ក្រសួងកិច្ចការនារី នៅព្រឹកថ្ងៃទី៦ ខែកញ្ញា ឆ្នាំ២០២៣នេះ បានបិទបញ្ចប់វគ្គបណ្តុះបណ្ដាលស្ដីពី ការពង្រឹងសមត្ថភាពបន្សាុំនឹងភាពធនរបស់ស្ត្រីក្រីក្រនៅតាមជនបទ តាមរយៈការលើកកម្ពស់ជីវភាពរស់នៅ និងការទទួលបានទឹកស្អាតប្រើប្រាស់ ក្រោមការគាំទ្រពីក្របខ័ណ្ឌមូលនិធិពិសេស នៃកិច្ចសហប្រតិបត្តិការមេគង្គ-ឡានឆាង ការបញ្ជ្រាបយេនឌ័រក្នុងសកម្មភាពអាកាសធាតុ។
ឯកឧត្តម ថេ ឈុនហាក់ អគ្គនាយក នៃអគ្គនាយកដ្ឋានសមភាពយេនឌ័រ និងអភិវឌ្ឍន៍សេដ្ឋកិច្ច នៃក្រសួងកិច្ចការនារី មានប្រសាសន៍ថា គម្រោងកិច្ចសហប្រតិបត្តការមេគង្គ-ឡានឆាង មានគោលដៅរួមចំណែកដោះស្រាយបញ្ហាប្រឈម និងបើកកាលានុវត្តភាពសម្រាប់ការពង្រឹងសមត្ថភាពបន្ស៊ាំ និងធន់ពីការប្រែប្រួលអាកាសធាតុរបស់ស្ត្រីក្រីក្រនៅជនបទ តាមរយៈសាកល្បងគំនិតផ្តួចផ្តើមថ្មីៗនៅក្នុងតំបន់មេគង្គ ឡានឆាង ព្រមទាំងចូលរួមដល់ការតភ្ជាប់គ្នានិងចែករំលែកមេរៀនបទពិសោធនៅក្នុងតំបន់។ បន្ទាប់ពីទទួលបានការឯកភាពក្នុងការចូលរួមពីបណ្តាប្រទេសដៃគូ ក្រុមការងារសម្របសម្រួលគម្រោងបានធ្វើការដោយផ្ទាល់ជាមួយប្រទេសទាំង៤ ដើម្បីជ្រើសរើសដៃគូ និងកម្មវិធីបណ្តុះបណ្តាលដោយផ្អែកតាមតម្រូវការ និងស្ថានភាពជាក់ស្តែងរបស់ប្រទេសនីមួយៗ ហើយកម្មវិធីបណ្តុះបណ្តាលជាស៊េរីទី២នេះ ជាកម្មវិធីអភិវឌ្ឍន៍សមត្ថភាពរបស់គម្រោង។
ឯកឧត្តម ថេ ឈុនហាក់ បន្ថែមថា បច្ចប្បន្ននេះក្រសួងកិច្ចការនារីកម្ពុជា កំពុងអនុវត្តគម្រោងចំនួន២ នៅក្រោមមូលនិធិពសេសនៃកិច្ចសហប្រតិបត្តិការមេគង្គ-ឡានឆាង គឺទី១.គម្រោងបញ្ជ្រាបយេនឌ័រក្នុងសកម្មភាពប្រែប្រួលអាកាសធាតុ (កម្ពុជា ឡាវ ថៃ) និងទី២.ការបង្កើនភាពអង់អាចផ្នែកសេដ្ឋកិច្ចក្នុងយុគសម័យឌីជីថល (កម្ពុជា វៀតណាម ថៃ) ហើយក៏បានដាក់គម្រោងពីរទៀត ពាក់ព័ន្ឋនឹងការអភិវឌ្ឍសេដ្ឋកិច្ចស្រី និងការប្រែប្រួលអាកាសធាតុ ដើម្បីទទួលបានការគាមត្រសម្រាប់ការអនុវត្តនៅឆ្នាំ២០២៤។ សម្រាប់គម្រោងស្តីពីការបញ្ជ្រាបយេនឌ័រក្នុងសកម្មភាពអាកាសធាតុ បានចាប់ផ្តើមអនុវត្តកាលពីខែមិថុនា ឆ្នាំ២០២៣ ដែលទទួលបានការឯកភាពចូលរួមអនុវត្តគម្រោងពីអ្នកឯកទេស និងដៃគូមកពីប្រទេសចិន កម្ពុជា ឡាវ និងថៃទៀតផង។
សូមជម្រាបថា វគ្គបណ្តុះបណ្ដាលស្ដីពី ការពង្រឹងសមត្ថភាពបន្សាុំនឹងភាពធនរបស់ស្ត្រីក្រីក្រនៅតាមជនបទ តាមរយៈការលើកកម្ពស់ជីវភាពរស់នៅ និងការទទួលបានទឹកស្អាតប្រើប្រាស់ មានសិក្ខាកាមចំនួន ៣៥រូប ស្រី៣៣រូប មកពីប្រទេសចំនួន៤ មានប្រទេស ចិន ឡាវ ថៃ ថ្នាក់ដឹកនាំ និងមន្រ្តីក្រសួងកិច្ចការនារីកម្ពុជា តំណាងក្រសួងការបរទេស និងសហប្រតិបត្តិការអន្តរជាតិ ក្រសួងអភិវឌ្ឍន៍ជនបទ ក្រសួងបរិស្ថាន មន្ទីរកិច្ចការនារី និងមជ្ឈមណ្ឌលអភិវឌ្ឍន៍ស្រ្តីនៃខេត្តស្ទឹងត្រែង ខេត្តបាត់ដំបង និងខេត្តកំពត។ វគ្គបណ្តុះបណ្ដាលនេះមានរយៈពេល៣ថ្ងៃ ចាប់ពីថ្ងៃទី៤-៦ ខែកញ្ញា ឆ្នាំ២០២៣ នៅសណ្ឋាគារមីរ៉ាខលខេត្តសៀមរាប។ វគ្គបណ្តុះបណ្ដាលនេះដែរ សិក្ខាកាមបានចែករំលែក និងផ្លាស់ប្តូរមេរៀនបទពិសោធ និងទំនាក់ទំនងក្នុងតំបន់ និងបានលើកការពិភាក្សា សំណូមពរទៅតាមលទ្ឋភាពប្រទេសនីមួយៗពាក់ព័ន្ឋទៅនឹងគម្រោងលើការងារយេនឌ័រ និងការប្រែប្រួលអាកាសធាតុព្រមទាំងរបៀបការរៀបចំគម្រោងយកមកផងដែរ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
