លេខាធិការដ្ឋានរៀបចំការបោះឆ្នោតខេត្តសៀមរាប នៅព្រឹកថ្ងៃទី២៨ ខែកញ្ញា ឆ្នាំ២០២៣នេះ បានរៀបចំកិច្ចប្រជុំផ្សព្វផ្សាយ ស្ដីពីកិច្ចសហការ និងវិធានការការពារសន្តិសុខ សុវត្ថិភាព និងសណ្ដាប់ធ្នាប់ ជាមួយអាជ្ញាធរ គណបក្សនយោបាយ និងភាគីពាក់ព័ន្ធ សម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៣ ដើម្បីណែនាំបន្ថែមដល់គ្រប់អ្នកពាក់ព័ន្ធពិនិត្យលើការងារនេះ ឲ្យប្រព្រឹត្តទៅដោយរលូន និងធានាបាននូវសន្តិសុខ សុវត្ថិភាព និងសណ្តាប់ធ្នាប់ល្អ។
លោក នឹម វ៉ាន់សំ ប្រធានលេខាធិការដ្ឋានរៀបចំការឆ្នោតខេត្តសៀមរាប បានបញ្ជាក់ថា គណៈកម្មាធិការជាតិរៀបចំការបោះឆ្នោត នឹងរៀបចំដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោត ការផ្តល់សុពលភាពលើបញ្ជីបោះឆ្នោត ឆ្នាំ២០២៣ ចាប់ពីថ្ងៃទី១ ខែតុលា ដល់ថ្ងៃទី៣១ ខែធ្នូ ឆ្នាំ២០២៣ ដូចដែលបានកំណត់ក្នុងប្រតិទិន ប៉ុន្តែរយៈពេលនៃការពិនិត្យបញ្ជីឈ្មោះ និងចុះឈ្មោះបោះឆ្នោត មាន ១៩ថ្ងៃប៉ុណ្ណោះ គឺចាប់ពីថ្ងៃទី១ ដល់ថ្ងៃទី១៩ ខែតុលា ឆ្នាំ២០២៣។ ដូច្នេះមកដល់ថ្ងៃនេះ ពេលវេលានៃដំណើរការក៏ជិតមកដល់ ហើយក៏អាចនឹងបញ្ចប់ទៅវិញលឿនផងដែរ ដែលតម្រូវឱ្យយើងទាំងអស់គ្នា យកចិត្តទុកដាក់ខ្លាំងចំពោះការជំរុញប្រជាពលរដ្ឋ និងត្រៀមសម្ភារ ឯកសារ បរិក្ខារ ក៏ដូចជា ធនធានមនុស្ស គឺក្រុមចុះឈ្មោះបោះឆ្នោត ដែលត្រូវបណ្ដុះបណ្ដាលនៅតាមមណ្ឌលប្រមូលផ្តុំ ក្រុងស្រុក នាពេលឆាប់ៗខាងមុខនេះ។
ក្នុងឱកាសនោះ លោក នឹម វ៉ាន់សំ បានជម្រុញដល់គ្រប់អ្នកពាក់ព័ន្ធ ត្រូវសហការចាត់វិធានការចាំបាច់នានា ដើម្បីការពារសន្តិសុខ សុវត្ថិភាព និងសណ្ដាប់ធ្នាប់សម្រាប់ដំណើរការនៃការពិនិត្យបញ្ជីឈ្មោះ និងការចុះឈ្មោះបោះឆ្នោត និងការផ្តល់សុពលភាពលើបញ្ជីបោះឆ្នោត ឆ្នាំ២០២៣នេះ ឲ្យប្រព្រឹត្តិទៅដោយរលូនល្អ និងទទួលបានជោគជ៏យ ស្ថិតក្នុងការធានាបាននូវបរិយាកាសនយោបាយស្ងប់ស្ងាត់ល្អ សន្តិសុខ សុវត្ថិភាព និងសណ្តាប់ធ្នាប់ល្អ គ្មានការបំភិយបំភ័យ គ្មានការគំរាមកំហែង និងគ្មានអំពោះហិង្សា។ ក្នុងនោះដែរ ប្រធានក្រុមប្រឹក្សាឃុំសង្កាត់ (កបឃ.ស) និងក្រុមចុះឈ្មោះបោះឆ្នោត (ក.ច.ប) នីមួយៗ ត្រូវពង្រឹងកិច្ចសហការការងារឱ្យបានជាប្រចាំជាមួយគណៈបញ្ជាការឯកភាពរដ្ឋបាលខេត្ត និងស្នងការដ្ឋាននគរបាលខេត្ត។ ពិសេសកម្លាំងប្រចាំការ និងកម្លាំងនគរបាលការពារនៅតាមការិយាល័យចុះឈ្មោះបោះឆ្នោតនីមួយៗ ដែលមានទីតាំងនៅតាមសាលាឃុំ សង្កាត់ ឬចល័តទៅតាមភូមិមួយចំនួនក្នុងឃុំសង្កាត់ ផ្អែកតាមផែនការដែលបានកំណត់។
ជាមួយគ្នានោះ លោកប្រធានលេខាធិការដ្ឋានរៀបចំការឆ្នោតខេត្ត ក៏បានណែនាំបន្ថែមដល់ កបឃ.ស និង ក.ច.ប នីមួយៗ ត្រូវយកចិត្តទុកដាក់តាមដាន និងក្តាប់ជាប់សភាពការណ៍ សន្តិសុខទូទៅ និងត្រូវស្នើសុំកិច្ចអន្តរាគមន៍ពីកម្លាំងមានសមត្ថកិច្ច ក្រុមពន្លត់អគ្គិភ័យ ឬក្រុមបុគ្គលិក សុខាភិបាលឱ្យបានទាន់ពេលវេលា ក្នុងករណីមានការអុកឡុករំខាន ការគំរាមកំហែង ឬការប្រព្រឹត្តអំពើល្មើសច្បាប់ផ្សេងៗទៀត និងក្នុងករណីកើតមានអគ្គិភ័យ ឬបញ្ហាសុខភាពផ្សេងៗ ដែលធ្វើឱ្យរាំងស្ទះដល់ដំណើរការ នៃការពិនិត្យបញ្ជីឈ្មោះ និងការចុះឈ្មោះបោះឆ្នោត។ ជាពិសេសត្រូវយកចិត្តទុកដាក់អនុវត្តតាមវិធានការសុខាភិបាល ក្នុងការបង្ការ និងទប់ស្កាត់ការឆ្លងរាលដាលនៃជំងឺកូវីដ-១៩ ដោយត្រូវចូលរួមផ្សព្វផ្សាយ និងណែនាំអំពីវិធានការសុខាភិបាលដល់កម្លាំងប្រតិបត្តិការទាំងអស់ដែលបានចូលរួម ព្រមទាំងប្រជាពលរដ្ឋដែលអញ្ជើញមកពិនិត្យបញ្ជីឈ្មោះ និងចុះឈ្មោះបោះឆ្នោត ដោយត្រូវអនុវត្តឱ្យបានខ្ជាប់ខ្ជួនតាមវិធានការ ៣ការពារ និង ៣កុំ ដើម្បីបញ្ចៀសឱ្យបានពីការឆ្លងជំងឺដ៏កាចសាហាវនេះផងដែរ៕
អត្ថបទ និងរូបភាព៖ លោក អ៊ុន ណារាជ្យ
