អាជ្ញាធរខេត្តសៀមរាប បានលើកឡើងថា រមណីយដ្ឋានប្រវត្តិសាស្ត្រអង្គរ ដែលធ្លាប់រងគ្រោះដោយសារសង្គ្រាម បានប្រែក្លាយទៅជារមណីយដ្ឋានដ៏ល្បីល្បាញរបស់ពិភពលោក បានមកពីការរួមចំណែកពីគ្រប់ភាគីពាក់ព័ន្ធ ក្នុងនោះប្រទេសចិនក៏បានចូលរួមយ៉ាងធំធេងផងដែរ។
អភិបាលរងខេត្តសៀមរាប លោក យុន លីនណេ បានលើកឡើងបែបនេះ នៅក្នុងពិធី ផ្លាស់ប្ដូរ និងឈ្វេងយល់ពីការអភិរក្សវត្ថុបូរាណខេត្តយូណាន នៃសាធារណរដ្ឋប្រជាមានិតចិន និងរដ្ឋបាលខេត្តសៀមរាប នៃព្រះរាជាណាចក្រកម្ពុជា ក្រោមប្រធានបទ «ការផ្លាស់ប្ដូរតាមរយ:កែវភ្នែក និងស្នាមញញឹម» នារសៀលថ្ងៃទី៣០ ខែសីហា ឆ្នាំ២០២៣។ លោក យុន លីនណេ បានលើកឡើងថា ក្រោយពីការចុះក្នុងបញ្ជីសម្បត្តិបេតិកភណ្ឌពិភពលោកនៅឆ្នាំ១៩៩២ ដោយគ្របដណ្តប់លើផ្ទៃដីប្រមានជា ៤០១គីឡូម៉ែត្រក្រឡា ប្រាសាទនានាក្នុងតំបន់រម្មណីយដ្ឋានអង្គរ ទទួលបានការអភិរក្ស និងជួសជុលសារជាថ្មី ក្រោមកិច្ចសហការរបស់អង្គការ UNESCO និងរាជរដ្ឋាភិបាលកម្ពុជា អាជ្ញាធរខេត្ត អាជ្ញាធរជាតិអប្សរា និងភាគីជាតិ -អន្តរជាតិពាក់ព័ន្ធដទៃទៀត បានចូលរួមប្រែក្លាយតំបន់នេះ ដែលធ្លាប់រងគ្រោះដោយសង្គ្រាមទៅជាតំបន់រម្មណីយដ្ឋានទេសចរណ៍ដ៏ទាក់ទាញរបស់ពិភពលោក។ ក្នុងកិច្ចការអភិរក្ស និង ជួសជុលសម្បត្តិ បេតិកភណ្ឌ និងប្រែក្លាយតំបន់រម្មណីយដ្ឋានអង្គរ ឱ្យទៅជាតំបន់រម្មណីយដ្ឋានទេសចរណ៍ប្រកបដោយសក្តានុពលរបស់ពិភពលោកនោះ គេមិនភ្លេចចំពោះកិច្ចខិតខំប្រឹងប្រែង របស់រដ្ឋាភិបាលចិន ក៏ដូចជាក្រុមអ្នកជំនាញបុរាណវិទ្យាចិន ដែលបានចូលរួមចំណែកយ៉ាងធំធេងលើ កិច្ចអភិរក្ស និងជួសជុលប្រាង្គប្រាសាទនានាក្នុងតំបន់រម្មណីយដ្ឋានអង្គរ ដូចជាប្រាសាទចៅសាយទេវតា ប្រាសាទតាកែវ និងប្រាសាទភិមានអាកាសក្នុងបរិវេណក្រុងអង្គរធំតាំងពីឆ្នាំ១៩៩៨ រហូតដល់បច្ចុប្បន្ន។ សមិទ្ធិផល ទាំងអស់នេះ បានបង្ហាញឱ្យឃើញថា ទំនាក់ទំនងជាបងជាប្អូនល្អរវាងចិន-កម្ពុជា នៅតែបន្ត និងបានពង្រីកនិងពង្រឹងកាន់តែប្រសើរថែមទៀត។
