ដើម្បីជាការបង្ហាញពីវប្បធម៌ចែករំលែក ការបង្កើតនូវសាមគ្គីភាព ផ្ដល់ក្ដីស្រឡាញ់ លើកទឹកចិត្តដល់កុមារកម្ពុជាដែលកំពុងសម្រាកព្យាបាលជំងឺនៅព្រឹកថ្ងៃទី១៨ ខែសីហា ឆ្នាំ២០២៣នេះ សប្បុរសជនដែលជាជនជាតិកូរ៉េតាមរយៈប្រធានសមាគមកូរ៉េប្រចាំខេត្តសៀមរាប បានចុះសួរសុខទុក្ខ និងនាំយកមកចែកជូនដល់ប្អូនៗ កុមារដែលកំពុងសម្រាកព្យាបាលជំងឺនៅក្នុងមន្ទីរពេទ្យកុមារអង្គរខេត្តសៀមរាប។
លោក ផាក វ៉ូស៊ុក ប្រធានសមាគមកូរ៉េខេត្តសៀមរាប បានឲ្យដឹងថា ការចុះមកសួរសុខទុក្ខនាពេលនេះ គឺក្នុងគោលបំណងបន្តវប្បធម៌ចែករំលែក បង្កើតនូវសាមគ្គីភាព ផ្ដល់ក្ដីស្រឡាញ់ លើកទឹកចិត្ត និងសម្រាលទុក្ខលំបាកអ្នកជំងឺដែលកំពុងសម្រាកព្យាបាលជំងឺក្នុងមន្ទីរពេទ្យកុមារអង្គរ។ មិនតែប៉ុណ្ណោះសកម្មភាពនៃការចែកដល់ប្អូនៗ កុមារដែលកំពុងសម្រាកព្យាបាល និងកំពុងតែមកពិនិត្យជំងឺ រួមទាំងក្រុមគ្រួសារ អ្នកជំងឺនាពេលនេះ គឺបានបង្កប់នូវអត្ថន័យដល់ជ្រាលជ្រៅរបស់សប្បុរសជន។
ក្នុងនាមមន្ទីរពេទ្យកុមារអង្គរ និងប្អូនៗដែលកំពុងសម្រាកព្យាបាលជំងឺ លោកវេជ្ជបណ្ឌិត ងួន ច័ន្ទភត្រ្តា នាយកមន្ទីរពេទ្យកុមារអង្គរ បានថ្លែងការកោតសរសើរ និងអរគុណ ចំពោះសប្បុរសជនទាំងអស់ នូវសន្តានចិត្តដ៏ល្អប្រពៃ និងទង្វើប្រកបដោយមនុស្សធម៌ លះបង់កម្លាំងកាយចិត្ត ពេលវេលា និងធនធានថវិកា ដើម្បីជួយផ្ដល់អំណោយនាពេលនេះ គឺជាវប្បធ៌មចែករំលែកជួយគ្នាទៅវិញទៅមកដែលនេះជាការបង្ហាញពីទឹកចិត្ត ស្រឡាញ់រាប់អាន អាណិតអាសូរ ដែលជាកត្តាបង្កើននូវសាមគ្គីភាព ក្នុងស្រទាប់មហាជនជាមូលដ្ឋានគ្រឹះ នៃការឯកភាពជាតិ ដើម្បីរួមគ្នាក្នុងការអភិវឌ្ឍប្រទេស ឲ្យមានការរីកចម្រើន។
លោកនាយកមន្ទីរពេទ្យកុមារអង្គរបន្តថា ដោយសារតែមានជំនួយឧបត្ថម្ភទាំងអស់នេះហើយទើបមន្ទីរពេទ្យអាចបន្តផ្តល់ការថែទាំប្រកបដោយក្តីមេត្តាករុណា និងគុណភាពខ្ពស់ដល់កុមារកម្ពុជាហើយមន្ទីរពេទ្យកុមារអង្គរនិងបន្តបេសកកម្មរបស់ក្រុមគ្រូពេទ្យ ក្នុងការព្យាបាលកុមារនៅកម្ពុជាក៏ដូចជាការជួយសង្គ្រោះជីវិតកុមារកម្ពជា ដោយជឿជាក់ថា កុមារគ្រប់រូបសក្តិសមនឹងទទួលបានសុខភាពល្អ និងការថែទាំប្រកដដោយការយកចិត្តទុកដាក់បន្តជួយ សង្គ្រោះជីវិតកុមារកម្ពុជារាប់រយពាន់នាក់ផងដែរ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
