នៅថ្ងៃទី៣១ ខែសីហា ឆ្នាំ២០២៣ ដែលជាថ្ងៃបញ្ចប់នៃ កិច្ចប្រជុំអាជ្ញាធរជាតិថ្នាក់តំបន់លើកទី២១ នៃរដ្ឋភាគីរបស់អនុសញ្ញាស្ដីពីអាវុធគីមី ហៅកាត់ថា CWC នៅក្នុងតំបន់អាស៊ី បានបង្ហាញពីការប្ដេជ្ញា និងចង់បាននូវពិភពលោកមួយគ្មានអាវុធគីមី។
លោកឧត្តមសេនីយ៍ទោ នឿន វិទ្យា នាយក នាយកដ្ឋានគ្រប់គ្រងសារធាតុគីមី នៃអាជ្ញាធរជាតិ ទប់ស្កាត់អាវុធគីមី នុយក្លេអ៊ែរ ជីវសាស្ត្រ និង វិទ្យុសកម្ម លើកឡើងថា កិច្ចប្រជុំដែលមានរយៈពេល ៣ថ្ងៃនេះ បានធ្វើការពិភាក្សាយ៉ាងសកម្ម លើកនូវធាតុចូល និងការផ្លាស់ប្តូរបទពិសោធន៍ ពីបណ្ដារដ្ឋភាគីជាសមាជិកទាំងអស់ ដែលបានចូលរួម។ លោកបន្ថែមថា អង្គប្រជុំ បានបន្តពង្រឹងទំនាក់ទំនង និងការចូលរួមបន្ថែមទៀត នៅក្នុងកិច្ចសហប្រតិបត្តិការទ្វេរភាគី និងពហុភាគី ដើម្បីសម្រេចបាននូវការអនុវត្តប្រកបដោយជោគជ័យរបស់ CWC ក្រោមការដឹកនាំ និងគោលការណ៍ណែនាំរបស់ អង្គការហាមឃាត់អាវុធគីមី (OPCW) ដែលនឹងអាចធានាដល់តំបន់អាស៊ី និងតំបន់នានាលើសកលលោកទាំងមូល សំដៅការឈានទៅរកការរស់នៅគ្មានការគំរាមកំហែង ដោយអាវុធគីមី។
កញ្ញា Beatrix Lahoupe ប្រធានសាខាគាំទ្រការអនុវត្ត នៃអង្គការហាមឃាត់អាវុធគីមី (OPCW) ក៏បានលើកឡើងដែរថា កិច្ចប្រជុំដ៏មានសារៈសំខាន់នេះ បានបង្ហាញឱ្យឃើញនូវចំណុចខ្លាំងចំណុចខ្សោយ និងធាតុចូលថ្មីបន្ថែមទៀត។ កញ្ញា ក៏បានថ្លែងនូវការអរគុណចំពោះប្រទេសកម្ពុជា ក្នុងនាមជាម្ចាស់ផ្ទះ ដែលបានរៀបចំបានយ៉ាងល្អ ក្នុងរយៈពេល ៣ថ្ងៃកន្លងមកនេះ។
គួរជម្រាបបន្ថែមថា អនុសញ្ញាស្តីពីអាវុធគីមីត្រូវបានចុះហត្ថលេខា នៅឆ្នាំ ១៩៩៣ ហើយចូលជាធរមាននៅឆ្នាំ ១៩៩៧។ ប្រទេសកម្ពុជាបានចុះហត្ថលេខា ចូលរួមអនុសញ្ញានេះនៅថ្ងៃទី១៥ ខែមករា ឆ្នាំ១៩៩៣៕
អត្ថបទ និងរូបភាព៖ លោក ជា ស្រស់
កែសម្រួល៖ លោក សេង ផល្លី
