លោក ហ៊ា ហាវ ចៅសង្កាត់ស្វាយដង្គំ ក្រុងសៀមរាប ខេត្តសៀមរាប បានអោយដឹងថា សម្រាប់គម្រោងមូនិធិសង្កាត់ស្វាយដង្គំ ឆ្នាំ២០២៣ ផ្ដោតសំខាន់ទៅលើសាងសង់ប្រព័ន្ធរំដោះទឹក ដោយសារកន្លងមករាល់ពេលមានភ្លៀងធំម្តងៗធ្វើឲ្យមានការលិចលង់មួយរយ:ពេលខ្លី។ ការជន់លិចទីធ្លាសាលារៀនបឋមសិក្សានិងអនុវិទ្យាល័យវត្តចក ធ្វើឲ្យប៉ះពាល់ដល់ បង្ករផល់វិបាកដល់ការសិក្សារបស់សិស្ស ដែលបានមកសិក្សានៅសាលានេះ ជិត២,០០០នាក់ ពិបាកក្នុងការរៀនសូត្រ ពេលភ្លៀងធ្លាក់ជាប់ជាច្រើនថ្ងៃម្ដងៗ ពេលខ្លះលិចដល់ជិតមួយអាទិត្យ និងភូមិចំនួន៦ ដែលមានប្រជាពលរដ្ឋរស់នៅជាង ៨,០០០ខ្នងផ្ទះ ជាពិសេសភូមិគោកក្រសាំង និងភូមិពោធិ៍បុស្ស ដែលទទួលរងផលវិបាកនេះផងដែរ។
លោកចៅសង្កាត់បានរំពឹងផងដែរថាក្រោយស្ដារប្រឡាយ និងសាងសង់លូរំដោះទឹក ដែលមានប្រវែងជាង ២,០០០ម៉ែត្រ ដែលដាក់ដេញថ្លៃរកក្រុមហ៊ុនទទួលការសម្រាប់គម្រោងចំនួន២នេះ និងជួយសម្រួលដល់ការសិក្សារបស់សិស្ស និងការរស់នៅរបស់ប្រជាពលរដ្ឋ ក្នុងមូលដ្ឋានរបស់លោក អោយបានកាន់តែប្រសើរឡើងជាងមុន។
សូមជម្រាបថានៅថ្ងៃទី១៧ ខែសីហា ឆ្នាំ២០២៣ គណ:កម្មការលទ្ធកម្មសង្កាត់ស្វាយដង្គំ បានដាក់ឱ្យដេញថ្លៃ គម្រោងស្ដារប្រឡាយ និងគម្រោងសាងសង់លូរំដោះទឹក ដោយមានការចូលរួមពីមន្ត្រីបច្ចេកទេសសាលាខេត្ត មន្ត្រីបច្ចេកទេសក្រុង គណ:កម្មការលទ្ធកម្មសង្កាត់ អ្នកសាព័ត៌មាន រួមនឹងតំណាងក្រុមហ៊ុនដេញថ្លៃ។
ដោយក្រុមហ៊ុន អ៊ី សៀងហៃ ទទួលបានគម្រោងស្ដារប្រឡាយដី ពីខ្សែប្រវែង ១,៨៨០ម៉ែត្រ បាត១,៥ ម៉ែត្រ ជម្រៅ ១,ម៉ែត្រ មាត់លើ៥ម៉ែត្រ លូភ្លោះកាត់ផ្លូវ១កន្លែង និងស្លាកសញ្ញាគម្រោងចំនួន២ ក្នុងតម្លៃប៉ាន់ស្មាន ២៣៤,៧៨៦,៧៧៤រៀល ដោយដេញថ្លៃបានក្នុងតម្លៃ២៣៣,០០០,០០០រៀល ។ ចំណែកគម្រោងសាងសង់លូមូលរំដោះទឹក ៣ខ្សែប្រវែង ៦៣៤ម៉ែត្រ លូមុខកាត់ ១ម៉ែត្រ ស្លាកគម្រោងចំនួន៣ ក្នុងតំលៃប៉ាន់ស្មាន ២៥៣,៩១១,៧០០រៀល ដោយក្រុមហ៊ុន ហ៊ត ហៀង ដេញថ្លៃបានក្នុងតម្លៃ ២៥២,៧០០,០០០រៀល៕
អត្ថបទ និងរូបភាព: លោកធន់ ពូថេ កែសម្រួលដោយ លីវ សុខុន!!!
