ប្រធានក្លឹបបណ្ដុះបណ្ដាលវប្បធម៌ខ្មែរអង្គរ ក្រុងសៀមរាប លោក ទួន សុខគា ហៅណាំ បានបង្ហាញការប្ដេជ្ញាចិត្តចង់ជួយឱ្យក្មេងៗ ជំនាន់ក្រោយក្លាយជាអ្នកសម្ដែងដែលមានអាជីព និងចែករំលែកចំណេះដឹង និងចូលរួមថែរក្សាអ្វីដែលយើងមាន ចង់ឱ្យក្មេងចូលរួមស្គាល់ពីវប្បធម៌ និងគោលដៅខ្ញុំ ចង់ឃើញក្មេងចូលរួម និងផ្សព្វផ្សាយច្រើន ដែលធ្វើឱ្យគាត់មានរបរជាអាជីព មានចំណូលទៅអនាគត។
លោក ទួន សុខគា បានឱ្យដឹងនៅថ្ងៃទី២៩ ខែសីហានេះថា ក្លឹបបណ្ដុះបណ្ដាលវប្បធម៌ខ្មែរអង្គរ មានបង្រៀនសិល្បៈចម្រុះរួមមាន របាំបុរាណ ទម្រង់រឿងក្បាច់បុរាណ ខោល ប្រពៃណី ភ្លេង ល្បុកតោ និងសិល្បៈមួយចំនួនទៀត។ បច្ចុប្បន្នក្លឹបបណ្ដុះបណ្ដាលវប្បធម៌ខ្មែរអង្គរ កំពុងបង្ហាត់សិស្សជាង ៥០នាក់ ខណៈដែលកន្លងមកមានសិស្សជាង ១០០នាក់ហើយ ដែលហាត់រៀននៅកន្លែងនេះ។ លោកបន្ដថា លោកធ្លាប់រៀនសិល្បៈនៅមន្ទីរវប្បធម៌ និងវិចិត្រ សិល្បៈ បន្ទាប់មកលោកតែងដើររៀនតាមអង្គការ ដែលគេបង្រៀនមិនយកប្រាក់ និងឆ្លៀតពេលរត់តុចិញ្ចឹមគ្រួសារ។
លោកប្រធានក្លឹបរូបនេះ បានបញ្ជាក់ថា ការបង្កើតក្លឹបនេះឡើង គឺក្នុងន័យចង់ជួយអភិរក្ស ថែរក្សា និងផ្សព្វផ្សាយទៅកាន់មហាជន គ្រប់ស្រទាប់ ជាពិសេសសជាកន្លែងសម្រាប់ បណ្ដុះគ្រាប់ពូជសិល្បៈបន្ត។ ក្រៅពីហាត់រៀនសិស្សនៅក្លឹបនេះកន្លងមក ក៏ធ្លាប់បានចេញទៅសម្ដែងក្នុងពិធីច្រើនដែរ តែភាគច្រើនផ្តោតលើកម្មវិធីសប្បុរសធ៌ច្រើន ដោយយល់ពីគោលគំនិតនៃកម្មវិធីស្រដៀងនឹងគំនិតចង់ ជួយសង្គម និងចែករំលែកដូចគ្នា។
លោកបញ្ជាក់ថា គ្រូនៅក្នុងក្លឹបនេះមាន ៧នាក់ ភាគច្រើនជាគ្រូស្ម័គ្រចិត្ត។ ទៅអនាគត គ្រូសិល្បៈរូបនេះ ចង់បន្តអាជីពបង្រៀនសិល្បៈនេះ និងចង់បើកកន្លែងសម្ដែង ដោយស្វាគមន៍ទេសចរគ្រប់ទិសទីចូលទស្សនា និងចូលរួមក្នុងស្មារតីបរិច្ចាគសម្រាប់ទ្រទ្រង់ក្លឹប ។
សូមជម្រាបថា ក្លឹបបណ្ដុះបណ្ដាលវប្បធម៌ខ្មែរអង្គរ ទើបផ្លាស់ប្ដូរទីតាំងថ្មី នៅភូមិចុងកៅស៊ូ សង្កាត់ស្លក្រាម ក្រុងសៀមរាប ហើយក្លឹបសិល្បៈនេះក៏កំពុងខ្វះថវិកាសម្រាប់សង់រោងសម្ដែង។ ជាមួយគ្នានោះលោកប្រធានក្លឹប ក៏សូមអំពាវនាវដល់សប្បុរសជន ជួយក្លឹបនេះដើម្បីអនាគតក្មេងៗ ហើយក្លឹបនេះត្រៀមទទួលសិស្សជាច្រើនបន្ថែមទៀត ដើម្បីរៀនសិល្បៈវប្បធម៌ដោយឥតគិតថ្លៃ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
