ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឯកឧត្ដម អភិសន្តិបណ្ឌិត ស សុខា បានលើកឡើងថា បច្ចុប្បន្នប្រទេសនៅក្នុងពិភពលោកកំពុងតែមានការអភិវឌ្ឍន៍ជឿនលឿនផ្នែកបច្ចេកវិទ្យា។ ដូចនេះប្រទេសកម្ពុជា ក៏កំពុងតែធ្វើការអភិវឌ្ឍផ្នែកបច្ចេកវិទ្យានេះដែរ ដែលនៅថ្ងៃអនាគតយើងចង់ប្រែក្លាយប្រទេសកម្ពុជាទៅជាប្រទេសឌីជីថល ។
ថ្លែងក្នុងពីធីប្រកាសចូលកាន់មុខតំណែង ឯកឧត្តម ប្រាក់ សោភ័ណ ជាអភិបាល នៃគណៈអភិបាលខេត្តសៀមរាបថ្មី ជំនួសឯកឧត្តម ទៀ សីហា ដែលត្រូវបានផ្ទេរមុខតំណែង នៅរសៀលថ្ងៃទី៥ ខែកញ្ញានេះ ឯកឧត្ដមអភិសន្តិបណ្ឌិត ស សុខា បានមានប្រសាសន៍ថា ការប្រែក្លាយប្រទេសមួយឲ្យទៅជាប្រទេសឌីជីថល យើងត្រូវការប្រើកត្តា ២សំខាន់៖ ទី១.កត្តាសម្ភារៈ និងទី២.កត្តាធនធានមនុស្ស ឬបុគ្គល។ កត្តាទាំង២ នឹងផ្ដល់ឱកាសជាអាទិភាពសម្រាប់ជ្រើសរើសមន្ត្រីរាជការផ្នែកឌីជីថលនាពេលខាងមុខឆាប់ៗនេះ។
ជាមួយគ្នានេះ ឯកឧត្តម ក៏បានលើកឡើងផងដែរ អំពីការស្នើសុំទៅ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ក្នុងសម្របសម្រួលការផ្ទេរកម្មសិទ្ធិដីធ្លីពីឪពុកម្តាយមកកូនតាមប្រព័ន្ធឌីជីថល ដោយប្រើពេលយ៉ាងយូរ ៥នាទី ដោយមិនអស់ថវិកាអ្វីទាំងអស់។ ក្នុងនោះដែរ ឯកឧត្ដម អភិសន្តិបណ្ឌិត ក៏បានណែនាំដល់ ឯកឧត្តមអភិបាលខេត្តសៀមរាបថ្មី ត្រូវយកចិត្តទុកដាក់ក្នុងការដោះស្រាយនូវបញ្ហាដែលកើតមានឱ្យបានលឿន ដោយយកកត្តាឈ្នះៗទាំងអស់គ្នាជាគោលផងដែរ។
ព័ត៌មានជាតិ ថ្មីៗ
ឯកឧត្តម ប្រាក់ សោភ័ណ អភិបាលខេត្តសៀមរាប បានបង្ហាញការប្តេជ្ញា ខិតខំអស់កម្លាំងកាយចិត្ត ចំណេះដឹង និងបទពិសោធន៍ទាំងអស់ ដើម្បីចូលរួមចំណែកពង្រឹង និងពង្រីកសាមគ្គីផ្ទៃក្នុង បង្កើនកិច្ចសហប្រតិបត្តិការ និងសហការឱ្យបានល្អប្រសើរជាមួយថ្នាក់ដឹកនាំ នៃគណៈអភិបាលខេត្ត ក្រុមប្រឹក្សាខេត្ត ក្រសួងស្ថាប័នទាំងអស់ ដើម្បីរួមគ្នាកសាង និងអភិវឌ្ឍន៍ខេត្តសៀមរាបទាំងមូលឱ្យមានការរីកចម្រើនថែមទៀតសំដៅកាត់បន្ថយភាពក្រីក្រ៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
