នៅរសៀលថ្ងៃទី៦ ខែកញ្ញា ឆ្នាំ២០២៣ ឯកឧត្តម ឡឹក សុធារ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងមន្ត្រីជំនាញនៃនាយកដ្ឋានដំណាំស្រូវ បាននាំយកម៉ាស៊ីនស្ទូងស្រូវចំនួន ១០គ្រឿង ជាអំណោយដ៍ថ្លៃថ្លារបស់សម្តេចតេជោ ហ៊ុន សែន ជូនសហគមន៍ផលិតស្រូវពូជចំនួន១០ ក្នុងខេត្តសៀមរាប ដើម្បីជួយជំរុញផលិតកម្មស្រូវក្នុងខេត្តកសិកម្មមួយនេះ ឱ្យកាន់តែមានគុណភាពល្អ ទទួលបានទិន្នផលខ្ពស់សមស្រប តាមតម្រូវការទីផ្សារនាំអង្ករចេញរបស់កម្ពុជា។
ឯកឧត្តម ឡឹក សុធារ បង្ហាញថា ម៉ាស៊ីនស្ទូងស្រូវខ្នាតតូចនេះ នឹងប្រគល់ជូនសហគមន៍កសិកម្មនៅស្រុកជីក្រែង ៦គ្រឿង ស្រុកសូទ្រនិគម១គ្រឿង ស្រុកប្រាសាទបាគង២គ្រឿង និងស្ថានីយ៍ពិសោធន៍ទឹកវិលចំនួន ១គ្រឿង។ ឯកឧត្តម បន្ថែមថា ម៉ាស៊ីនស្ទូងស្រូវសរុបចំនួន ១០០គ្រឿង ដែលជាអំណោយរបស់សម្ដេចតេជោ ហ៊ុន សែន តាមរយៈក្រសួងកសិកម្ម រុក្ខាប្រមាញ់ និងនេសាទ នឹងត្រូវយកទៅប្រគល់ជូនសហគមន៍ផលិតស្រូវ នៃបណ្តាខេត្តជុំវិញបឹងទន្លេសាប។ម៉ាស៊ីននេះ មានសមត្ថភាពជួយកសិករ ក្នុងការផលិតពូជស្រូវប្រកបដោយគុណភាពខ្ពស់ កាត់បន្ថយការប្រើកម្លាំងពលកម្ម ប្រើពូជតិច ពន្លឿនការស្ទូង និងត្រង់ជួរល្អ។
ក្រៅពី អំណោយដ៏ថ្លៃថ្លារបស់សម្ដេចតេជោនាពេលនេះ ឯកឧត្តម អនុរដ្ឋលេខាធិការ ក៏បានដឹកនាំក្រុមនិស្សិតស្ម័គ្រចិត្តចំនួន ១០នាក់ ចុះផ្ដល់ព័ត៌មាន ពន្យល់ និងតាមដានទៅលើការដាំដុះ របស់ប្រជាកសិករ ជាពិសេសដំណាំស្រូវស្ថិតនៅឃុំចំនួន ១៣ នៃស្រុកចំនួន៤ជាប់បឹងទន្លេសាប ក្នុងខេត្តសៀមរាប។ ក្រុមនិស្សិតជំនាញកសិកម្មទាំង ១០រូបនេះ នឹងចុះធ្វើការកម្មសិក្សា ក៏ដូចជាអនុវត្តន៍ជាក់ស្ដែងជាមួយកសិករ ក្នុងកម្រិតសាកល្បងរយៈពេល ១ឆ្នាំ។
គួរជម្រាបថា តាមរយៈគោលនយោបាយរបស់រាជរដ្ឋាភិបាលនៅអាណត្តិទី៧នេះ ក្រសួងកសិកម្ម រុក្ខាប្រមាញ់ និងនេសាទ នឹងដាក់ពង្រាយនិស្សិតស្ម័គ្រចិត្តជំនាញកសិកម្មសរុបចំនួន ១៦០០នាក់ នៅតាមបណ្ដាឃុំទូទាំងប្រទេស ដើម្បីជួយលើកកម្ពស់ចំណេះដឹងលើវិស័យកម្មដល់ប្រជាពលរដ្ឋ សំដៅជួយដល់ការផលិតមានគុណភាពល្អ ចំណាយថ្លៃដើមទាប ស្របតាមគោលនយោបាយរបស់រាជរដ្ឋាភិបាល ក្នុងការជួយវិស័យកសិកម្មនៅកម្ពុជាឱ្យមានសន្ទុះកើនឡើង។
អត្ថបទ និងរូបភាព៖ លោក យូ វង្ស
កែសម្រួលអត្ថបទ ៖ លោក សេង ផល្លី
