ដីព្រៃសហគមន៏ភ្នំព្រះច្បារ និងដីប្រជាពលរដ្ឋចំនួន ១៩២១គ្រួសារ ក្នុងភូមិដំណាក់ដំរី ឃុំស្លែងស្ពាន ស្រុកស្រីស្នំ ខេត្តសៀមរាប ចំនួន ៥៣២ហិកតា បាននឹងកំពុងបោសសម្អាតមីន និងសំណល់ជាតិផ្ទុះផ្សេងៗសល់ពីសង្រ្គាម អំឡុងឆ្នាំ១៩៧៩-១៩៨៧ ក្រោមជំនួយរដ្ឋាភិបាលប្រទេសចិន ដើម្បីយកដីឲ្យប្រជាពលរដ្ឋប្រើប្រាស់ និងអភិវឌ្ឍន៍ធ្វើជាតំបន់ទេសចរណ៍។
ក្នុងពិធីប្រគល់-ទទួលសំភារៈប្រើប្រាស់របស់មូលនិធិចិន Peace Land Foundation ជូនដល់ក្រុមការងារបោសសំអាតមីន ស៊ីម៉ាក់ (CMAC) នៅថ្ងៃទី១៨ ខែកញ្ញា ឆ្នាំ២០២៣នេះ លោក អ៊ាន សុធា ប្រធានកងឯកភាពកំចាត់មីនទី៤ ស៊ីម៉ាក់ (CMAC) ប្រចាំខេត្តសៀមរាប បានគូសបញ្ជាក់ថាក្រុមការងារបោសសំអាតមីន កំពុងបោសសម្អាតមីនរំដោះផ្ទៃដីសរុប ៥៣២ហិកតា ដោយប្រើប្រាស់កម្លាំង ៤ក្រុម ស្មើនឹង៤០នាក់ ដែលបច្ចុប្បន្នក្រុមការងារបោសសំអាតបានលើផ្ទៃដី ២៥% ហើយបើតាមផែនការគ្រោងនឹងបញ្ចប់នៅចុងឆ្នាំ២០២៤ ខាងមុខ។
លោក ហ៊ន់ ឬទ្ធិ អភិបាលស្រុកស្រីស្នំ បានបង្ហាញការសាទរចំពោះសមិទ្ធផលដែលសម្រេចបានពីកិច្ចសហការរវាងកងឯកភាពកំចាត់មីនទី៤ ស៊ីម៉ាក់ ប្រចាំខេត្តសៀមរាប និងមូលនិធិចិន Peace Land Foundation តាមរយៈលោក ងន ប៊ុនធី អភិបាលរងស្រុកបន្ទាយស្រី ដែលបានជួយពន្លឿនដល់សកម្មភាពរំដោះដីចេញពីគ្រាប់មីន និងគ្រាប់មិនទាន់ផ្ទុះ ជាប្រយោជន៍ផ្តល់ជូនប្រជាជនដោយផ្ទាល់នៅក្នុងភូមិដំណាក់ដំរី និងដល់ប្រជាជននៅក្នុងស្រុកស្រីស្នំទាំងមូល។
លោក Liu Wenzhi តំណាងមូលនិធិចិន Peace Land Foundation បានថ្លែងនូវការកោតសរសើរ និងវាយតម្លៃខ្ពស់ ចំពោះកិច្ចខិតខំរបស់ក្រុមការងារបោសសំអាតមីន និងអាជ្ញាធរពាក់ព័ន្ធនានា រួមទាំងការចូលរួមដោយផ្ទាល់របស់ប្រជាជននៅនឹងមូលដ្ឋានក្នុងការជួយសម្រេចបាននូវការបោសសម្អាតមីនឱ្យអស់ពីក្នុងស្រុកស្រីស្នំ និយាយដោយឡែក និងនៅទីតាំងនានាក្នុងប្រទេសកម្ពុជានិយាយរួម ក្រោមគោលនយោបាយប្រកបដោយភាពវាងវៃរបស់រាជរដ្ឋាភិបាលកម្ពុជាក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។លោក Liu Wenzhi ក៏បានបង្ហាញសុឆន្ទៈក្នុងការសម្របសម្រួលការងារជួយកៀងគររកជំនួយសម្ភារៈនានាបន្ថែមទៀតដល់បេសកកម្មការងាររបស់កងឯកភាពកំចាត់មីនទី៤ ស៊ីម៉ាក់ (CMAC)ប្រចាំខេត្តសៀមរាប។
សូមជម្រាបថាមូលនិធិចិន Peace Land Foundation បានផ្ដល់សំម្ភារះដល់ក្រុមការងារបោសសំអាតមីន ស៊ីម៉ាក់ (CMAC) រួមមានតង់ធំចល័តទំហំ ៣x៤ម៉ែត្រ ចំនួន២ តុចល័តចំនួន៥ គ្រែចល័តចំនួន១០ ពូកគេងបត់ចល័តចំនួន១០ កៅអីចល័តចំនួន១៥ តុចល័តចំនួន៥ និងអំពូលដើរដោយថាមពលពន្លឺព្រះអាទិត្យចំនួន៥ ៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
