រយៈពេល១៥ថ្ងៃ គិតចាប់ពីថ្ងៃទី២២ ខែកញ្ញា ឆ្នាំ២០២៣នេះ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប នឹងសហការជាមួយរដ្ឋបាលស្រុកក្រឡាញ់ ដើម្បីចាប់ផ្តើមធ្វើការវាស់វែង និងប្រមូលទិន្នន័យ នៅក្នុងតំបន់វិនិច្ឆ័យលើការចុះបញ្ជីដីធ្លីមានលក្ខណៈជាប្រព័ន្ធ ដែលស្ថិតក្នុងភូមិចំនួន ១៣ភូមិ នៃឃុំស្រណាល។
លោក ប៊ូ ជុំសម្បត្តិ អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប បញ្ជាក់ថា តាមរយៈសេចក្តីសម្រេចកំណត់តំបន់វិនិច្ឆ័យលើការចុះបញ្ជីដីធ្លី ដែលមានលក្ខណៈជាប្រព័ន្ធ របស់គណៈកម្មការរដ្ឋបាលខេត្ត ទាំងភូមិ១៣រួមមាន ភូមិល្ហុង ភូមិគោកចាស់ ភូមិផ្លាំង ភូមិមានជ័យ ភូមិរវៀង ភូមិទន្លាប់ ភូមិតាំងយូ ភូមិគំរូ ភូមិស្លែង ភូមិរំដេង ភូមិស្រណាល ភូមិគោកត្រុំ និងភូមិគោកត្នោត។ ជាមួយនោះ រយៈពេល គឺគិតរួមទាំងថ្ងៃបុណ្យនឹងថ្ងៃឈប់សំរាក។
លោក ប៊ូ ជុំសម្បត្តិ បញ្ជាក់បន្ថែមថា បន្ទាប់ពីបញ្ចប់ការចុះវាស់វែង ក្រុមការងារជំនាញ នឹងចុះមកធ្វើការប្រកាសបិទផ្សាយជាសាធារណៈ នូវឯកសារនៃការចុះបញ្ជីដីធ្លីមានលក្ខណៈជាប្រព័ន្ធបន្ថែមទៀត ដើម្បីទុកឱកាសឱ្យម្ចាស់ក្បាល ដី និងភាគីពាក់ព័ន្ធ ពិនិត្យពីទិន្នន័យលម្អិតរបស់ក្បាលដីនីមួយៗ។ ក្នុងករណី មានការឯកភាពលើការចុះប្រមូលទិន្នន័យ ប្រជាពលរដ្ឋអាចប្តឹង ឬជំទាស់តវ៉ាមកក្រុមមន្ត្រីជំនាញ ដែលនៅប្រចាំការជាប្រចាំដោយមិនគិតពីថ្ងៃឈប់សម្រាក។
លោក ស៊ីន រ៉ា អភិបាលរងស្រុកក្រឡាញ់ លើកឡើងថា ការចុះបញ្ជីដីធ្លី ដែលមានលក្ខណៈជាប្រព័ន្ធ គឺពិតជាមានសារៈសំខាន់ណាស់ ដើម្បីចេញបណ្ណកម្មសិទ្ធិកាន់កាប់ដីធ្លីជូនប្រជាពលរដ្ឋឲ្យបានត្រឹមត្រូវ និងស្របច្បាប់។ ក្នុងដំណាក់កាលចុះវាស់វែង និងប្រមូលទិន្នន័យនាពេលនេះ សូមប្រជាពលរដ្ឋនៅតាមបណ្ដាភូមិដែលបានរៀបរាប់ខាងលើ ត្រៀមឯកសារ និងមានវត្តមាននៅពេលក្រុមការងារជំនាញចុះទៅដល់ទីតាំងដីរបស់បងប្អូនប្រជាពលរដ្ឋ ដែលមានរយៈពេលតែ ១៥ថ្ងៃប៉ុណ្ណោះ។
លោកអភិបាលរងស្រុក ក៏បានអំពាវនាវដល់អាជ្ញាធរមូលដ្ឋានគ្រប់ជាន់ថ្នាក់ និងអ្នកពាក់ព័ន្ធ រួមទាំងបងប្អូនប្រជាពលរដ្ឋ ដែលបានចូលរួមនាពេលនេះ សូមធ្វើការផ្សព្វផ្សាយបន្តឲ្យបានដល់ប្រជាពលរដ្ឋ ក្នុងមូលដ្ឋានរបស់ខ្លួនឱ្យបានគ្រប់ៗគ្នា៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក សេង ផល្លី