ក្រោមការដឹកនាំរបស់រាជរដ្ឋាភិបាលកម្ពុជា ទំនាក់ទនង និងកិច្ចសហប្រតិបត្តិការរវាងកម្ពុជា និងប្រទេសដៃគូសម្ព័ន្ធមេត្រីភាព ពិសេសគឺប្រទេសចិនត្រូវបានលើកកម្ពស់មួយកម្រិតធំថែមទៀត រហូតប្រសិទ្ធនាមថា “ភាពជាដៃគូយុទ្ធសាស្ត្រគ្រប់ជ្រុងជ្រោយ” ជាមិត្តដែកថែប ហើយកម្ពុជា តែងប្រកាន់ជំហរគាំទ្រគោលនយោបាយការបរទេសចិន ជាពិសេសគោលការណ៍ចិនតែមួយ និង គំនិតផ្តួចផ្តើមស្តីពី “BRI រឺគំនិតផ្ដួចផ្ដើមខ្សែក្រវ៉ាត់និងផ្លូវ”។
លោក លាវ ស៊ីជា (Liu Zhijie) ប្រធានការិយាល័យកុងស៊ុលចិនប្រចាំខេត្តសៀមរាប បានមានប្រសាសន៍ថា ទំនាក់ទំនងមិត្តភាពរវាងចិន និងកម្ពុជាមានប្រវត្តិដ៏យូរអង្វែង ហើយការផ្លាស់ប្តូរមិត្តភាពរវាងប្រទេសទាំងពីរអាចដើរតាមប្រវត្តិសាស្ត្ររាប់ពាន់ឆ្នាំ។ លោកបន្តថា ប្រាសាទអង្គរវត្ត ស្ថិតនៅខេត្តសៀមរាបដែលជាបេតិកភណ្ឌវប្បធម៌ពិភពលោកដ៏ល្បីល្បាញ ហើយជាកន្លែងទេសចរណ៍ដែលមានកម្លាំងទាក់ទាញបំផុត សម្រាប់ភ្ញៀវទេសចរមកពីជុំវិញពីភពលោក ព្រមទាំងភ្ញៀវទេសចរចិនផងដែរ។
លោកលាវ ស៊ីជា លើកឡើងថា ក្នុងការជីកកាយបុរាណវិទ្យានៅកម្ពុជា កន្លងមក គេធ្លាប់បានរកឃើញ ស្គរសំរឹទ្ធពីខេត្តយូណានប្រទេសចិន។ ជាមួយគ្នានោះនៅលើផ្ទាំងថ្មនៃប្រាសាទបាយ័នដ៏ល្បីល្បាញ យើងអាចមើលឃើញយ៉ាងច្បាស់នូវទិដ្ឋភាពដ៏អស្ចារ្យនៃកងទ័ពចិន និងកម្ពុជា ដែលធ្វើការជាមួយគា្ន ដើម្បីប្រឆាំងនឹងសត្រូវបរទេស។
លោក ស៊ីជា បានរំឭកថា នៅចុងសតវត្សរ៍ទី១៣នៃគ.ស លោក ជាវ តាក្វាន់ ដែលជាបេសកជនការទូតចិនរាជវង្ស Yuan នៃប្រទេសចិន ត្រូវបានចាត់ចែងទស្សនកិច្ច មកកាន់ចក្រភពខ្មែរ ដែលជនជាតិចិនហៅថាប្រទេសចេនឡា។ ស្នាដៃរបស់លោក គឺកំណត់ហេតុរបស់ជាវ តាក្វាន់ បានកត់ត្រាយ៉ាងលម្អិតអំពីភាពរុងរឿង ជីវភាពប្រជាជន ទឹកដីនឹងប្រពៃណី ទំនៀមទម្លាប់នៃសម័យអង្គរ ហើយបានដើរតួនាទីយ៉ាងសំខាន់ និងមិនអាចជំនួសបានក្នុងការសិក្សា ស្រាវជ្រាវ និងជួសជុលឡើងវិញនូវប្រាសាទនៅតំបន់អង្គរយ៉ាងទូលំទូលាយ។ ដូច្នេះ លោកជឿជាក់ថា អ្នកជំនាញបុរាណវិទ្យា និងអ្នកជំនាញខាងវត្ថុបុរាណទាំងអស់នៅទីនេះ នឹងមានការស្រាវជ្រាវ និងការរកឃើញស៊ីជម្រៅបន្ថែមទៀត។
