សួនផ្កាពណ៌លឿងជាប់ជើងភ្នំគូលែន ឋិតនៅធិស័ក្ដិរីសត ស្រុកស្វាយលើ ខេត្ដសៀមរាប បាននឹងកំពុងទាក់ទាញអ្នកទេសចរទៅកំសាន្ដជារៀងរាល់ថ្ងៃ ខណៈដែលទីតាំងទេសចរនេះ ជុំវិញអបទៅដោយទេសភាពដ៍ស្រស់ត្រកាល់ និងទេសភាពភ្នំគូលែននៅក្បែរនោះទៀតផង។
អ្នកទេសចរដែលបានមកកំសាន្តនៅទីតាំងខាងលើនេះ បានលើកឡើងថា សួនផ្កាពណ៌លឿងជាប់ជើងភ្នំគូលែន ជុំវិញអបទៅដោយទេសភាពនៃភ្នំគូលែន ពណ៌ខៀវស្រស់បំព្រង អាចមើលឃើញទាំងសម្រស់បុប្ផា ទេសភាពព្រៃភ្នំ និងផ្ទាំងសិលាដែលផ្សាភ្ជាប់នឹងការថតរូបទុកជាអនុស្សាវរីយ៍។ ជាពិសេសទៅទៀត ការមកកំសាន្ដនៅទីនេះ បានធ្វើឱ្យអារម្មណ៍ពួកគាត់មានភាពស្រស់ថ្លា បំបាត់នូវភាពស្មុកស្មាញ និងទុក្ខកង្វល់ច្រើន។
ពួកគាត់លើកឡើងទៀតថា នៅសួនផ្កាពណ៌លឿងនៅធិស័ក្ដិរីសត មិនត្រឹមតែមានទេសភាពស្រស់បំព្រងប៉ុណ្ណោះទេ ថែមទាំងមានសួនផ្កាជាច្រើនទៀត ជាកន្លែងដើរកំសាន្ដ និងកន្លែងលំហែរកាយដ៍ប្រណិត ព្រោះបានបង្កើតនៅកន្លែងស្នាក់នៅជារីសតតង់ មានអាងហែលទឹក អាចជិះម៉ូតូធំ កង់កំសាន្ដតាមសួនច្បារ និងទៅទ្សនាប្រាសាទបុរាណដែលនៅក្បែនោះ។
ព័ត៌មានជាតិ ថ្មីៗ
បើតាមលោក យ៉ាត់ យ៉ា ជាអ្នកគ្រប់គ្រងធិស័ក្ដិរីសតជើងភ្នំគូលែន បានឲ្យដឹងថា សួនផ្កាធិស័ក្ដិរីសត មានសួនច្បារចម្រុះពណ៌នៅលើផ្ទៃដីប្រមាណ ៥ហិកតា ជាប់ជើងភ្នំគូលែនដែលជាតំបន់ទីក្រុងបុរាណ ហើយភ្ញៀវទេសចរក៏អាចឈៀងទៅកំសាន្ដបានច្រើនកន្លែង ដូចនៅប្រាសាទបឹងមាលា ប្រាសាទកោះកេរ ទឹកធ្លាក់ភ្នំគូលែនជាដើម ព្រោះតំបន់នោះមានផ្លូវធ្វើដំណើរខ្វាត់ខ្វែងហើយទិសដៅតែមួយ។ លោកថា សួនច្បារនៅធិស័ក្ដិរីសតជើងភ្នំគូលេន មានអ្នកទេសចរទៅកំសាន្ដគិតជាធម្យមពី ៣០០ទៅ ៤០០នាក់ក្នុងមួយថ្ងៃនៃថ្ងៃធម្មតា ប៉ុន្ដែសម្រាប់ថ្ងៃឈប់សម្រាក ឬថ្ងៃបុណ្យគឺមានអ្នកទេសចរទៅកំសាន្ដច្រើន។
អ្នកគ្រប់គ្រងរូបនេះ បានឱ្យដឹងទៀតថា ការបង្កើតនូវសួនផ្កាធិស័ក្ដិរីសត គឺបានជួយលើកស្ទួយវិស័យទេសចរ ទាំងការស្នាក់នៅ ការទស្សនាកំសាន្ដផ្ដល់ស្នាមញញឹមជាមួយគ្នា បង្កើតឱ្យកាសការងារដល់ប្រជាពលរដ្ឋនៅមូលដ្ឋាន តាមរយៈការផ្ដល់ការងារឱ្យពួកគាត់ធ្វើផងដែរ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
