សហគមន៍ទេសចរណ៍ធម្មជាតិ ត្រូវបានគេមើលឃើញថា កំពុងដើរតួនាទីយ៉ាងសំខាន់ នៅក្នុងអភិរក្សធនធានធម្មជាតិដែលមានក្នុងសហគមន៍ ហើយក៏បានជួយជំរុញកំណើនសេដ្ឋកិច្ចរបស់ប្រជាពលរដ្ឋនៅមូលដ្ឋាន ។
ប្រធានគណៈកម្មការសហគមន៍ទេសចរណ៍ធម្មជាតិបឹងឈូក ក្នុងឃុំខ្នាសណ្តាយ ស្រុកបន្ទាយស្រី លោក ភួង សាវ៉ុន បានលើកឡើងថា តំបន់បឹងឈូក ដែលនៅក្បែរប្រាសាទបន្ទាយស្រី មានសក្តានុពលខ្លាំង មានផ្ទៃបឹងល្វឹងល្វើយ មានមច្ឆជាតិសំបូរបែប និងមានព្រៃកោងកាងដែលបានបង្កើតនូវទស្សនីយភាពដ៏ល្អ។ សក្តានុពលនេះបានជំរុញឲ្យប្រជាពលរដ្ឋដែលស្រលាញ់ធម្មជាតិ ដោយមានការគាំទ្រពីអាជ្ញាធរគ្រាប់ជាន់ថ្នាក់ និងមន្ទីរជំនាញពាក់ព័ន្ធផងនោះ បានរួមគ្នាបង្កើតនូវសហគមន៍ទេសចរណ៍ធម្មជាតិនេះឡើង។
លោក ភួង សាវ៉ុន បានឲ្យដឹងថា កាលពីមុនពេលបង្កើតសហគមន៍ទេសចរណ៍ធម្មជាតិបឹងឈូក នៅឆ្នាំ២០១៧ ក្នុងតំបន់នេះ បងប្អូនប្រជាពលរដ្ឋមួយចំនួនដែលមិនទាន់យល់ដឹងអំពីតម្លៃធនធានធម្មាជាតិ ពួកគាត់ខ្លះបានចូលទៅកាប់ព្រៃកោងកាង ខ្លះបានចូលទៅនេសាទដោយប្រើប្រាស់ឧបករណ៍ និងវិធីសាស្ត្រដោយមិនត្រឹមត្រូវតាមច្បាប់ ធ្វើបាត់បង់ធនធានទាំងនោះ។ ប៉ុន្តែចាប់តាំងពីការបង្កើតសហគមន៍ ពួកគាត់បានចូលរួម និងទាញបានផលប្រយោជន៍ពីការជួយការពារតំបន់នេះ។
លោកលើកឡើងថា គិតមកទល់នឹងពេលនេះ មានប្រជាពលរដ្ឋជាង ២៧០គ្រួសារ ដែលប្រហាក់ប្រហែលជិតមួយពាន់នាក់ដែរ បានចូលរួមបង្កើតសហគមន៍នេះ ហើយយើងបានចងក្រងជាក្រុមដាំបន្លែ ក្រុមនេសាទ និងក្រុមចិញ្ចឹមសត្វ សម្រាប់ផ្គត់ផ្គង់ដល់រមណីយដ្ឋានរបស់សហគមន៍ ដែលធ្វើឲ្យពួកគាត់បានទទួលផលប្រយោជន៍ច្រើន។ ប៉ុន្តែទោះជាយ៉ាងនេះក្តី កម្លាំងផលិតរបស់ប្រជាពលរដ្ឋនៅមិនទាន់ឆ្លើយតប និងតម្រូវការរបស់ទីផ្សារនោះទេ ជាពិសេសការផលិតមាន់ស្រែ ព្រោះថា នៅក្នុងស្រុកបន្ទាយស្រីនេះ មានសហគមន៍ទេសចរណ៍ធម្មជាតិច្រើន ហើយប្រជាពលរដ្ឋពេញនិយមខ្លាំងលើមាន់ស្រែ។
យោងតាមផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ២០២១-២០៣៥ ក៏បានដាក់ចេញនូវយុទ្ធសាស្ត្រដ៏សំខាន់ៗ ដែលឆ្លុះបញ្ចាំងពីចក្ខុវិស័យវែងឆ្ងាយនៃការអភិវឌ្ឍវិស័យទេសចរណ៍នៅខេត្តសៀមរាប និងតំបន់ជុំវិញ ក៏ដូចជាបម្រើដល់ការអភិវឌ្ឍខេត្តសៀមរាបទាំងមូល ដើម្បីអាចដើរតាមទស្សនវិស័យនៃការអភិវឌ្ឍទេសចរណ៍ប្រកបដោយចីរភាព និងនៅក្នុងបរិបទនៃការប្រកួតប្រជែងទេសចរណ៍កាន់តែខ្លាំងក្នុងនិងក្រោយវិបត្តិជំងឺកូវីដ-១៩។ ដែលផែនការមេនោះបានកំណត់វិសាលភាពរួម គឺរួមបញ្ចូលទាំងទេសចរណ៍វប្បធម៌ និងទេសចរណ៍ធម្មជាតិ ៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
