មន្ត្រីជំនាញនៃអាជ្ញាធរជាតិអប្សរា ថាសត្វស្វានៅតំបន់អង្គរ គឺតែងបង្កគ្រោះថ្នាក់ដល់ថ្មប្រាសាទ និងគំរាមកំហែងដល់ភ្ញៀវទេសចរជាតិ និងអន្តរជាតិជាញឹកញាប់ ខណៈដែលបច្ចុប្បន្នកន្លែងទេសចរដែលកំពុងសំបូរសត្វស្វារស់នៅ គឺប្រាសាទអង្គរវត្តច្រកចូលខ្លោងទ្វារនៃប្រាសាទអង្គរធំ និងជុំវិញបរិវេណនៃប្រាសាទបាយ័ន។
លោក ឡេក គឹមលីន ប្រធានក្រុមភ្ញៀវទេសចរណ៍ប្រចាំនៅប្រាសាទអង្គរវត្ត បានឲ្យដឹងនៅថ្ងៃទី២៩ ខែសីហា ឆ្នាំ២០២៣នេះថា បច្ចុប្បន្នសត្វស្វាមួយចំនួននៅរមណីយដ្ឋានអង្គរ ជាពិសេសនៅប្រាសាទអង្គរវត្ត និងក្រុងអង្គរធំ បានខាំ ខ្វាច និងដណ្តើមរបស់របរ ពីភ្ញៀវទេសចរជាច្រើនករណី។ ជាក់ស្តែងនៅថ្ងៃទី២៥ ខែសីហា ឆ្នាំ២០២៣ ក្រុមការងារភ្នាក់ទេសចរ បានជួយសង្គ្រោះបឋមដល់ភ្ញៀវជនជាតិថៃម្នាក់ ដែលត្រូវបានស្វាខាំនៅខាងត្បូងបណ្ណាល័យខាងត្បូង។
លោកបានបញ្ចាក់ថា កន្លងមកមានស្វាកាចៗមួយចំនួនដែលខាំភ្ញៀវទេសចរ ជាស្វាដែលសាំនឹងមនុស្ស ព្រោះការផ្តល់ចំណីបានប្រែពីប្រភេទសត្វព្រៃ មកជាសត្វចិញ្ចឹម និងស្វាមួយចំនួនទៀត ត្រូវបានគេលួចយកមកព្រលែងនៅព្រៃអង្គរ។លោកមានប្រសាសន៍ថាបច្ចុប្បន្ននេះ ហ្វូងសត្វស្វាមួយចំនួន តែងបង្កការរំខាន ដោយពេលខ្លះ បានខាំអ្នកទេសចរណ៍ ដែលចូលមកទស្សនាប្រាសាទអង្គរវត្តនៅពេលដែលភ្ញៀវខ្លះ មានកាន់ឥវ៉ាន ចំណីឬក៏ដបទឹកនៅក្នុងដៃ។ គ្រោះថ្នាក់មួយទៀតគឺនៅពេលដែលភ្ញៀវទេសចរឃើញសត្វស្វាហើយដើរទៅក្បែរដើម្បីថតរូប ឬក៏ប្រឡែងលេង ក៏ធ្វើឱ្យស្វាកាចហើយក៏អាចខាំដែរ។ បន្ថែមលើនេះសត្វស្វានៅតំបន់អង្គរវត្ត ក៏តែងតែធ្វើឱ្យខូចខាតដល់បរិក្ខាមួយចំនួន ដូចជាស្លាកសញ្ញា និងផ្ទាំងព័ត៌មានផ្សេងនៅតាមបរិវេណអង្គរវត្ត នៅពេលដែលវាលោតឡើងទៅលើប្រាសាទធ្វើឱ្យរហែកឬក៏រលំដួលជាដើម ជាពិសេសវាធ្លាក់ថ្មប្រាសាទដែលពុកផុយផងដែរ។
លោក ឡេក គឹមលីន បានបន្ដថា បច្ចុប្បន្ននេះ សត្វស្វានៅតំបន់អង្គរ កំពុងមានការកើនឡើងយ៉ាងខ្លាំង ហើយស្វាទាំងនោះមានពីរប្រភេទ មានពពួកស្វាក្ដាម និងស្វាត្រោស ឬហៅថាស្វាប៉ាហ៊ី ដែលអ្នកភូមិយកទៅព្រលែងនៅតំបន់អង្គរ។ លោកបន្ថែមថា នៅក្នុងឆ្នាំ២០២៣នេះ សត្វស្វាដែលខាំមនុស្សមានចំនួន ២០ករណីហើយ។ ក្នុងនោះមន្ត្រីនៃអាជ្ញាធរជាតិអប្សរា ដែលប្រចាំការនៅតាមប្រាសាទនៃរមណីយដ្ឋានអង្គរ បានសំណូមពរ ដល់ភ្ញៀវទេសចរទាំងឡាយ ដែលមកទស្សនាប្រាសាទបុរាណ នៅពេលឃើញសត្វស្វាគឺសូមកុំឱ្យចំណីវាពីព្រោះ ការឱ្យចំណីគឺនឹងធ្វើឱ្យវាមានទម្លាប់ មិនចូលទៅព្រៃរកចំណីស៊ីដោយខ្លួនឯងទេ។ម្យ៉ាងទៀតសូមកុំប្រឡែងលេងជាមួយវាដើម្បីជៀសវាងគ្រោះថ្នាក់ ដែលអាចកើតមានឡើង៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
