នារសៀលថ្ងៃទី០៥ ខែកញ្ញា ឆ្នាំ២០២៣ ឯកឧត្តម ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងលោកជំទាវ បានអញ្ជើញជាអធិបតីភាពក្នុងពិធីសំណេះសំណាលជាមួយមន្ត្រីប្រតិបត្តិសាខាកាកបាទក្រហមកម្ពុជា ចំនួន២១នាក់ និងយុវជនកាកបាទក្រហមកម្ពុជា ចំនួន១០០នាក់ នៅសាលប្រជុំសណ្ឋាគារ សោមាទេវី អង្គរ រីសត និងស្ប៉ា ក្រុងសៀមរាប។
មានប្រសាសន៍នាឱកាសនោះ លោកជំទាវ ទាង អេង ទៀសីហា អតីតអនុប្រធាន គណៈកម្មាធិការសាខាកាកបាទក្រហមកម្ពុជាខេត្តសៀមរាប បានបង្ហាញក្ដីសោមនស្សរីករាយ ដែលសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ផ្ដល់នូវទំនុកចិត្តឱ្យលោកជំទាវ ធ្វើជាអនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប រយៈពេល ៥ឆ្នាំកន្លងមកនេះ។ ហើយលោកជំទាវ ក៏មានក្ដីរីយរាយជាខ្លាំងដែលរួមធ្វើការងារមនុស្សធម៌ជាមួយក្រុមប្រតិត្តិសាខាកាកបាទក្រហមកម្ពុជាខេត្ត និងប្អូនៗយុវជនកាកបាទក្រហមកម្ពុជា ក្នុងរយៈពេលកន្លងមក។
ក្នុងឱកាសនោះដែរ ឯកឧត្តម ទៀ សីហា ឧបនាយករដ្ឋមន្ត្រី ក៏បានលើកឡើងពីកិច្ចខិតខំប្រឹងប្រែងក្នុងការជួយសម្រាលទុក្ខលំបាករបស់ប្អូនប្រជាពរដ្ឋរងគ្រោះ និងងាយរងគ្រោះ ពិសេសគណៈកិត្តិយស គណៈកម្មាធិការសាខា ក្រុមប្រតិបត្តិសាខា អនុសាខា អ្នកស្ម័គ្រចិត្ត និងយុវជនកាកបាទក្រហមកម្ពុជា ដែលអាចធើ្វសាខាមានដំណើរការល្អកំឡុងពេលដែល ឯកឧត្តមកាន់ជាប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប។ ឯកឧត្តមបន្តថា ការងារមនុស្សធម៌ជាសម្មភាពដ៏ល្អប្រពៃ ដូចនេះសូមឲ្យក្រុមប្រតិបត្តិសាខា និងប្អូនៗយុវជនកាកបាទក្រហមកម្ពុជាទាំងអស់ បន្តសកម្មភាពនេះជារៀងរហូត ដើម្បីបានជាប្រយោជន៍ជួយដល់សហគមន៍ និងសង្គមជាតិទាំងមូល ហើយថ្វីត្បិតតែឯកឧត្តមត្រូវផ្លាស់ប្ដូរភារកិច្ចថ្មីក្ដី តែឯកឧត្តម ក៏នឹងនៅបន្តចុះជួយមូលដ្ឋានខេត្តសៀមរាប ជាបន្តទៀត។
សូមជម្រាបថា ក្នុងឱកាសនោះដែរ ដើម្បីជាការលើកទឹកចិត្តចំពោះមន្ត្រីប្រតិបត្តិសាខា លោកគ្រូ អ្នកគ្រួទីប្រឹក្សា និងប្អូនៗយុវជនកាកបាទក្រហមកម្ពុជា ឯកឧត្តមរដ្ឋមន្ត្រី ក៏បានប្រគល់ជូននូវប័ណ្ណ និងលិខិតសរសើរ សម្រាប់គណៈកិត្កិយស គណៈកម្មាធិការសាខា មន្ត្រីប្រតិបត្តិសាខា លោកគ្រូ អ្នកគ្រូទីប្រឹក្សា ដែលបានចូលរួមក្នុងពិធីនេះ ព្រមទាំងឧត្ថម្ភនូវថវិកាមួយចំនួនផងដែរ៕
អត្ថបទ និងរូបភាព៖ សាខាកាកបាទក្រហមខេត្ត
កែសម្រួល៖ លោក អ៊ុន ណារាជ្យ
