ប្រាសាទភ្នំបាខែង ជាទីតាំងដែលអ្នកទេសចរនិយមទស្សនាថ្ងៃរះ និងថ្ងៃរៀបលិច ព្រមទាំងផ្តល់ជូនភ្ញៀវទេសចរនូវបទពិសោធន៍ថ្មីៗ ក្រៅពីនោះប្រាសាទភ្នំបាខែង ក៏កំពុងក្លាយជាទីកន្លែងថ្មី ដែលពេញនិយមសម្រាប់អ្នកដើរលំហាត់ប្រាណថែមទៀតផង។
កញ្ញា ឃាង សុខេង ជាភ្នាក់ងារទេសចរណ៍ប្រចាំប្រាសាទភ្នំបាខែង បានឲ្យដឹងនៅថ្ងៃទី១៤ ខែកញ្ញានេះថា បច្ចុប្បន្នជំរាលផ្លូវដើរឡើងប្រាសាទភ្នំបាខែង ជារៀងរាល់ពេលព្រឹក និងពេលល្ងាចកំពុងក្លាយជាទីកន្លែងសម្រាប់ប្រជាពលរដ្ឋដើរហាត់ប្រាណ ខណៈដែលទីតាំងនេះ ត្រូវបានអាជ្ញាធរជាតិអប្សរា រៀបចំផ្លូវឡើងបានយ៉ាងល្អប្រណិត ដែលពួកគាត់អាចដើរប្រហែលមួយគីឡូម៉ែត្រពីជើងភ្នំរហូតដល់លើប្រាសាទ និងមានផ្លូវដំរីមួយទៀត ក៍អាចដើរហាត់ប្រាណបានផងដែរ។
ភ្នាក់ងារទេសចរណ៍ខាងលើបន្ដថា ប្រាសាទភ្នំបាខែង មិនត្រឹមតែមានកន្លែងស្រូបយកខ្សល់អាកាសបានប៉ុណ្ណោះទេ ថែមទាំងអ្នកទេសចរអាចមើលថ្ងៃរះ ថ្ងៃលិច មើលទេសភាដ៍ត្រកាលនៅជុំវិញប្រាសាទ ជាពិសេសពួកគាត់អាចមើលឃើញទេសភាពព្រៃឈើនៅតំបន់អង្គរដ៍ស្រស់បំព្រង។ជាមួយគ្នានោះការធ្វើដើរហាត់ប្រាណរបស់ប្រជាពលរដ្ឋនៅប្រាសាទភ្នំបាខែង បានកើតឡើងយូរហើយ ប៉ុន្ដែប្រជាពលរដ្ឋខ្លះមិនទាន់ដឹង។
ព័ត៌មានជាតិ ថ្មីៗ
សូមបញ្ជាក់ថា កាលពីពេលថ្មីៗនេះ អាជ្ញាធរជាតិអប្សរា រៀបចំកែលម្អបរិស្ថាននៅជុំវិញប្រាសាទ ដើម្បីលើកកម្ពស់សោភ័ណភាពដូចជា ការលះមែកឈើខ្លះៗ រៀបចំផ្លូវដើរជុំវិញប្រាសាទឱ្យស្អាត ដាក់ស្លាកសញ្ញាបង្ហាញទិស ដាក់បង្គោលខ្សែការពារកន្លែងមានហានិភ័យ ដើម្បីការពារសុវត្ថិភាពអ្នកទេសចរទាំងឡាយ។ ជាមួយគ្នានេះដែរ អាជ្ញាធរជាតិអប្សរា ក៏សំណូមពរដល់ភ្ញៀវទេសចរ ឬមគ្គទេសក៍ទេសចរណ៍ឱ្យនាំភ្ញៀវដើរទស្សនាតាមទិសដៅដែលបានរៀបចំ ដើម្បីឱ្យពួកគាត់បានឃើញនូវអ្វីដែលថ្មីៗ និងមានភាពស្រស់ស្អាតទាំងនោះផង៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
