អគ្គលេខាធិការកាកបាទក្រហមកម្ពុជា លោកជំទាវ ពុំ ចន្ទីនី បានជំរុញដល់គណៈកម្មការសាខាខេត្តសៀមរាប ដែលទើបទទួលបានការតែងតាំងថ្មី ត្រូវបន្តពង្រឹង ពង្រីកសមាជិកភាព ផ្តួចផ្តើមរៀបចំយុទ្ធនាការកៀរគររកមូលនិធិ និងបន្តអនុវត្តយុទ្ធសាស្ត្រ ២០២១-២០៣០ របស់កាកបាទក្រហមកម្ពុជា ឲ្យបានកាន់តែល្អប្រសើរឡើងបន្ថែមទៀត។
ថ្លែងក្នុងពិធីប្រកាសទទួលស្គាល់គណៈកម្មាធិការសាខាកាកបាទក្រហមកម្ពុជា ខេត្តសៀមរាប អាណត្តិទី៥ នាព្រឹកថ្ងៃទី០៥ ខែកញ្ញា ឆ្នាំ២០២៣នេះលោកជំទាវ ពុំ ចន្ទីនី បានលើកឡើងថា នៅអាណត្តិទី៥នេះ សាខាកាកបាទក្រហមកម្ពុជា ទាំង២៥ បានលើកកម្ពស់ភាពម្ចាស់ការស្ទើរទាំងស្រុង លើការងាររកមូលនិធិ ការងារអភិបាលកិច្ច និងគ្រប់គ្រង។ ទោះបីជាវីរុសកូវីដ-១៩ បានបន្តបញ្ចេញឥទ្ធិពលយ៉ាងខ្លាំងក្លាក៏ដោយ ក៏សាខាកាកបាទក្រហមកម្ពុជា ដៃម្ខាងឆ្លើយតបបានទាំងការជួយជនរងគ្រោះ និងងាយរងគ្រោះ ដៃម្ខាងទៀត “រួមទទួលខុសត្រូវទប់ស្កាត់ការចម្លងវីរុសកូវីដ-១៩“ យ៉ាងសកម្ម។ លោកជំទាវបន្តថា ជោគជ័យដែលសាខា-អនុសាខា សម្រេចបាន បានឆ្លុះបញ្ចាំងពីភាពជាអ្នកដឹកនាំ ប្រកបដោយគតិបណ្ឌិតរបស់ សម្ដេចកិត្តិព្រឹទ្ធបណ្ឌិតប្រធាន ដែលបានសម្រេចយកឯកឧត្តម អភិបាលខេត្តជាប្រធានគណៈកម្មាធិការសាខា។
យោងតាមរបាយការណ៍របស់សាខាកាកបាទក្រហមកម្ពុជា ខេត្តសៀមរាប បានឲ្យដឹងថា នៅក្នុងអាណត្តិរបស់ ឯកឧត្តម ទៀ សីហា និង លោកជំទាវ ដែលបានដឹកនាំ សាខាកាកបាទក្រហមកម្ពុជា ខេត្តសៀមរាប សម្រេចបាននូវសមទ្ធិផលធំៗជាច្រើននៅក្នុងអាណត្តិទី៥ ចាប់តាំងពីឆ្នាំ ២០១៩-២០២៣ តាមវិស័យអាទិភាពទាំង៤ ជាពិសេសបានពុះពារដឹកនាំក្រុមប្រតិបត្តិ អ្នកស្ម័គ្រចិត្ត យុវជន កក្រក ដោយសហការជាមួយអាជ្ញាធរមូលដ្ឋាន សម្រេចបានជោគជ័យក្នុងការទប់ស្កាត់ជំងឺកូវីដ-១៩ និង បានផ្ដល់អំណោយតាមខ្នងផ្ទះក្នុងតំបន់បិទខ្ទប់ ចំនួន ៧,២៦៦គ្រួសារ។ បានផ្តល់ផ្ទះមនុស្សធម៌ដល់ គ្រួសារងាយរងគ្រោះបំផុត១៨ខ្នង ផ្តល់អំណោយមនុស្សធម៌ ដល់គ្រួសារងគ្រោះ និងងាយរងគ្រោះ ចំនួន ២៣,០៤០គ្រួសារ រកមូលនិធិបានសរុប២,៥៦៦,១៩៥ដុល្លារ និង៣៤៧,៦៧៤,៨០០រៀល ឧបត្ថម្ភដល់មន្ទីរពេទ្យគន្ធបុប្ផា និងមន្ទីរពេទ្យកុមារអង្គរ គិតជាថវិកាចំនួន១២ម៉ឺនដុល្លារ និងឧបត្ថម្ភដល់ មន្ទីរពេទ្យបង្អែកខេត្តសៀមរាប គិតជាថវិកាចំនួន៣ម៉ឺនដុល្លារ។
ឯកឧត្តម ប្រាក់ សោភ័ណ ប្រធានគណៈកម្មការសាខាកាកបាទក្រហមកម្ពុជាខេត្តសៀមរាប ដែលទើបតែងតាំងថ្មី បានមានប្រសាសន៍ដោយប្តេជ្ញាចិត្តថា នៅក្នុងការទទួលភារកិច្ចភារកិច្ចដ៏ថ្លៃថ្លាជាប្រធានគណៈកម្មាធិការសាខា ឯកឧត្តមសន្យាខិតខំប្រឹងប្រែង ចារណា រិះរកនូវវិធីសាស្ត្រថ្មីៗថែមទៀត រួមជាមួយក្រុមប្រតិបត្តិសាខា ដើម្បីជំរុញការងារនៃវិស័យអាទិភាពទាំង៤ ក្នុងគោលដៅយុទ្ធសាស្ត្រ ២០២១-២០៣០ របស់កាកបាទក្រហមកម្ពុជា បំពេញបេសកកម្មមនុស្សធម៌ដ៏ឧត្ដុង្គឧត្តម នះ ឱ្យសម្រេចជោគជ័យ៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
