នៅរសៀលថ្ងៃទី៥ ខែកញ្ញា ឆ្នាំ២០២៣នេះ ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានអញ្ជើញជាអធិបតីក្នុងពិធីប្រកាសចូលកាន់មុខតំណែង ឯកឧត្តម ប្រាក់ សោភ័ណ ជាអភិបាល នៃគណៈអភិបាលខេត្តសៀមរាប ថ្មី ជំនួស ឯកឧត្តម ទៀ សីហា ដែលត្រូវបានផ្លាស់ប្តូរតួនាទីថ្មី។ ពិធីនេះក៏មានការចូលរួមពីសំណាងប្រតិភូក្រសួងមហាផ្ទៃ ឯកឧត្តម លោកជំទាវ ជាប្រធាន និងសមាជិកក្រុុមប្រឹក្សាខេត្ត លោកលោកស្រីអភិបាលរងខេត្ត ថ្នាក់ដឹកនាំមន្ទីរអង្គភាពជុំវិញខេត្ត កងកម្លាំងប្រដាប់អាវុធ និងក្រុមប្រឹក្សាឃុំសង្កាត់ និងមន្ត្រីជាការក្នុងខេត្តជាច្រើនរូប ។
មានប្រសាសន៍ក្នុងឱកាសនោះ ឯកឧត្តម អភិសន្តិបណ្ឌិត ស សុខា បានគូសបញ្ជាក់ថា តាមច្បាប់ក្រឹត្យក្រមរបស់មន្ត្រីរាជការគ្រប់រូបជាគណៈអភិបាលខេត្ត ស្រុក ដែលបានបម្រើការងារគ្រប់អាណត្តិរបស់ខ្លួន ឬ ក៏បានគ្រប់អាយុបំពេញការងារ គឺត្រូវចូលនិវត្តន៍ មិនថាថ្នាក់ដឹកនាំ មន្ត្រី បុគ្គលិកឡើយ។ ហើយចំពោះការប្រកាសចូលកាន់តំណែងជាអភិបាលខេត្តនេះ ក៏មានការជឿជាក់យ៉ាងច្បាស់ពីរាជរដ្ឋាភិបាល ក្រសួងមហាផ្ទៃ ចំពោះមន្ត្រី ថ្នាក់ដឹកនាំនៅរដ្ឋបាលថ្នាក់ក្រោមជាតិ ដែលជាការលើកទឹកចិត្តដល់មន្ត្រីឲ្យបន្តខិតខំបំពេញភារកិច្ច ក្នុងការបម្រើជាតិមាតុភូមិ ។ ជាមួយគ្នានោះដែរ ឯកឧត្តម អភិសន្តិបណ្ឌិត បានថ្លែងនូវការកោតសរសើរនូវសមទ្ធិផលរបស់ខេត្តសៀមរាប ក្រោមការដឹកនាំរបស់ ឯកឧត្តម ទៀ សីហា កន្លងមក ដែលបានធ្វើឲ្យខេត្តទេសចរណ៍មួយនេះ មានការប្រែមុខមាតថ្មី ហើយសមទ្ធិផលទាំងនេះ ក៏កើតឡើងពីសន្តិភាព ហើយក៏ជាសមទ្ធិផលទាំងនេះ ជាការពង្រឹងនូវសន្តិភាពនៅកម្ពុជា ។
ឯកឧត្តម រដ្ឋមន្ត្រី ក៏បានណែនាំដល់ អភិបាលខេត្តសៀមរាបថ្មី ដែលទើបប្រកាសចូលកាន់តំណែងនាពេលនេះ ធ្វើយ៉ាងណាត្រូវខិតខំប្រឹងប្រែងធ្វើការអភិវឌ្ឍន៍ខេត្ត ឲ្យមានការរីកចម្រើនបន្ថែមទៀត ពិសេសត្រូវយកចិត្តទុកដាក់ដល់សុខទុក្ខប្រជាពលរដ្ឋជាចំបង ហើយក៏ត្រូវចេះសាមគ្គីភាពផ្ទៃក្នុងជួរគណៈអភិបាលលើការដឹកនាំ គ្រប់គ្រងបណ្តាមន្ទីរ ស្ថាប័ន និងអង្គភាពក្នុងខេត្តឲ្យបានល្អ និងបង្កើនការពង្រឹងនូវរបៀបរបបការងាររដ្ឋបាលនៅក្នុងស្ថាប័ន ព្រមទាំងមានការទំនាក់ទំនងឲ្យបានល្អជាមួយមន្ទីរ ស្ថាប័ន អង្គភាព លើការងារសន្តិសុខ សណ្តាប់ធ្នាប់ សុវត្ថិភាពដល់ភ្ញៀវទេសចរណ៍ និងប្រជាជន ដោយខេត្តសៀមរាប ជាតំបន់គោលដៅនៃភ្ញៀវទេសចរណ៍លើពិភពលោក ចូលមកទស្សនាកំសាន្ត ត្រូវរួមសហការគ្នាបន្តពង្រឹងសមត្ថភាព និង គុណភាពទៅតាមមុខងារភារកិច្ច និងតួនាទីរបស់ខ្លួន ប្រកបដោយតម្លាភាព គណនេយ្យភាព និងយុត្តិធម៌។ ជាពិសេសត្រូវពង្រឹងនូវសមត្ថភាព និងគុណភាពនៃចំណេះដឹងដល់មន្ត្រីរាជការ ដោយធ្វើការបណ្តុះបណ្តាលផ្ទាល់នៅថ្នាក់មូលដ្ឋាន ក្នុងការងាយស្រួលដល់មន្ត្រីបំពេញការងាររដ្ឋបាលនៅមូលដ្ឋាន ។
ព័ត៌មានជាតិ ថ្មីៗ
ឯកឧត្តម អភិសន្តិបណ្ឌិត ក៏បានលើកទឹកចិត្តដល់រដ្ឋបាលខេត្ត ត្រូវដឹកនាំសម្របសម្រួលជាមួយមន្ទីរអង្គភាពពាក់ព័ន្ឋ ដើម្បីពន្លឿនការផ្ទេរសេវានានាដែលនៅសេសសល់មកឱ្យអង្គភាពច្រកចេញចូលតែមួយ និងលើកកម្ពស់ក្នុងការបណ្តុះបណ្តាលការកសាងសមត្ថភាពដល់មន្ត្រីបំពេញការងារនៅច្រកចេញចូលតែមួយឱ្យបំពេញភារកិច្ចបំរើប្រជាពលរដ្ឋប្រកបដោយប្រសិទ្ឋភាព តម្លាភាព មានក្រមសីលធម៌វិជ្ជាជីវៈខ្ពស់ និងយកចិត្តទុកដាក់ដោះស្រាយលើសំណើរ សំណូមពរ បណ្តឹង និងការទាមទារតវ៉ានានារបស់ប្រជាពលរដ្ឋ ដោយត្រូវចាត់តាំងមន្ត្រីសហការរៀបចំវេទិកាសាធារណៈជាមួយពួកគាត់។ ចៀសវាងមើលរំលងលើបញ្ហាតូចតាច ផ្ទុយទៅវិញបញ្ហាតិចតួចក៏វាក្លាយជាបញ្ហាធំបានដែរបើយើងមិនដោះស្រាយឱ្យទាន់ពេលវេលា៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
