សាលាមត្តេយ្យសិក្សានៅទូទាំងប្រទេសមានចំនួនសរុបជាង ៨ពាន់សាលា ក្នុងនោះសាលាមត្តេយ្យសិក្សាសហគមន៍ប្រមាណ ៣ពាន់សាលានៅពេលខាងមុខ នឹងត្រូវបន្តពង្រឹងគុណភាពឱ្យមានស្តង់ដារ ដើម្បីដាក់បញ្ជុលជាកម្រងសាលារបស់រដ្ឋ ទន្ទឹមនោះ លោកគ្រូ អ្នកគ្រូនៃសាលាមត្តេយ្យសិក្សាសហគមន៍ទាំងនោះ ក៏នឹងទទួលបានការបណ្តុះបណ្តាល និងប្រាក់បៀរវត្សរ៍ផងដែរ។
នេះបើតាមការលើកឡើងរបស់ ឯកឧត្តមបណ្ឌិតសភាចារ្យ ហង់ ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ស្ថិតក្នុងពិធីបំពាក់គ្រឿងឥស្សរិយយសដល់បុគ្គលិកអប់រំជាង៦០០រូប ស្ថិតនៅសាលាគរុកោសល្យនិងវិក្រិត្យការខេត្តសៀមរាប នាថ្ងៃទី៣១ខែសីហា ឆ្នាំ២០២៣នេះ។
ឯកឧត្តម ឧបនាយករដ្ឋមន្ត្រី លើកឡើងថា នៅក្នុងអាណត្តិទី៧នេះ រាជរដ្ឋាភិបាល ដែលមាន ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត ជានាយករដ្ឋមន្ត្រី បានដាក់ចេញនូវយុទ្ធសាស្រ្តបញ្ចកោណ ដំណាក់កាលទី១ ដើម្បីកំណើន ការងារ សមធ៌ម ប្រសិទ្ធភាព និងចីរភាព ក្នុងការកសាងមូលដ្ឋានគ្រឹះទៅសម្រេចចក្ខុវិស័យកម្ពុជា ឆ្នាំ២០៥០។ ក្នុងនោះដែរ បញ្ចកោណទី១ គឺការអភិវឌ្ឍធនធានមនុស្ស ដែលក្រសួងអប់រំ យុវជន និងកីឡា មានភារកិច្ច ពង្រឹងធនធានមនុស្សគ្រប់កម្រិតលើវិស័យអប់រំ កីឡា វិទ្យាសាស្រ្ត និងបច្ចេកវិទ្យា ពង្រឹងគុណភាពនៃការបណ្តុះបណ្តាលគ្រូបង្រៀន លើកកម្ពស់ការអប់រំឌីជីថល កាលើកកម្ពស់សុខភាពសិក្សា និងការផ្តល់អាហាររូបករណ៍ដល់សិស្សក្រីក្រ ព្រមទាំងពង្រឹងអភិបាលកិច្ចគ្រឹៈស្ថានឧត្តមសិក្សាផងដែរ។
ឯកឧត្តម បញ្ជាក់ថា ការពង្រឹងធនធានមនុស្ស ចាប់ផ្ដើមពីកុមារ កុមារដែលបានឆ្លងកាត់មត្តេយសិក្សា ពួកគាត់មានភាពក្លាហាន មានការលូតលាស់ និងយល់ដឹងពាក់ព័ន្ឋទៅនឹងអាហារូបត្ថម្ភ ហើយភាពក្លាហាននេះ ធ្វើឱ្យកុមារទាំងនោះអាចរៀនចប់បឋមសិក្សា មធ្យមសិក្សា និងអាចឈានទៅដល់ឧត្តមសិក្សា។ តាមរបាយការណ៍ ចំនួនសិស្សចូលរៀននៅមត្តេយ្យសិក្សាអាយុ ៥ឆ្នាំ បានកើនឡើង៦៥% រីឯអត្រាចូលរៀននៅបឋមសិក្សាមានចំនួន ៩៩% នៃអត្រារួម១០៤% ដែលមានន័យថាកុមារកម្ពុជាជាច្រើន បានចូលរៀនតាមអាយុ និងមួយចំនួនទៀត បានចូលរៀនយឺត ដោយសារកត្តាជីវភាពគ្រួសារក្រីក្រ និងកត្តាខ្វះការយល់ដឹងពីសារៈសំខាន់នៃមត្តេយ្យសិក្សា របស់មាតាបិតាអាណាព្យាបាល។ ជាមួយនឹងការកើនឡើងនៃសិស្សានុសិស្សនេះ ក្រសួងអប់រំយុវជន អប់រំ និងកីឡា នឹងបន្តជំរុញ និងពង្រឹងគុណភាពការសិក្សានៅសាលាមេត្តេយ្យបន្ថែមទៀត ចំពោះកម្រិតបឋមសិក្សា ក៏នឹងផ្តោតលើការលើកកម្ពស់អំណានដំបូង ដើម្បីកសាងមូលដ្ឋានគ្រឺះរបស់កុមារកម្ពុជាក្នុងការអាន សរសេរ និងរៀនផ្នែក គណិតវិទ្យានិងវិទ្យាសាស្ត្រផងដែរ៕
អត្ថបទ និងរូបភាព៖ លោក បូ សាវី និងលោក យូ វង្ស
កែសម្រួល៖ លោក សេង ផល្លី