ប្រទេសចិនគឺជាប្រទេសមួយក្នុងចំណោមប្រទេសដំបូងគេ ដែលបានចូលរួមក្នុងសកម្មភាពអន្តរជាតិលើការការពារប្រាង្គប្រាសាទនៅតំបន់អង្គរ។ ចាប់តាំងពីឆ្នាំ ១៩៩៨ មកប្រទេសចិនបានចាត់ចែងក្រុមជំនាញបុរាណវិទ្យា ដើម្បីចូលរួមជាបន្តបន្ទាប់ក្នុងការជួសជុលប្រាសាទចៅសាយទេវតា និងប្រាសាទតាកែវ ហើយឥឡូវនេះ កំពុងតែជួសជុលប្រាសាទភិមានអាកាស។ លើសពីនេះ ប្រទេសចិនក៏ជាសហប្រធានគណ:កម្មាធិការសម្របសម្រួលអន្តរជាតិនៃការអភិរក្ស និងអភិវឌ្ឍន៍ប្រាសាទព្រះវិហារផងដែរ ដែលនេះសម្គាល់ឲ្យឃើញថា ប្រទេសចិនបានក្លាយជាអ្នកចូលរួមដ៏សំខាន់ក្នុងការការពារបេតិកភណ្ឌវប្បធម៌កម្ពុជា។ ជាងនេះទៅទៀត ដើម្បីការពារបូជនីយដ្ឋានអង្គរឱ្យកាន់តែទូលំទូលាយប្រទេសចិនបានឆ្លើយតបទៅនឹងការអំពាវនាវរបស់អង្គការយូណេស្កូ និងរាជរដ្ឋាភិបាលកម្ពុជា បានសាងសង់អាកាសយានដ្ឋានអន្តរជាតិសៀមរាប អង្គរដ៏ទំនើប ដែលត្រូវបានសាងសង់ដោយក្រុមហ៊ុនរដ្ឋធំៗចំនួនបីរបស់ខេត្តយូណានប្រទេសចិន ដោយមានទុនវិនិយោគចំនួន ១,១០០លានដុល្លារអាមេរិក ហើយគ្រោងនឹងដាក់ឱ្យប្រើប្រាស់ជាផ្លូវការនៅក្នុងខែតុលាឆ្នាំនេះផងដែរ។
លោកប្រធានការិយាល័យកុងស៊ុលចិនប្រចាំខេត្តសៀមរាប បានជឿជាក់ថា ក្រោមការខិតខំប្រឹងប្រែងរួមគ្នារបស់ប្រទេសចិន និងកម្ពុជា និងក្រោមការណែនាំនៃគំនិតផ្តួចផ្តើមដ៏ធំនៃ”ខ្សែក្រវាត់និងផ្លូវ” រួមអ្នកសាង សហគមន៍ជោគវាសនារួមចិន និងកម្ពុជា នឹងផ្តល់ផលប្រយោជន៍ដ៏ជាក់ស្ដែងដល់ប្រជាជនទាំងពីរ ដើមឈើមិត្តភាពចិន -កម្ពុជានឹងកាន់តែមានភាពប្រណិត និងវិបុលភាព និងទទួលបានផ្លែផ្កាកាន់តែច្រើនកុះករ៕
អត្ថបទ និងរូបភាព: មន្ត្រីព័ត៌មានទូរទស្សន៍ជាតិ នៃមន្ទីរព័ត៌មានខេត្តសៀមរាប!!!
