ថ្ងៃទី២៧ ខែកញ្ញា ឆ្នាំ២០២៣នេះ ការដេញថ្លៃគម្រោងសាងសង់ផ្លូវបេតុងអាមេ ៤ខ្សែ ក្នុងឃុំអន្លង់សំណរ និងឃុំជីក្រែង នៃស្រុកជីក្រែង ខេត្តសៀមរាប បានបញ្ចប់ជាស្ថាពរ ដោយមានការចូលរួមពីអភិបាលរងស្រុកជីក្រែង មន្ត្រីបច្ចេកទេសសាលាខេត្ត មន្ត្រីបច្ចេកទេសស្រុក គណៈកម្មការលទ្ធកម្មឃុំ អ្នកសារព័ត៌មាន និងតំណាងក្រុមហ៊ុនដេញថ្លៃ។
បើតាមលោក កង ស៊ីជឿន ប្រធានគណៈកម្មការលទ្ធកម្មឃុំអន្លង់សំណរ បានឲ្យដឹងថា ឃុំបានដាក់ដេញថ្លៃគម្រោងសាងសង់ផ្លូវបេតុងអាមេចំនួន០២ខ្សែ ប្រវែង២៨០ម៉ែត្រ ទទឹង ៤ម៉ែត្រ កម្រាស់បេតុង០.១៥ម៉ែត្រ ដាក់លូការពារផ្លូវមុខកាត់០.៨ម៉ែត្រ ចំនួន ៤កង់ និងស្លាកសញ្ញាគម្រោងចំនួន១កន្លែង ក្នុងតំលៃប៉ានស្មាន ១៤៦.៥៦១.៣៨៩ រៀល។ជាលទ្ធផលបានទៅលើ ក្រុមហ៊ុន ម៉ូវ សៀកផៃ ក្នុងតម្លៃ ១៤៥.០០០.០០០រៀល។
ដោយឡែក អ្នកស្រី ឮ ចិន្ដា ប្រធានគណៈកម្មការលទ្ធកម្មឃុំជីក្រែង បានឲ្យដឹងថា ឃុំបានដាក់ដេញថ្លៃគម្រោងសាងសង់ផ្លូវបេតុងអាមេចំនួន០២ខ្សែ ប្រវែង ១៧២ ម៉ែត្រ ទទឹង ៥ ម៉ែត្រ កម្រាស់បេតុង០.១៥ម៉ែត្រ សាងសង់លូមូលកាត់ផ្លូវមុខកាត់ ០.៦ ម៉ែត្រ ប្រវែង ៦ ម៉ែត្រ ចំនួន១កន្លែង ដាក់លូការពារផ្លូវមុខកាត់០.៨ម៉ែត្រចំនួន៤កង់ និងស្លាកសញ្ញាគម្រោងចំនួន១កន្លែង ក្នុងតំលៃប៉ានស្មាន ១១២.១១៥.១៩៣ រៀល។ជាលទ្ធផលបានទៅលើ ក្រុមហ៊ុន ម៉ូវ សៀកផៃ ក្នុងតម្លៃ ១១១.០០០.០០០រៀល។
អ្នកស្រី ទី យិតហាន អភិបាលរងស្រុកជីក្រែង បានជំរុញដល់ក្រុមហ៊ុដែលទទួលបានការម៉ៅការគម្រោងផ្លូវទាំងពីរខាងលើ ត្រូវមានទំនាក់ទំនងជាមួយអាជ្ញាធរឃុំ និងចុះពិនិត្យតាមដានជាប្រចាំទៅលើការងារនេះជាប្រចាំ ដើម្បីឲ្យសាងសង់បានត្រឹមត្រូវស្របទៅតាមគំនូរប្លង់បច្ចេកទេស និងទាន់ពេលវេលា ហើយប្រសិនបើមានបញ្ហាផ្សេងៗ ត្រូវទាក់ទងបន្ទាន់ទៅក្រុមការងារបច្ចេកទេសស្រុក ឬខេត្ត ដើម្បីដោះស្រាយឲ្យបានទាន់ពេលវេលា។
ក្រុមហ៊ុន ម៉ូវ សៀកផៃ ដែលទទួលបានការម៉ៅការគម្រោងផ្លូវទាំងពីរខាងលើ បានធ្វើការប្ដេជ្ញាចិត្តដោយសន្យាថា ធ្វើឲ្យបានត្រឹមត្រូវស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដូចមាន ចែងនៅក្នុងកិច្ចសន្យា ជាពិសេសសហការជាមួយអាជ្ញាធរមូលដ្ឋាន៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
