ក្នុងសិក្ខាសាលាស្ដីពី ការបង្ហាញកម្រោងបទពិសោធន៍ល្អៗ នៃកិច្ចសហប្រតិបត្តិការ និងភាពជាដៃគូ ក្នុងការអនុវត្តគម្រោង “ជំនាញដើម្បីភាពជោគជ័យ” ឯកឧត្តម ហ៊ីង ស៊ីដេត ប្រតិភូរាជរដ្ឋាភិបាល ទទួលបន្ទុកជាអគ្គនាយកអប់រំបណ្តុះបណ្តាលបច្ចេកទេស និងវិជ្ជាជីវៈ នៃក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ថា ការអប់រំបណ្តុះបណ្តាលបច្ចេកទេស និងវិជ្ជាជីវៈជាជម្រើសទី២ របស់យុវជន ប្រជាពលរដ្ឋ ឬ ក្រុមគោលដៅ ហើយ TVET ក៏បានផ្តល់ឱកាសដល់ក្រុមគោលដៅ សូម្បីតែអ្នកមិនចេះអក្សរ ឬអ្នកមានចំណេះដឹងទាប ក៏អាចជួយឱ្យពួកគាត់ចុះឈ្មោះចូលរៀនបានដែរ។ TVET គឺជាច្រកមួយដែលមានភាពបត់បែន ជាផ្លូវកាត់ ជួយឱ្យពួកគាត់មានមុខរបរ ការងារ មានប្រាក់ចំណូលកាន់តែច្រើន ធ្វើឱ្យជីវភាព និងជីវិតកាន់តែប្រសើរ។ ជារួម សិស្ស TVET ដែលបានបញ្ចប់ការសិក្សា គឺទទួលបានការងារធ្វើ ស្ទើរតែទាំងស្រុង, នេះបើតាមការលើកឡើងរបស់ ឯកឧត្តម ហ៊ីង ស៊ីដេត ប្រតិភូរាជរដ្ឋាភិបាល ទទួលបន្ទុកជាអគ្គនាយកអប់រំបណ្តុះបណ្តាលបច្ចេកទេស និងវិជ្ជាជីវៈ នៃក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី២៥ ខែកញ្ញា ឆ្នាំ២០២៣ ក្នុងសិក្ខាសាលាស្ដីពី ការបង្ហាញកម្រោងបទពិសោធន៍ល្អៗ នៃកិច្ចសហប្រតិបត្តិការ និងភាពជាដៃគូ ក្នុងការអនុវត្តគម្រោង “ជំនាញដើម្បីភាពជោគជ័យ” ក្នុងខេត្តសៀមរាប។
ឯកឧត្តម ហ៊ីង ស៊ីដេត បានបញ្ជាក់បន្ថែមថា រាជរដ្ឋាភិបាលបានដាក់ចេញកម្មវិធីគោលនយោបាយ
អាទិភាពក្នុងការបណ្តុះបណ្តាលជំនាញវិជ្ជាជីវៈ និងបច្ចេកទេស ជូនយុវជនមកពីគ្រួសារក្រីក្រ និងគ្រួសារងាយរងហានិភ័យ នៅទូទាំងប្រទេស ចំនួន ១,៥ លាន នាក់ ក្នុងកម្រិតសញ្ញាបត្របច្ចេកទេស និងវិជ្ជាជីវៈ កម្រិត ១ (C1) ដោយមិនបង់ថ្លៃសិក្សា និងទទួលបានប្រាក់ឧបត្ថម្ភប្រចាំខែចំនួន ៧០$ ក្នុង១ខែ (មានរយៈពេល៤ខែ) សម្រាប់ចាប់ផ្តើមអនុវត្តភ្លាម នៅមុនដំណាច់ឆ្នាំ២០២៣ នេះហើយ។ ឈរលើមូលដ្ឋាននេះ ក្រសួងការងារ និងបណ្តុះបណ្តាលវិជ្ជាជីវៈ នឹងបន្តបង្កើនការវិនិយោគ និងធ្វើបរិវត្តកម្មប្រព័ន្ធអប់រំបណ្តុះបណ្តាលបច្ចេកទេស និងវិជ្ជាជីវៈ ដើម្បីផលិតមូលធនមនុស្ស ដែលបំពាក់ទៅដោយចំណេះដឹង ជំនាញ ឥរិយាបថ និងសីលធម៌ សំដៅ ឆ្លើយតបទៅនឹងតម្រូវការរបស់ ឧស្សាហកម្ម និងទិសដៅអភិវឌ្ឍសង្គមសេដ្ឋកិច្ចជាតិ ព្រមទាំងមានភាពធន់ ភាពបត់បែន និងអាចឆ្លើយតប ទៅនឹងបម្រែបម្រួលរចនាសម្ព័ន្ធសេដ្ឋកិច្ចនិងទីផ្សារការងារ ការប្រែប្រួលបច្ចេកវិទ្យានៃបដិវត្តឧស្សាហកម្ម ៤.០ ជាពិសេសដោយធានាថា “ពលរដ្ឋម្នាក់មានជំនាញមួយយ៉ាងតិចប្រចាំជីវិត”។
