ប្រតិបត្តិករទេសចរណ៍រំពឹងថា ព្រលានយន្តហោះថ្មីក្នុងទឹកដីខេត្តសៀមរាប ដែលនឹងបើកដំណើរការនាពេលឆាប់ៗខាងមុខនេះ នឹងជួយជំរុញកំណើនសេដ្ឋកិច្ចកម្ពុជា ជាពិសេសវិស័យទេសចរណ៍របស់ខេត្តសៀមរាបផ្ទាល់តែម្តង។
លោក ឌុក ដេត ម្ចាស់ភោជនីយដ្ឋានសួនមេអំបៅ ក្នុងស្រុកប្រាសាទបាគង នៅថ្ងៃទិ៨ ខែកញ្ញា ឆ្នាំ២០២៣នេះ បានឲ្យដឹងថា ក្នុងនាមលោកជាប្រតិបត្តិករលើផ្នែកទេសចរណ៍ម្នាក់ លោកមានអារម្មណ៍រំភើប ចំពោះការបើកដំណើរការនូវព្រលានយន្តហោះថ្មី ខ្នាតធំ ហើយទំនើប នៅលើទឹកដីខេត្តសៀមរាប ។
ចំនែកក្រុមអាជីវករលក់វត្ថុអនុស្សាវរីយ៍ នៅផ្សារផលិតផលកម្ពុជា បានលើកឡើងថា បច្ចុប្បន្នចំនួនអ្នកទេសចរបរទេសមកកម្សាន្ត នៅខេត្តសៀមរាប មានតិចតួចនៅឡើយ ដូច្នេះនៅពេលព្រលានយន្តហោះថ្មីបើកដំណើរការ គេរំពឹងថា នឹងមានភ្ញៀវបរទេសមកច្រើន។ ហើយនៅពេលលានយន្តហោះថ្មីដំណើរការ វាប្រាកដណាស់ថា នឹងជំរុញសេដ្ឋកិច្ចជាតិ ជាពិសេសខេត្តសៀមរាប មានការរីកចំរើន។
យោងតាមរបាយការណ៍របស់គ្រឹះស្ថានអង្គរ ចំនួនអ្នកទេសចរបរទេសដែលបានទិញសំបុត្រចូលទស្សនារមណីយដ្ឋានអង្គរ មានការកើនឡើងជាពិសេសក្នុងរយៈពេល ៣ខែចុងក្រោយនេះ គឺខែមិថុនា លក់សំបុត្របាន ៤១.០១២នាក់ ក្នុងនោះខែកក្កដា បាន៥៣.៥៩៦នាក់ និងខែសីហា បាន៥៩.១៤៨នាក់។ យោងតាមគ្រឹះស្ថានអង្គរដដែល គិតចាប់តាំងពីថ្ងៃទី០១ ខែមករា ឆ្នាំ២០២៣ មកដល់ថ្ងៃទី០៨ ខែកញ្ញានេះ មានអ្នកទេសចបរទេសទិញសំបុត្រចូលទស្សនារមណីយដ្ឋានអង្គរបានចំនួន ៥២២.៣០៥នាក់៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
