លោកស្រី ម៉ននី រង្សី អភិបាលរងខេត្ត មានប្រសាសន៍ថា លោកគ្រូអ្នកគ្រូ ត្រូវយកចិត្តទុកដាក់អភិវឌ្ឍលើវិជ្ជាជីវៈគ្រូបង្រៀនទាំង៤ គឺចំណេះដឹង វិជ្ជាជីវៈ ការប្រតិបត្តិវិជ្ជាជីវៈ ការសិក្សាវិជ្ជាជីវៈ និង សីលធម៌វិជ្ជាជីវៈ ដើម្បីឱ្យមានគុណវុឌ្ឍិ ប្រដុំត្រសងទៅនឹងបុគ្គលិកអប់រំ នៃប្រទេសក្នុងតំបន់ និង ដើម្បីផលប្រយោជន៍របស់កុមារ ដែលពួកគេនឹងក្លាយទៅជាពលរដ្ឋល្អ ដែលមានចំណេះដឹងទូទៅ ទូលំទូលាយ មានជំនាញច្បាស់លាស់ មានឥរិយាបទថ្លៃថ្នូរ ចេះរួមរស់ជាមួយអ្នកដទៃប្រកបដោយសុខដុមរមនា ។
លោកស្រី ម៉ននី រង្សី មានប្រសាសន៍យ៉ាងដូច្នេះក្នុងឱកាសអញ្ជើញជាអធិបតីក្នុងពិធីបិទវគ្គវគ្គបណ្ដុះបណ្ដាលនិយាមគរុកោសល្យ គ្រូបឋមសិក្សា ១២+២ជំនាន់ទី៣៩ សរុបចំនួន១៣៦នាក់ ក្នុងនោះមកពីខេត្តសៀមរាបចំនួន៩២នាក់ និង ខេត្តឧត្តរមានជ័យចំនួន៤៤នាក់ នៅសាលគរុកោសល្យនិងវិក្រិតការខេត្តសៀមរាប នាថ្ងៃទី០៧ ខែកញ្ញា ឆ្នាំ២០២៣នេះ ។
លោកស្រី ម៉ននី រង្សី ក៏បានសម្ដែងនូវការកោតសរសើរចំពោះថ្នាក់ដឹកនាំក្រសួង មន្ទីរអប់រំ យុវជន និងកីឡាខេត្ត ពិសេសគណៈគ្រប់គ្រង បុគ្គលិក គ្រូឧទ្ទេសទាំងអស់នៅសាលាគរុកោសល្យ និងវិក្រឹតការខេត្ត ដែលបានយកចិត្ត ទុកដាក់ខ្ពស់ ក្នុងការបណ្ដុះបណ្ដាល គ្រូបឋមសិក្សា ជាច្រើនជំនាន់ និងជាច្រើននាក់កន្លង មកឱ្យទទួលបានលទ្ធផលជោគជ័យល្អប្រសើរគួរជាទីពេញចិត្ត ព្រមទាំងបានជំរុញដល់លោកគ្រូអ្នកគ្រូទាំង១៣៦នាក់ ត្រូវខិតខំប្រឹងប្រែងយកចិត្ត ទុកដាក់បន្តអភិវឌ្ឍគុណវុឌ្ឍិ និងអភិវឌ្ឍវិជ្ជាជីវៈជាប្រចាំដើម្បីឆ្លើយតបទៅនឹងយុទ្ធសាស្រ្តកំណែទម្រង់វិស័យ អប់រំ ព្រមទាំងលើកកម្ពស់ឱកាសសិក្សាពេញមួយជីវិតសម្រាប់ទាំងអស់គ្នា និង ត្រូវបន្តអនុវត្តការអប់រំបែបឌីជីថលសម្រាប់បណ្ដុះបណ្ដាលធនធានមនុស្ស ក្នុងបរិការណ៍សង្គមសេដ្ឋកិច្ច ឌីជីថល។
លោកស្រីអភិបាលរងខេត្ត បន្តថា ក្នុងនាមយើងជាគ្រូបង្រៀនក៏ត្រូវយកចិត្តទុកដាក់ណែនាំជាប្រចាំដល់សិស្សានុសិស្សអំពីសុវត្ថិភាពចំណីអាហារ ពីការគោរពច្បាប់ចរាចរណ៍ ការជៀសផុតពីគ្រឿងញៀន ការអប់រំសីលធម៌ ផ្តល់ឱវាទដល់សិស្សឱ្យមានឥរិយាបទនិងអាកប្បកិរិយាសមរម្យ ចេះ គោរពឱនលំទោនចាស់ព្រឹទ្ធាចារ្យ ថ្នាក់ដឹកនាំ លោកគ្រូអ្នកគ្រូជាដើម។ល។ព្រោះវិស័យអប់រំដើរតួនាទីយ៉ាង សំខាន់ក្នុងការកសាងសមត្ថភាព និងការអភិវឌ្ឍធនធានមនុស្ស ពោលគឺ ជួយជំរុញការអភិវឌ្ឍន៍ធនធានមនុស្សលើគ្រប់វិស័យប្រកបដោយគុណភាព និងមានតុល្យភាពរវាង វិជ្ជាសម្បទា បំណិនសម្បទា ចរិយាសម្បទា កាយសម្បទា និងមនសិការស្នេហាជាតិ មនុស្សជាតិ ៕
អត្ថបទ និងរូបភាព៖ លោក យូ វង្ស
កែសម្រួលអត្ថបទ ៖ លោក លីវ សាន្ត
