ក្រោមកិច្ចសហការរវាងសភាពាណិជ្ជកម្មកម្ពុជា ក្រសួងពាណិជ្ជកម្ម អាជ្ញាធរខេត្តសៀមរាប និងមជ្ឈមណ្ឌលអភិវឌ្ឍធុរកិច្ច នៅសាកលវិទ្យាល័យអង្គរ ក្រុងសៀមរាប នាថ្ងៃទី២៧ ខែកញ្ញា ឆ្នាំ២០២៣ មានរៀបចំសិក្ខាសាលាស្តីពី “ការយល់ដឹងពីការធ្វើធុរកិច្ច ដើម្បីកាត់បន្ថយបញ្ហាប្រឈមផ្នែកច្បាប់” ដើម្បីចែករំលែកចំណេះដឹងផ្សេងៗ ពាក់ព័ន្ធលើការធ្វើពាណិជ្ជកម្មជូនដល់អាជីវករ ពាណិជ្ជករ និងសិស្សនិស្សិតនៅខេត្តសៀមរាប។
ឧកញ៉ា ងួន ម៉េងតិច អគ្គនាយក សភាពាណិជ្ជកម្មកម្ពុជា បង្ហាញថា សិក្ខាសាលាថ្ងៃនេះ ជាសកម្មភាពមួយក្នុងចំណោមសកម្មភាពដទៃទៀតរបស់សភាពាណិជ្ជកម្មកម្ពុជា ដែលបានដាក់ចេញប្រចាំឆ្នាំ២០២៣។ សិក្ខាសាលានាពេលនេះ មានគោលបំណង បញ្ជ្រាបការយល់ដឹងឱ្យកាន់តែទូលំទូលាយ អំពីច្បាប់បញ្ញត្តិនានាទាក់ទង និងការធ្វើធុរកិច្ច ដើម្បីឱ្យការធ្វើពាណិជ្ជកម្មប្រកបដោយចីរភាព ដែលរួមមានចំណុចសំខាន់ៗដូចជា ច្បាប់ស្តីពីសហគ្រាសពាណិជ្ជកម្ម និងការលើកទឹកចិត្តសម្រាប់សហគ្រាសធុនតូច និងមធ្យម។ លោកបន្ថែមថា សិក្ខាសាលានេះ ក៏នឹងឱ្យអ្នកចូលរួមអាចស្វែងយល់បានអំពីនីតិវិធីនៃការចុះបញ្ជីពាណិជ្ជកម្ម និងការរៀបចំឯកសារគតិយុត្តិនានា ដើម្បីទទួលបានការលើកទឹកចិត្តពីរាជរដ្ឋាភិបាលផងដែរ។
ថ្លែងក្នុងឱកាសនោះ លោក នាក់ ណេរ៉ុន អភិបាលរងខេត្តសៀមរាប បញ្ជាក់ថា កន្លងមក មានការរៀបចំសិក្ខាសាលាពាក់ព័ន្ធនឹងច្បាប់ពាណិជ្ជកម្ម ឬច្បាប់ពន្ធដារ ជាច្រើន ដូចជាតាមរយៈមន្ទីរពាណិជ្ជកម្មខេត្តសៀមរាប ខេត្តសៀមរាប-ឧត្តរមានជ័យ ក្រសួងសេដ្ឋកិច្ច និងហិរញ្ញវត្ថុ សមាគម ស្ថាប័នផ្សេងៗជាច្រើន។ ប៉ុន្តែ អាជីវករ ពាណិជ្ជករ នៅតែជួបបញ្ហាប្រឈម នៅពេលទៅចុះបញ្ជីពាណិជ្ជកម្មបង្កើតជាក្រុមហ៊ុន ឬសហគ្រាសពាណិជ្ជកម្ម។ ដូច្នេះសិក្ខាសាលានេះ នឹងចូលរួមបន្ថែមទៀត ក្នុងការបញ្ជ្រាបការយល់ដឹងដល់អាជីវករ ពាណិជ្ជករ ដែលជាម្ចាស់អាជីវកម្មទាំងអស់ ពីច្បាប់សហគ្រាស និងការលើកទឹកចិត្តសម្រាប់សហគ្រាសធុនតូច និងមធ្យម។ ចំណែកសិស្សនិស្សិត ដែលបានអញ្ជើញចូលរួមថ្ងៃនេះ សូមយកចិត្តទុកដាក់រៀនសូត្រ និងកត់ត្រាទុកដើម្បីជាចំណេះដឹងបន្ថែម ព្រោះនេះគឺជាអ្វី ដែលចាំបាច់សម្រាប់សិស្សនិស្សិតទាំងអស់ក្រោយពីបញ្ចប់ការសិក្សា ផ្សារភ្ជាប់ទ្រឹស្តី និងការអនុវត្តផ្ទាល់។
អត្ថបទ និងរូបភាព៖ លោក ជា ស្រស់
កែសម្រួល៖ លោក សេង ផល្លី
