ក្រុមមន្ត្រីសង្គមស៊ីវិល បានលើកឡើង ការផ្តល់ការងារជូនជនមានពិការភាព ជាការរួមចំណែកដ៏ធំក្នុងការអភិវឌ្ឍប្រទេស ហើយជនមានពិការភាពពួកគាត់ក៏ត្រូវការងារធ្វើជាជាងការអាណិតអាសូរពីមហាជន។
ក្នុងវេទិកាថ្នាក់ខេត្ត ស្តីពីការងារ និងមុខរបរប្រកបដោយបរិយាបន្នសម្រាប់ជនមានពិការភាព នៅក្រុងសៀមរាប នាថ្ងៃទី២៨ ខែកញ្ញា ឆ្នាំ២០២៣នេះ នាយកប្រតិបត្តិអង្គការសកម្មភាពប្រជាជន ដើម្បីការអភិវឌ្ឍបរិយាបន្ន (ប៉ាហ្វីដ PAFID) លោក ខេង វីរៈ បានលើកឡើងថា ស្ថានភាពរបស់ជនមានពិការភាព គឺពិតជាងាយរងគ្រោះណាស់ ជាពិសេសជនមានពិការភាពដែលជានារី ឬកុមារី។ កន្លងមកអង្គការ PAFID បានរកឃើញថា ជនមានពិការភាពមួយចំនួនមិនបានចាកចេញពីផ្ទះទាល់តែសោះ ពួកគាត់អាចរស់រានបានដោយសារការឧបត្ថម្ភពីក្រុមគ្រួសារ ដែលនេះក៏ជាចំណែកមួយនៅក្នុងរាំងស្ទះដល់ការអភិវឌ្ឍប្រទេសជាតិ។
ព័ត៌មានជាតិ ថ្មីៗ
តំណាងអង្គការព្រះវិហារ ហ្វាំងឡង់ (Finn Church Aid) លោកស្រី ផុន រដ្ឋា ក៏បានបង្ហាញដែរថា ការគាំទ្រជនមានពិការភាពឲ្យពួកគាត់មានការងារធ្វើ បានកាត់បន្ថយការចំណាយមួយចំនួនរបស់រដ្ឋាភិបាល ដោយជនមានពិការភាពពួកគាត់មានថវិកាចាយវាយដោយខ្លួនឯង មិនពឹងទៅលើជំនួយពីក្រុមគ្រួសារ ឬពីរដ្ឋនោះទេ។ លោកស្រីក៏សំណូមពរដល់ម្ចាស់អាជីវកម្ម ក្រុមហ៊ុន សហគ្រាសនានា ជួយផ្តល់ការងារដល់ជនពិការទៅតាមការងារដែលពួកគាត់អាចធ្វើបាន។
បើទោះបីជាយ៉ាងនេះក្តីការលើកកម្ពស់និងពង្រឹងសមត្ថភាពផ្ទាល់ខ្លួនពិតជាមានសារៈសំខាន់ណាស់សម្រាប់ជនមានពិការភាព។
ក្នុងនោះដែរ កញ្ញា ព្រាប វល្ល័ក ដែលជាជនមានពិការភាពតាំងពីកុមារភាពមកនោះ បានទទួលស្គាល់ថា ពួកគាត់ពិតជាចង់បានការងារធ្វើ ជាងការអាណិតអាសូរហើយថាជនមានពិការភាពក៏ចង់បញ្ចេញសមត្ថភាពផ្ទាល់ខ្លួនដែរ ។ ប៉ុន្តែទោះជាយ៉ាងនេះក្តី នាងក៏សំណូមពរដល់ជនមានពិការភាពទាំងអស់ត្រូវរឹងមាំ និងដុសខាត់ពង្រឹងសមត្ថភាពខ្លួនឯងបន្ថែមទៀត ។
មានប្រសាសន៍ក្នុងឱកាសនោះដែរ លោក នាក់ ណេរ៉ុន អភិបាលរងខេត្តសៀមរាប បានលើកឡើងថា កន្លងមករាជរដ្ឋាភិបាលកម្ពុជា បានយកចិត្តទុកដាក់យ៉ាងខ្លាំងលើជនមានពិការភាព ក្នុងនោះ រាជរដ្ឋាភិបាលបានកំណត់ដល់គ្រឹះស្ថានសាធារណៈរបស់រដ្ឋត្រូវមានមន្ត្រីជាជនមានពិការភាពយ៉ាងតិច២ភាគរយ ចំណែកវិស័យឯកជនត្រូវមានយ៉ាងតិច១ភាគរយ។ លោកបន្តថា ស្របនឹងគោលនយោបាយរបស់រាជរដ្ឋាភិបាលនេះ រដ្ឋបាលខេត្តក៏បានយកចិត្តទុកដាក់ក្នុងការជួយគាំទ្រដល់ជនមានពិការភាពក្នុងការជំរុញនិលើកទឹកចិត្តពួកគាត់តាមរយៈការដាក់ចេញនូវយន្តការផ្សេងៗជាច្រើន។ លោកអភិបាលរងខេត្ត ក៏បានជំរុញដល់អាជ្ញាធរក្រុងស្រុកក៏ត្រូវពិនិត្យមើលការសាងសង់សំណង់សាធារណៈនានាដូចជាអគារមន្ទីរពេទ្យ អគារសាលារៀន អគារសាលាស្រុក សាលាឃុំជាដើមនោះ ត្រូវគិតគូរឲ្យបានម៉ត់ចត់ដើម្បីសម្រួលដល់ជនមានពិការភាព៕
អត្ថបទ និងរូបភាព៖ លោក ជា ស្រស់
