តាមការសិក្សាថ្មីៗ របស់អ្នកបុរាណវិទូ បានឱ្យដឹងថា អង្គរធំគឺជាមណ្ឌលនៃទីក្រុងបុរាណរបស់ចក្រភពខ្មែរ ដោយមានប្រាសាទបាយ័នជាចំណុចកណ្តាល មានតំបន់ជាយក្រុងរីកសាយនៅជុំវិញមណ្ឌលនេះ មានវិសាលភាព លាតសន្ធឹងលើផ្ទៃដីប្រហែល ៣ពាន់គីឡូម៉ែត្រក្រឡា។
អ្នកបុរាណវិទូ និងជាប្រធាននាយកដ្ឋានស្រាវជ្រាវ បណ្តុះបណ្តាល ផ្សព្វផ្សាយនៃអាជ្ញាធរជាតិអប្សរាលោក អ៊ឹម សុខរិទ្ធី ពន្យល់ថា តាមក្បួនខ្នាតនៃការរៀបចំទីក្រុងកាលពីសម័យបុរាណ គឺយកលំនាំតាមទំលាប់ប្រពៃណីឥណ្ឌា ដោយទីក្រុងទាំងអស់ត្រូវមានកំពែងព័ន្ធជុំវិញ ដោយកំពែងទាំងនោះអាចសង់ពីដី ពីឈើ និងកំពែងថ្មជាដើម ទៅតាមក្បួនខ្នាតនៃនគរោបនីយកម្ម។តាមធម្មតាការរៀបចំរាជធានីសម័យបុរាណ ដំបូងគេត្រូវធ្វើទៅតាមទិសទាំងបួន គឺទិសខាងលិច ខាងកើត ខាងជើង និងខាងត្បូង ហើយទិសនីមួយៗមានខ្លោងទ្វារចូលដោយយកតាមលំនាំខ្សែសំខាន់ពីរ គឺខ្សែទទឹងថ្ងៃមួយ និងខ្សែបណ្តោយថ្ងៃមួយ។ ក៏ប៉ុន្តែ សម្រាប់ក្រុងអង្គរធំវិញ បែរជាមានខ្លោងទ្វារចូលទីក្រុងដល់ទៅ៥។
លោក អ៊ឹម សុខរិទ្ធី ពន្យល់ថា ដោយសារក្រុងអង្គរធំជាមណ្ឌលនៃរាជធានី ដូច្នេះហើយ កំពែងត្រូវតែកសាងឡើងពីថ្មមានខ្លោងទ្វារចូលចំនួន៥លើសពីក្បួនខ្នាតនៃរាជធានីបុរាណដទៃទៀតនោះ គឺដោយសារខ្លោងទ្វារទី៥ ធ្វើឡើងនៅពេលដោយគោរពតាមព្រះបរមរាជវាំង។លោកឱ្យដឹងទៀតថា ចំពោះការចេញចូលតាមខ្លោងទ្វារទីក្រុងអង្គរនាសម័យបុរាណទៀតសោត ប្រហែលមិនមានការបែងចែកឋានានុក្រមទេ ក៏ប៉ុន្តែមានច្បាប់ទំលាប់ដោយត្រូវបែងចែកផ្ទៃក្រុងទៅតាមឋានានុក្រម មានសង្កាត់ក្សត្រ សង្កាត់ព្រាហ្មណ៍ សង្កាត់អ្នកជំនួញ សង្កាត់អ្នកការទូត អ្នករាជ្ជការមន្ត្រី និងអ្នកស្រុកធម្មតាជាដើម។ ល។ អ្នករស់នៅតំបន់ខាងជើងអាចចូលទៅទីក្រុងតាមខ្លោងទ្វារជើង អ្នករស់នៅខាងត្បូង អាចចូលតាមខ្លោងទ្វារខាងត្បូង ដោយមិនចាំបាច់វាងទីក្រុងទៅរកច្រកផ្សេងទេ។
លោកបន្តថា ក្រៅតែពីតែខ្លោងទ្វារចូលទីក្រុងនៅតាមទិសទាំង៤ ក៏ពិតមែន ក៏ទីក្រុងអង្គរមានផ្លូវក្រវ៉ាត់ក្រុង២ជាន់ទៀត សម្រាប់ឱ្យមនុស្សចូលមកទីក្រុងទៅតាមតំបន់ដែលពួកគេរស់នៅ។ បន្ថែមលើនេះ គឺមានផ្លូវក្រវ៉ាត់ក្រុងចំនួនពីរទៀត គឺផ្លូវក្រវ៉ាត់នៅក្រៅទីក្រុង មានទទឹងប្រហែល១០ម៉ែត្រដោយផ្លូវនោះព័ទ្ធជុំវិញទីក្រុងទាំងមូល។ឯផ្លូវក្រវ៉ាត់ក្រុងទី២ គឺនៅខាងក្នុងទីក្រុង ផ្លូវក្រវ៉ាត់ក្រុងទី២នេះ ជារាជធានីមានក្បួនខ្នាតត្រឹមត្រូវមានខ្លោងទ្វារមានផ្លូវចូលទៅក្នុងទីក្រុង ហើយមានផ្លូវឆ្ពោះទៅសង្កាត់មួយៗខ្វាត់ខ្វែង។ ផ្លូវទាំងអស់នេះ បើមើលទៅផ្ទៃរបស់រាជធានីក្រុងអង្គរធំ គឺប្រៀបដូចជាក្រឡាចត្រង្គបែងចែកផ្ទៃទីក្រុង ដោយមានជាសង្កាត់ៗសម្រាប់មនុស្សរស់នៅ។
សូមបញ្ជាក់ថា តាមកាសិក្សាថ្មីៗរបស់ស្ថាប័នអន្តរជាតិសហការជាមួយអាជ្ញាធរជាតិអប្សរា បានបង្ហាញថាកាលពីសម័យបុរាណនៅក្រុងអង្គរនៃចក្រភពខ្មែរទាំងមូល គឺមានមនុស្សរស់នៅប្រមាណ ១លាននាក់៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
