កូនឈើចម្រុះសរុប ១ ៣៥០ដើម ត្រូវបាននៅលើផ្ទៃដីជាង២ហិកតា នៅក្បែរសាលាខេត្តសៀមរាប ដើម្បីចូលរួមអបអរសាទរទិវាទេសចរណ៍ពិភពលោក ថ្ងៃទី២៧ ខែកញ្ញា ឆ្នាំ២០២៣នេះ ដែលបានប្រព្រឹត្តិទៅក្រោមប្រធានបទ ទេសចរណ៍ និងការវិនិយោគបៃតង។
ឯកឧត្តម ឡុង កុសល អគ្គនាយករងអាជ្ញាធរជាតិអប្សរា បង្ហាញថា ការដាំកូនឈើនៅពេលនេះ ជាការអបអរនៃការបង្កើតធម្មនុញ្ញទេសចរណ៍ នៃអង្គការទេសចរណ៍ពិភពលោក ស្របគ្នាទៅនឹងរាជរដ្ឋាភិបាល និងបណ្ដាប្រទេសលើសកលលោក។ មួយវិញទៀត នេះក៏ជាការវិនិយោគយ៉ាងសំខាន់ ដែលអាជ្ញាធរជាតិអប្សរាបានធ្វើ ដើម្បីថ្ងៃអនាគត ដោយផ្សារភ្ជាប់រវាងទីកន្លែងផ្តល់សេវាកម្មផ្នែកទេសចរណ៍ និងកន្លែងផ្តល់សេវាកម្មផ្សេងៗ ជាមួយនឹងបរិស្ថានបៃតង សម្រាប់ទាក់ទាញទេសចរចូលមកកាន់តំបន់រមណីយដ្ឋានអង្គរបន្ថែមទៀត។
ឯកឧត្តម លើកឡើងថា តាមរយៈផែនការមេ ហៅថាផែនការអភិវឌ្ឍទេសចរណ៍តំបន់អង្គរ អាជ្ញាធរជាតិអប្សរា បានចែកការងារជាអាទិភាពជាច្រើន រួមមាន ការងារហេដ្ឋារចនាសម្ព័ន្ធ ការងាររៀបចំសេវាកម្មផ្សេងៗ និងការងាររៀបចំនូវសោភណ្ឌភាព ក៏ដូចជាបង្កើតនូវទេសភាពបៃតង។ ទាំងនេះជាការធ្វើឱ្យមានការ បន្ស៊ីគ្នាទៅនិងផែនការមេ និងចក្ខុវិស័យទេសចរណ៍វែងឆ្ងាយទាំងក្នុងតំបន់រមណីយដ្ឋានអង្គរ និងតាមសហគមន៍ប្រជាពលរដ្ឋ។
ព័ត៌មានជាតិ ថ្មីៗ
អត្ថបទ និងរូបភាព៖ លោក ជា ស្រស់
កែសម្រួល៖ លោក សេង ផល្លី
