នៅថ្ងៃទី២៨ ខែ កញ្ញា ឆ្នាំ២០២៣នេះ នៅសាលាខេត្តសៀមរាប មានរៀបចំកិច្ចប្រជុំបូកសរុបលទ្ធផល និង សកម្មភាពការងារ គម្រោងសាលាអភិបាលកិច្ច ដើម្បីពង្រឹងប្រព័ន្ធអភិបាលកិច្ច និងលើកកម្ពស់អភិបាលកិច្ចល្អ ដល់មន្ត្រី នៃយន្តការច្រកចេញចូលតែមួយ និង ការិយាល័យប្រជាពលរដ្ឋ ព្រមទាំងការលើកកម្ពស់ការឆ្លើយតបយេនឌ័រ ក្នុងការផ្តល់សេវាសាធារណៈ ការពង្រឹងប្រព័ន្ធផ្តល់ព័ត៌មានពីការផ្តល់សេវាសាធារណៈ និងប្រព័ន្ធផ្តល់ព័ត៌មានត្រឡប់ពីប្រជាពលរដ្ឋ តាមរយៈកម្មវិធីទូរស័ព្ទ (Mobile App)។
ឯកឧត្តម ម៉ា និរិទ្ឋ អគ្គនាយករង នៃអគ្គនាយកដ្ឋានសវនកម្មផ្ទៃក្នុង ក្រសួងមហាផ្ទៃ និង ជានាយកគម្រោងសាលាអភិបាលកិច្ច លើកឡើងថា ក្នុងដំណើរការអនុវត្តកម្មវិធីកំណែទម្រង់ វិមជ្ឈការ និង វិសហមជ្ឈការ ត្រូវបានរាជរដ្ឋាភិបាលចាត់ទុកថា ជាយុទ្ធសាស្ត្រ ឬជាគោលនយោបាយសាធារណៈមួយដ៏មានសារៈសំខាន់ ដើមី្បលើកកម្ពស់អភិបាលកិច្ច និង អភិវឌ្ឍន៍សេដ្ឋកិច្ចមូលដ្ឋាន។ ក្នុងនោះដែរ សូចនាករសំខាន់ៗ របស់រាជរដ្ឋាភិបាល ក្នុងការកំណែទម្រង់តាមវិមជ្ឈការ និង វិសហមជ្ឈការ នៅរដ្ឋបាលថ្នាក់ក្រោមជាតិ គឺការលើកកម្ពស់ អភិបាលកិច្ច និង សមត្ថភាពស្ថាប័នរដ្ឋបាលថ្នាក់ក្រោមជាតិ ដែលតម្រូវឲ្យរដ្ឋបាលគ្រប់ថ្នាក់ បំពេញតួនាទីភារកិច្ច ជាផលប្រយោជន៍ប្រជាពលរដ្ឋ ប្រកបដោយទទួលខុសត្រូវ ក្នុងការឆ្លើយតបទៅនឹងតម្រូវការ សំណូមពរចាំបាច់របស់ប្រជាពលរដ្ឋ និង សំដៅបង្កើនប្រសិទ្ធភាពនៃសេវាសាធារណៈ ធានាឲ្យមានភាពរីកចម្រើន។
មានប្រសាសន៍ក្នុងឱកាសនោះ ឯកឧត្តម ប្រាក់ ចាន់ធឿន សមាជិកក្រុមប្រឹក្សាខេត្តសៀមរាប បានថ្លែងអំណរគុណ ចំពោះអង្គការតម្លាភាពកម្ពុជា ដែលបានធ្វើកិច្ចសហការល្អជាមួយរដ្ឋបាលខេត្តសៀមរាប សំខាន់ចូលរួមគ្រប់សកម្ម ភាពនានា ជាមួយការិយាល័យប្រជាពលរដ្ឋខេត្តសៀមរាប លើការបណ្តុះបណ្តាលធនធានមនុស្ស គ្រូបង្គោល នៅតាមសង្កាត់គោលដៅ ក្នុងក្រុងសៀមរាប។ តាមរយៈនៃការអប់រំ ផ្សព្វផ្សាយ អំពីមតិយើង បានធ្វើឲ្យប្រជាពលរដ្ឋ កាន់តែយល់ច្បាស់ និងការផ្ដល់សេវារបស់ការិយាល័យប្រជាពលរដ្ឋ កាន់តែខិតជិតពួកគាត់។ ក្នុងនោះដែរ អភិបាលកិច្ចល្អនៅក្នុងការផ្តល់សេវា គឺជាកិច្ចការចម្បងមួយដែលរាជរដ្ឋាភិបាលកំពុងផ្តោតការយកចិត្តទុកដាក់យ៉ាងខ្លាំង ដើម្បីឲ្យរដ្ឋបាលសាធារណៈកាន់តែមានប្រសិទ្ធភាពជាងមុន និងឆ្លើយតបនឹងតម្រូវការរបស់ប្រជាពលរដ្ឋ ស្របនឹងកំណើនសេដ្ឋកិច្ចជាតិដែលកំពុងតែមានការវិវត្តទៅមុខយ៉ាងឆាប់រហ័ស។
ព័ត៌មានជាតិ ថ្មីៗ
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក សេង ផល្លី
