គម្រោងជួសជុលផ្លូវដីសក្រាលគ្រួសធម្មជាតិចំនួន ២ខ្សែ ស្ថិតក្នុងឃុំល្វា ស្រុកពួក ខេត្តសៀមរាប ដែលជាការចំណាយរបស់គម្រោងមូលនិធិឃុំឆ្នាំ២០២៣ ត្រូវបានប្រកាសបញ្ចប់ការដេញថ្លៃជាស្ថាពរ នៅព្រឹកថ្ងៃទី២៨ ខែសីហា ឆ្នាំ២០២៣នេះ ដោយមានការចូលរួមពីមន្ត្រីបច្ចេកទេសសាលាខេត្ត មន្ត្រីបច្ចេកទេសស្រុក គណៈកម្មការលទ្ធកម្មឃុំ អ្នកសារព័ត៌មាន រួមនឹងតំណាងក្រុមហ៊ុនដេញថ្លៃផងដែរ។
បើតាម អ្នកស្រី ឈើយ ហ៊ាន ប្រធានគណៈកម្មការលទ្ធកម្មឃុំល្វា បានឲ្យដឹងថាគម្រោងដែលបានបើកការដេញថ្លៃថ្ងៃនេះ មាន២គម្រោង ដែលជាលទ្ធផលបានទៅលើក្រុមហ៊ុន អ៊ី សៀងហៃ ទាំង២គម្រោង។ គម្រោងទី១ ជួសជុលផ្លូវដីសក្រាលក្រួសធម្មជាតិ មានប្រវែង ១.០៥០ម៉ែត្រ ទទឹង ៥ម៉ែត្រ កំរាស់ក្រួស ០.១៥ម៉ែត្រ និងស្លាកសញ្ញាគម្រោងចំនួន១ ក្នុងតម្លៃប៉ាន់ស្មាន ១០១.៦៦៧.០៩៧រៀល ដេញថ្លៃបានក្នុងតម្លៃ ៩៩.៩៦០.០០០រៀល និង គម្រោងទី២ ជួសជុលផ្លូវដីសក្រាលក្រួសធម្មជាតិ ប្រវែង ៦០០ម៉ែត្រ ទទឹង ៥ម៉ែត្រ កំរាស់ក្រួស ០.១៥ម៉ែត្រ និងស្លាកសញ្ញាគម្រោងចំនួន១ ក្នុងតម្លៃប៉ាន់ស្មាន ៥៥.៩៦០.៩៤៦រៀល ដេញថ្លៃបានក្នុងតម្លៃ ៥៤.៧៨០.០០០រៀល។
ជាមួយគ្នានោះ ក្រុមហ៊ុនដែលទទួលបានការម៉ៅការគម្រោងផ្លូវទាំងពីរខាងលើ បានធ្វើការប្ដេជ្ញាចិត្តដោយសន្យាថា ធ្វើឲ្យបានត្រឹមត្រូវស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដូចមាន ចែងនៅក្នុងកិច្ចសន្យា ជាពិសេសសហការជាមួយអាជ្ញាធរមូលដ្ឋាន៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
