទីតាំងអាជីវកម្មមួយកន្លែង បានប្រមែប្រមូលកាកអំពៅ កម្ទេចឈើអាចម៍រណា ត្រឡោកដូង គ្រាប់ត្នោតជាដើម មកកែច្នៃធ្វើជាអុសបរិស្ថាន សម្រាប់ជំនួសអុសប្រពៃណីដែលពលរដ្ឋតែងទៅកាប់ពីព្រៃធម្មជាតិ។
ប្រធានផ្នែកលក់ប្រចាំស្ថាប័នចង្រ្កានបរិស្ថានACE លោក សែម ចាន់វាសនា បាននិយាយនៅព្រឹកថ្ងៃទី០៨ សែសីហា ឆ្នាំ២០២៣នេះថា កាលពីឆ្នាំ២០១៩ ដោយមើលឃើញពីការបំពុលបរិស្ថានដែលកើតចេញពីការប្រើប្រាស់អុសធម្មជាតិ ប្រើធ្យូង ក្នុងការចម្អិនម្ហូបប្រចាំថ្ងៃរបស់ប្រជាពលរដ្ឋកម្ពុជានេះ កូនខ្មែរមួយក្រុមបានផ្តួចផ្តើមបង្កើតជាចង្ក្រានបរិស្ថានមួយប្រភេទ ដែលវាបានជួយកាត់បន្ថយការបំភាយផ្សែងពុលចេញពីផ្ទះបាយបានប្រមាណជា៩០ភាគរយ។ លោកថា “ប្រជាពលរដ្ឋកម្ពុជាភាគច្រើន គាត់បាននិយមប្រើប្រាស់ចង្ក្រាន ដែលដុតអុស ដុតធ្យូង និងខ្លះទៀតប្រើចង្ក្រានហ្គាស ដែលការប្រើប្រាស់វត្ថុធាតុដើមទាំងនេះ វាបានចំណាយថវិកាច្រើន និងប៉ះពាល់បរិស្ថានខ្លាំង ដូចជាអុស និងធ្យូង យើងត្រូវកាប់ឈើពីព្រៃធម្មជាតិ ចំណែកហ្គាសយើងត្រូវនាំចូលពីប្រទេសជិតខាង។ អីចឹងវាចំណាយលុយច្រើន ហើយអុស ធ្យូង វាបានបញ្ចេញផ្សែងពុលទៅក្នុងបរិយាកាសជាច្រើន និងប៉ះពាលសុខភាពផងដែរ”។
លោកវាសនា លើកឡើងថា ស្របពេលដែលបង្កើតចង្ក្រានបរិស្ថាននេះ ក្រុមការងារក៏បានមើលឃើញនូវ កាកសំណល់មួយចំនួនដូចជាកាកអំពៅ កម្ទិចកម្ទីឈើអាចម៍រណាជាដើម ត្រូវបានគេយកទៅបោះចោល ដុតចោល រាយប៉ាយស្ទើរគ្រប់ទីកន្លែង ដែលអាចយកកែច្នៃជាអុសប្រើប្រាស់ជាមួយចង្រ្កានបរិស្ថានបាន ។ លោកថា អុសបរិស្ថាននេះដែរ ត្រូវបានផលិតពីសំណល់កាកអំពៅ ឬកម្ទេចអាចម៍រណា មិនប៉ះពាល់បរិស្ថាន ដូចការប្រើប្រាស់ធ្យូងឬអុសធម្មតា ដែលអាចបំផ្លាញធនធានធម្មជាតិនៅកម្ពុជា។ ជាពិសេសការប្រើប្រាស់អុសនេះជាមួយចង្រ្កានបរិស្ថាន កាន់តែល្អប្រសើរ សន្សំ សំចៃថវិកា កាត់បន្ថយផ្សែងនិងឧស្ម័ន មិនប៉ះពាល់សុខភាពជាដើម។ លោកវាសនា បានពន្យល់ថា ទោះបីជាវាមានឈ្មោះជាអុសបរិស្ថានតែយើងមិនមានទៅកាប់ព្រៃមកធ្វើអុសទេ គឺយើងយកកាកអំពៅ មែកឈើដែលបងប្អូនយើងកាប់ចោល ស្លឹកឈើ កម្ទេចកម្ទីអាចម៍រណាអី យើងប្រមូលពីសិប្បកម្មកែច្នៃមកវិញយើងអត់កាប់មែកឈើធំៗមកធ្វើជាអុសនោះទេ ហើយបើយើងធ្វើអ៊ីចឹងមិនមានជាការជួយបរិស្ថានទេ។
ព័ត៌មានជាតិ ថ្មីៗ
សូមបញ្ជាក់ថា ស្ថាប័នចង្រ្កានបរិស្ថានACE គឺមានទីតាំងក្នុងភូមិតាចេក សង្កាត់ជ្រាវ ក្រុងសៀមរាប ខេត្តសៀមរាប។ ដោយក្នុងមួយថ្ងៃ ស្ថាប័នចង្រ្កានបរិស្ថាន មានលទ្ធភាពផលិតចង្រ្កាន បានចំនួន២០ ទៅ៣០ចង្រ្កាន ដោយចង្រ្កានមួយឈុត មានតម្លៃ១០៥ដុល្លារ អាចប្រើប្រាស់បានរហូតជិត១០ឆ្នាំ និងធានាសេវាកម្មជួសជុលជូនអតិថិជននៅពេលខូចខាតជាដើម។ ចំណែកអុសបរិស្ថានវិញ អាចផលិតបានជិត៥០០គីឡូក្រាមក្នុងមួយថ្ងៃ ដោយលក់ចេញក្នុងតម្លៃ ៨,០០០រៀលក្នុង១៥គីឡូក្រាមឬស្មើនឹងមួយគីឡូ៥០០រៀល។
អ្នកស្រី ឈ វ៉ាន់លី រស់នៅភូមិបុស្សក្រឡាញ់សង្កាត់ជ្រាវ ដែលកំពុងប្រើប្រាស់ចង្ក្រាន និងអុសបរិស្ថាននេះ បានលើកឡើងថា កាលពីមុនផ្ទះរបស់អ្នកស្រីបតែងតែប្រើប្រាស់អុសធម្មតាក្នុងការចម្អិនម្ហូបអាហារផ្សេងៗ ពេលចម្អិនម្តងៗ វាមានផ្សែងខ្លាំង ធ្វើឲ្យពិបាកដកដង្ហើម និងក្រហាយភ្នែក។ ប៉ុន្តែចាប់តាំងពីប្រើចង្ក្រាន និងអុសបរិស្ថាននេះ ឃើញថា មិនមានស្ថានភាពដូចពីមុនទៀតទេ ហើយចំណាយក៏អស់តិចជាងពីមុនដែរ៕
អត្ថបទ និងរូបភាព៖ លោក ជា ស្រស់
