នៅរសៀលថ្ងៃទី២៨ ខែសីហា ឆ្នាំ២០២៣ នាសាលប្រជុំសាលាខេត្តសៀមរាប ក្រុមប្រឹក្សាខេត្ត និងរដ្ឋបាលខេត្តសៀមរាប បានរៀបចំកិច្ចប្រជុំវិសាមញ្ញរបស់ខ្លួន ក្រោមអធិបតីភាពដ៏ខ្ពង់ខ្ពស់ឯកឧត្តម អ៊ាន ឃុន ប្រធានក្រុមប្រឹក្សាខេត្ត លោក នាក់ ណេរ៉ុន អភិបាលរងខេត្ត តំណាងដ៏ខ្ពង់ខ្ពស់ឯកឧត្តម ប្រាក់ សោភ័ណ អភិបាល នៃគណ:អភិបាលខេត្ត ព្រមទាំងវត្តមាន ឯកឧត្តម លោកជំទាវ សមាជិក សមាជិកាក្រុមប្រឹក្សាខេត្ត លោក លោកស្រីអភិបាលរងខេត្ត នាយករងរដ្ឋបាលសាលាខេត្ត លោក លោកស្រី នាយក នាយករងទីចាត់ការ និងអង្គភាពចំណុះសាលាខេត្ត លោក លោកស្រី ប្រធាន អនុប្រធានមន្ទីរ-អង្គភាពពាក់ព័ន្ធ មន្រ្តីការិយាល័យលេខាធិការក្រុមប្រឹក្សា និងមន្ដ្រីពាក់ព័ន្ធ ដែលបានអញ្ជើញចូលរួម។
កិច្ចប្រជុំនេះធ្វើឡើង ដើម្បីពិនិត្យ ពិភាក្សា និងអនុម័តលើផែនការចំណូល-ចំណាយថវិកាឆ្នាំ២០២៤ របស់រដ្ឋបាលខេត្ត។ក្រោយពីក្រុមប្រឹក្សាខេត្តបានពិនិត្យ ពិភាក្សារួចហើយ ឯកឧត្តម លោកជំទាវ សមាជិក សមាជិកាក្រុមប្រឹក្សាខេត្ត ធ្វើការអនុម័តលើផែនការចំណូល -ចំណាយថវិកាឆ្នាំ២០២៤ របស់រដ្ឋបាលខេត្ត។ ឯកឧត្តម អ៊ាន ឃុន ប្រធានក្រុមប្រឹក្សាខេត្ត ប្រធានដឹកនាំកិច្ចប្រជុំ មានប្រសាសន៍ថា៖ ការប្រជុំវិសាមញ្ញនេះ គឺរដ្ឋបាលខេត្ត អនុវត្តតាមពេលវេលាមួយកំណត់ច្បាស់លាស់ នៃការគ្រោងថវិកាប្រចាំឆ្នាំ ជារៀងរាល់ឆ្នាំ។ គម្រោងថវិកាឆ្នាំ២០២៤នេះ ត្រូវបានទីចាត់ការហិរញ្ញវត្ថុរបស់សាលាខេត្ត ចាប់ផ្តើមរៀបចំគ្រោងបន្ទាប់ពីមានការណែនាំពីក្រសួងសេដ្ឋកិច្ច និងហិរញ្ញវត្ថុ នៅអំឡុងដើមត្រីមាសទី៣ ហើយបានពិនិត្យ និងបានដាក់ឆ្លងគណ:អភិបាលខេត្ត កាលពីថ្ងៃទី២២ ខែសីហា ឆ្នាំ២០២៣ រួចហើយដែរ។ ឯកឧត្តម បញ្ជាក់ថា៖ ដូចនេះ ដើម្បីអនុវត្តតាមច្បាប់ នៃការគ្រប់គ្រងរបបហិរញ្ញវត្ថុរបស់រដ្ឋបាលថ្នាក់ក្រោមជាតិ ដែលក្រុមប្រឹក្សាត្រូវពិនិត្យ ពិភាក្សា គ្រប់គ្រងប្រកបដោយគណនេយ្យភាព និងតម្លាភាពឲ្យបានច្បាស់លាស់ គឺរាល់ផែនការថវិកាចំណូល-ចំណាយប្រចាំឆ្នាំនីមួយៗ ត្រូវដាក់ឆ្លងការពិនិត្យ ពិភាក្សា និងអនុម័តពីក្រុមប្រឹក្សាយើង ដើម្បីផ្តល់សុពលភាពជាចុងក្រោយ។ ហើយបន្ទាប់មកទើបរដ្ឋបាលខេត្តយកទៅប្រជុំឆ្លង និងវាយតម្លៃ កែតម្រូវបន្ថែមសម្រេចនៅក្រសួងហិរញ្ញវត្ថុ៕
អត្ថបទ និងរូបភាព លោកយូ វង្ស កែសម្រួលដោយ លីវ សុខុន!!!
