នៅព្រឹកថ្ងៃទី២៩ ខែសីហា ឆ្នាំ២០២៣នេះ លេខាធិការដ្ឋាន នៃគណៈកម្មការរៀបចំការបោះឆ្នោតខេត្តសៀមរាប បានរៀបចំបើកកិច្ចប្រជុំផ្សព្វផ្សាយណែនាំ ស្ដីពីការផ្តល់លិខិតអញ្ជើញអ្នកមានឈ្មោះក្នុងបញ្ជីបោះឆ្នោតផ្លូវការឆ្នាំ២០២២ សម្រាប់បម្រើឱ្យការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៣ ខេត្តសៀមរាប ដើម្បីធ្វើការធ្វើការណែនាំដល់លេខាធិការដ្ឋានខេត្តរៀបចំការបោះឆ្នោត ក្រុមប្រឹក្សាឃុំសង្កាត់ និងមេភូមិណែនាំបន្តជូនដល់ប្រជាពលរដ្ឋក្នុងមូលដ្ឋានដែលមានឈ្មោះក្នុងបញ្ជីបោះឆ្នោត ដោយកិច្ចប្រជុំនេះមានការចូលរួមអ្នកពាក់ព័ន្ធជាច្រើនរូប ។
បើតាម លោក នឹម វ៉ាន់សំ ប្រធានលេខាធិការដ្ឋានរៀបចំការបោះឆ្នោតខេត្តសៀមរាប បានឲ្យដឹងថា កិច្ចប្រជុំនាពេលនេះគឺដើម្បីជម្រាបជូនដំណឹងដល់ប្រជាពលរដ្ឋដែលមានឈ្មោះក្នុងបញ្ជីបោះឆ្នោតផ្លូវការ ឆ្នាំ២០២២ ហើយដែលបានប្រើប្រាស់ អត្តសញ្ញាណប័ណ្ណសញ្ជាតិខ្មែរ (អ.ខ) ដែលអស់សុពលភាព ឬឯកសារបញ្ជាក់អត្តសញ្ញាណ បម្រើឱ្យការចុះឈ្មោះបោះឆ្នោតកន្លងមក ដើម្បីពិនិត្យផ្ទៀងផ្ទាត់ និងមកធ្វើបច្ចុប្បន្នភាពទិន្នន័យ ក្នុងបញ្ជីបោះឆ្នោតតាមអត្តសញ្ញាណប័ណ្ណដែលមានសុពលភាពក្នុងអំឡុងពេលពិនិត្យបញ្ជីឈ្មោះ និងចុះឈ្មោះបោះឆ្នោត ឆ្នាំ២០២៣។ ក្នុងនោះប្រសិនបើពិនិត្យឃើញថាមានការកត់ត្រាមិនបានត្រឹមត្រូវតាម អ.ខ ដែលមានសុពលភាព បងប្អូនអាចស្នើសុំកែតម្រូវក្នុងអំឡុងពេលពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០២៣ ។
ជាមួយគ្នានោះដែរ លោកប្រធានលេខាធិការដ្ឋាន ក៏បានណែនាំដល់ក្រុមប្រឹក្សាឃុំសង្កាត់ ត្រូវកំណត់ប្រតិទិនសម្រាប់ការផ្ដល់លិខិតអញ្ជើញអ្នកមានឈ្មោះក្នុងបញ្ជីបោះឆ្នោតនៅតាមភូមិនានាក្នុងឃុំសង្កាត់របស់ខ្លួន ឲ្យស្របតាមប្រតិទិនដែលបានកំណត់ដោយ គ.ជ.ប ។ ជាពិសេសត្រូវប្រជុំជាមួយមេភូមិ តំណាងគណបក្សនយោបាយ តំណាងអង្គការមិនមែនរដ្ឋាភិបាលនៅក្នុងឃុំសង្កាត់ ដើម្បីផ្សព្វផ្សាយអំពីគោលបំណង សារប្រយោជន៍ និងការអនុវត្ត ការផ្ដល់លិខិតអញ្ជើញព្រមទាំងបន្តការផ្សព្វផ្សាយអំពីខ្លឹមសារនេះជូនប្រជាពលរដ្ឋឲ្យបានទូលំទូលាយ តាមរយៈការជួបប្រជុំជាមួយប្រជាពលរដ្ឋក្នុងភូមិ ដើម្បីផ្សព្វផ្សាយអំពីគោលបំណង និងសារៈសំខាន់នៃការផ្ដល់លិខិតអ្្ជើញនេះ។ ក្នុងនោះដែរអាជ្ញាធរភូមិ ត្រូវយកចិត្តទុកដាក់ពិនិត្យផ្ទៀងផ្ទាត់ឈ្មោះ ទិន្នន័យពាក់ព័ន្ធនៅក្នុងលិខិតអញ្ជើញជាមួយនឹងអត្តសញ្ញាណប័ណ្ណរបស់សាមីខ្លួន នឹងប្រគល់ជូនសាមីខ្លួនវិញ។
ក្នុងនាមអាជ្ញាធរខេត្ត លោក ចឹក គឹមជុន នាយករងរដ្ឋបាលខេត្តសៀមរាប បានជម្រុញដល់គ្រប់អ្នកពាក់ព័ន្ធទាំងអស់ សូមចូលរួមក្នុងការអនុវត្តការងារនេះឲ្យបានរលូន និងត្រឹមត្រូវ ធ្វើយ៉ាងណាឲ្យបងប្អូនប្រជាពលរដ្ឋ អាចយល់ដឹង និងស្វែងយល់បន្ថែមពីគោលបំណង និងសារៈសំខាន់នៃការងារនេះ។ ជាមួយគ្នានោះដែរ អាជ្ញាធរមូលដ្ឋាន ក៏ត្រូវចុះពិនិត្យ និងចែកផ្ទាល់នូវលិខិតអញ្ជើញនេះជូនដល់ប្រជាពលរដ្ឋក្នុងមូលដ្ឋានខ្លួន ហើយងាយស្រួលក្នុងការក្ដាប់យកនូវព័ត៌មាន និងណែនាំដល់ប្រជាពលរដ្ឋបានដឹងពីសារៈសំខាន់នៃការងារនេះ៕
អត្ថបទ និងរូបភាព៖ លោក អ៊ុន ណារាជ្យ
