នៅសណ្ឋាគារអង្គរមីរ៉ាខលខេត្តសៀមរាប ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍កម្ពុជា នាថ្ងៃទី១៥ ខែកញ្ញា ឆ្នាំ២០២៣នេះ បានសហការជាមួយទីភ្នាក់ងារសហប្រតិបត្តិការអន្តរជាតិអាល្លឺម៉ង់ (GIZ) អង្គការសហប្រជាជាតិដើម្បីអភិវឌ្ឍន៍ឧស្សាហកម្ម (UNIDO) សមាគមសហគ្រិនវ័យក្មេង និងសមាគមសហគ្រិនស្ត្រីកម្ពុជា រៀបចំសិក្ខាសាលាស្តីពី “ការផ្សព្វផ្សាយគេហទំព័រ ASEAN Acces និង KhmerSME ” ជូនដល់មន្ត្រីជំនាញពាក់ព័ន្ធនៅមូលដ្ឋាន នឹងយកផ្សព្វផ្សាយបន្តទៅដល់ម្ចាស់អាជីវកម្មសហគ្រាសធុនតូច និងមធ្យម នៅខេត្តគោលដៅរួមមាន៖ ខេត្តសៀមរាប កំពង់ធំ កំពង់ចាម និងឧត្តរមានជ័យ ។
ឯកឧត្តម ឈា ឡាយហ៊ី ទីប្រឹក្សាក្រសួង និងជាប្រធាននាយកដ្ឋានសហគ្រាសធុនតូចនិងមធ្យមនៃក្រសួង វិទ្យាសាស្ត្រ បច្ចេកវិទ្យា និងនវានុវត្តន៍ មានប្រសាសន៍ថា សិក្ខាសាលានេះ ធ្វើឡើងក្នុងគោលបំណង៖ ទី១.ដើម្បីផ្សព្វផ្សាយអំពីអំពីអត្ថប្រយោជន៍ និងដំណើរការចុះឈ្មោះជាមួគេហទំព័រ Access និងគេហទំព័រ KhmerSME ,ទី២.ដើម្បីបង្កើនចំនួនអ្នកផ្តល់សេវា និងអ្នកប្រើប្រាស់ធម្មតាដែលបានចុះឈ្មោះជាមួយគេហទំព័រទាំងពីរ, ទី៣.ដើម្បីបង្កើនការយល់ដឹងអំពីការចុះបញ្ជីអាជីវកម្មតាមប្រព័ន្ធឌីជីថលទៅដល់សហគ្រាសធុនតូច និងមធ្យម ,ទី៤.ដើម្បីបង្កើនផលិតភាពសហគ្រាសធុនតូច និងមធ្យម តាមរយៈភាពជាដៃគូសាធារណៈ និងឯកជន សម្រាប់ការអភិវឌ្ឍជំនាញរបស់បុគ្គលិកសហគ្រាសធុនតូច និងមធ្យម និងទី៥.ដើម្បីលើកកម្ពស់ការយល់ដឹងអំពីសហគ្រាសធុនតូច និងមធ្យម និងការចូលរួមក្នុងការបណ្តុះបណ្តាលអប់រំវិជ្ជាជីវៈ ជាពិសេសនៅក្នុងសាលារៀន និងបង្កើតឱកាសបណ្តុះបណ្តាលបែបតម្រង់ទិស។
ឯកឧត្តមបញ្ជាក់ថា រាជរដ្ឋាភិបាលនីតិកាលថ្មី បានយកចិត្តទុកដាក់យ៉ាងខ្លាំងទៅលើសេដ្ឋកិច្ចក្រៅប្រព័ន្ធ ជាគោលដៅអាទិភាពខ្ពស់បំផុត។ ក្នុង គោលដៅនេះ រាជរដ្ឋាភិបាលបាននឹងកំពុងរៀបចំ យុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធ ឆ្នាំ២០២៣-២០២៨ ដែលនឹងត្រូវឱ្យអនុវត្តក្នុងពេលឆាប់ៗខាងមុខ ដើម្បីបង្កលក្ខណៈងាយស្រួល ព្រមទាំងផ្តល់ប្រយោជន៍ ថែបំប៉ន និងលើកកម្ពស់ការយល់ដឹង ដល់អ្នកប្រកបអាជីវកម្ម មុខរបរ និង ការងារ ដែលស្ថិតនៅក្នុងសេដ្ឋកិច្ចក្រៅប្រព័ន្ធ។ ជាមួយគ្នានេះដែរ វិស័យសហគ្រាសធុនមីក្រូ តូច និង មធ្យម ក៏តែងតែទទួលបាននូវការគាំទ្រជាច្រើនទៀតពីរដ្ឋាភិបាលដូចជា ការផ្តល់ហិរញ្ញប្បទាន ការបណ្តុះ បណ្តាលវិជ្ជាជីវៈ ការអនុគ្រោះពន្ធ ហើយថ្មីៗនេះ ក៏មានការផ្អាកទៅលើការបំពេញបែបបទបើកដំណើរ ការអាជីវកម្មខ្នាតតូច ដែលជាការយកចិត្តទុកដាក់ខ្ពស់ក្នុងការផ្តល់ចីរភាព និងលទ្ធភាពដល់ប្រជាជន កម្ពុជាទូទៅក្នុងការបង្កើត និងបណ្តុះអាជីវកម្ម បង្កើតចំណូល និងឱកាស។ជាការពិតណាស់ យើងនៅតែបន្តភាពជាដៃគូជានិច្ចជាមួយវិស័យឯកជនសម្រាប់វិស័យសហ គ្រាសធុនតូច និងមធ្យមនៅកម្ពុជា និងបន្តស្វែងយល់អំពីបញ្ហានានា ដើម្បីបង្កភាពងាយស្រួលក្នុងការ ដំណើរការអាជីវកម្ម។ ដោយមើលឃើញអំពីសារ:សំខាន់ និងបញ្ហាប្រឈមរបស់សហគ្រាសធុនតូច និងមធ្យមនៅកម្ពុជា ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានសហការជាមួយដៃគូ រៀបចំសិក្ខាសាលាបរិវត្តកម្មឌីជីថលនេះឡើង។
លោក នាក់ ណេរ៉ុន អភិបាលរងខេត្តសៀមរាប មានប្រសាសន៍ថា៖ក្នុងបរិបទក្រោយការរីករាលដាលជាសកលនៃជំងឺកូវីដ-19 សហគ្រាសធុនតូច និង មធ្យមនៅខេត្តសៀមរាប និយាយដោយឡែកនិងនិយាយជារួមនៅទូទាំងប្រទេសកម្ពុជាបានចាប់ផ្ដើមមានការកើនឡើងគួរអោយកត់សម្គាល់ ដែលបានចូលរួម ចំណែកយ៉ាងសំខាន់ក្នុងការរក្សាខ្សែសង្វាក់ផ្គត់ផ្គង់ ការដឹកជញ្ជូន និងការផ្គត់ផ្គង់សេវា ដែលក្នុងនោះ ក៏បានរួមចំណែកដល់ការអភិវឌ្ឍសង្គមតាមរយៈ ការបង្កើតការងារ ការកាត់បន្ថយភាពក្រីក្រ និងរក្សា នូវស្ថេរភាពនៃការអភិវឌ្ឍន៍សេដ្ឋកិច្ចនៅក្នុងប្រទេសកម្ពុជា។ លោក អភិបាលរងខេត្តបន្តថា៖សហគ្រាសមីក្រូ តូច និងមធ្យមនៅកម្ពុជា ភាគច្រើនជា “សេដ្ឋកិច្ចក្រៅប្រព័ន្ធ” មិនទាន់មាននូវអាជ្ញាប័ណ្ណអាជីវកម្មត្រឹមត្រូវនៅឡើយ និង តម្រូវអោយមានការចុះបញ្ជីអាជីវកម្មពីក្រសួងស្ថាប័នពាក់ព័ន្ធ បន្ថែមពីនេះ ពាក់ព័ន្ធនឹងការទទួល បានព័ត៌មាននៅជាបញ្ហាចម្បងនៅឡើយ ជាពិសេសចំណេះដឹងផ្នែកបច្ចេកវិទ្យា និងជំនាញ បច្ចេកទេសនៅមានកម្រិត ជាហេតុដែលសហគ្រាសនៅកម្ពុជាត្រូវការការជួយជំរុញ និងការពង្រឹង សមត្ថភាពបន្ថែមទៀត៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