ឯកឧត្តម ហ៊ីង ស៊ីដេត បានមានប្រសាសន៍ថា ប្រទេសជាតិមួយអាចមានការរីកចម្រើនទៅមុខបានឆាប់រហ័ស លុះត្រាតែវិស័យ TVET នឹងក្លាយជាជម្រើសទី១ របស់យុវជន ខណៈបច្ចុប្បន្នសិស្សានុសិស្សនៅពុំទាន់យល់ដឹងបានទូលំទូលាយពីវិស័យ TVET នេះនៅឡើយ។ ឯកឧត្តម ក៏បានផ្ដល់អនុសាសន៍ដល់សិស្សានុសិស្ស ត្រូវសិក្សាជំនាញ ដែលសង្គម និងទីផ្សារការងារកំពុងត្រូវការ សម្រាប់ពេលបច្ចុប្បន្ន និងអនាគត ចៀសវាងការជ្រើសរើសមុខវិជ្ជាតៗតាមគ្នា មួយវិញទៀត ត្រូវចេះបង្កើតការទំនាក់ទំនងក្នុងសង្គម ដើម្បីទទួលបានឱកាស និងក្តាប់បានព័ត៌មានផ្សេងៗ សម្រាប់ភាពជោគជ័យក្នុងការងារ។
មានប្រសាសន៍ក្នុងសិក្ខាសាលានោះ លោកស្រី ម៉ននី រង្សី អភិបាលរងខេត្តសៀមរាប លើកឡើងថា ការសិក្សា TVET ពិតជាមានឧត្តមភាព និងសារប្រយោជន៍ណាស់ ក្នុងការផ្ដល់ជំនាញ វិជ្ជាជីវៈដល់មនុស្សគ្រប់វ័យ ជាពិសេសយុវជនរងហានិភ័យមកពីទីជនបទ សំដៅឱ្យទទួលបានការងារ មុខរបរសមរម្យ សម្រាប់ជួយលើកស្ទួយជីវភាពគ្រួសារ។
លោកស្រី ម៉ននី រង្សី បញ្ជាក់ថា រាជរដ្ឋាភិបាលនីតិកាលទី៧ ដឹកនាំដោយសម្ដេចធិបតី ហ៊ុន ម៉ាណែត បានកំណត់វិស័យ TVET នេះ ជាវិស័យអាទិភាពទី២ ក្នុងចំណោមវិស័យអាទិភាពផ្សេងៗទៀត ក្នុងផែនការយុទ្ធសាស្ត្របច្ចកោណ។ វិស័យនេះ នឹងរួមចំណែកកសាងមូលធនមនុស្ស ប្រកបដោយចំណេះ សមត្ថភាព ជំនាញ ឥរិយាបថការងារ និងសីលធម៌វិទ្យាជីវៈ ដើម្បីក្លាយខ្លួនជាអ្នកមានជំនាញបច្ចេកទេស ដែលឆ្លើយតបទៅនឹងកំណើនតម្រូវការ ក្នុងទីផ្សារការងារ នៃជំនាញបច្ចេកទេសនាពេលបច្ចុប្បន្ន និងខាងមុខ។
លោកស្រី អភិបាលរងខេត្ត ក៏បានវាយតម្លៃខ្ពស់ ចំពោះសិក្ខាលាលា នៃគម្រោង “ជំនាញ ដើម្បីភាពជោគជ័យ” ដែលបានឆ្លុះបញ្ចាំងពីការអភិវឌ្ឍសមាគមមូលដ្ឋាន ដែលធានាដល់ភាពមានការងារធ្វើរបស់បុរស ស្ត្រី ដោយមិនប្រកាន់វ័យ ជាពិសេសយុវជន ដែលរងគ្រោះ និងងាយរងហានិភ័យ ដើម្បីឱ្យពួកគេអាចទទួលបាន ចំណេះ ជំនាញ និងធនធាន ស្របតាមតម្រូវការ ជាពិសេសតម្រូវការនៅក្នុងមូលដ្ឋាន។ កិច្ចខិតខំប្រឹងប្រែងទាំងនេះ បានចូលរួមយ៉ាងសំខាន់ ក្នុងការកាត់បន្ថយភាពអសកម្មនានាក្នុងសង្គម។ ក្នុងនាមអាជ្ញាធរខេត្ត លោកស្រី សូមថ្លែងអំណរគុណដល់ សមាគមបណ្ដុះកុមារ វិទ្យាស្ថានពហុបច្ចេកទេសភូមិភាគតេជោសែន និងមជ្ឈមណ្ឌលបណ្ដុះវិជ្ជាជីវៈរតនៈគិរី ដែលបានរៀបចំសិក្ខាសាលានេះឡើង។ ជាមួយនោះ លោកស្រី ក៏សូមសំណូមពរដល់លោកប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តសៀមរាប ស្នើដាក់បញ្ចូលកម្មវិធីផ្សព្វផ្សាយនេះទៅរដ្ឋបាលខេត្ត ដើម្បីធ្វើការផ្សព្វផ្សាយក្នុងកម្មវិធីវេទិកាសាធារណៈរបស់រដ្ឋបាលខេត្ត នៅតាមបណ្ដាក្រុង ស្រុកផងដែរ។
