ចាប់ពីថ្ងៃទី២៦ ដល់ថ្ងៃទី៣០ ខែកញ្ញា ឆ្នាំ២០២៣ នៅសួនច្បារព្រះរាជដំណាក់ ក្រុងសៀមរាប មានការដាក់តាំងបង្ហាញផលិតផលខ្មែរប្រមាណ ៦០ប្រភេទ ក្នុងកម្មវិធី«ភូមិមួយ ផលិតមួយ» ដើម្បីបំផុសស្មារតីអ្នកផលិត និងអ្នកប្រើប្រាស់ ចូលរួមគាំទ្រ និងបង្កើនការផ្សព្វផ្សាយពីផលិតផលខ្មែរ។
ថ្លែងក្នុងពិធីបើកកម្មវិធី«ភូមិមួយផលិតមួយ» លោក យុន លីនណេ អភិបាលរងខេត្ដសៀមរាប លើកឡើងថា ការរៀបចំការតាំងពិព័រណ៍ផលិតផលក្នុងស្រុក នៅខេត្តសៀមរាបនាពេលនេះ នឹងជំរុញការចងក្រងផលិតករ សេវាករ និងសិប្បករ នៅតាមមូលដ្ឋាន ឱ្យចូលជាសមាជិកចលនាភូមិមួយផលិតផលមួយ។ ម៉្យាងវិញទៀត គោលការណ៍ណែនាំនេះក៏មានបំណងជំរុញឱ្យអ្នកពាក់ព័ន្ធធ្វើការណែនាំ និងពន្យល់ដល់ប្រជាពលរដ្ឋ និងអ្នកផលិតតាមមូលដ្ឋានឱ្យបានយល់ច្បាស់បន្ថែមទៀតពីសារៈសំខាន់ និងផលប្រយោជន៍ក្នុងការចូលរួមចលនាភូមិ១ផលិតផល១។
ព័ត៌មានជាតិ ថ្មីៗ
អញ្ជើញជាអធិបតីនាឱកាសនោះ ឯកឧត្តម ផល សុជាតិ អគ្គលេខាធិការ នៃគណៈកម្មាធិការជាតិជម្រុញចលនាភូមិមួយផលិតផលមួយ គូសបញ្ជាក់ថា គណៈកម្មាធិការជាតិជំរុញចលនាភូមិមួយ ផលិតផលមួយ បានបង្កើតអស់រយៈពេល១៦ឆ្នាំហើយ ដោយសម្តេចតេជោ ហ៊ុន សែន ដោយបានយកចិត្តទុកដាក់ខ្លាំង ទៅលើសេដ្ឋកិច្ចមូលដ្ឋាន តាមរយៈការកសាងឯកសារគតិយុត្តសំខាន់ៗ និងគោលនយោបាយមួយចំនួនទៀត ក្នុងនោះបានរៀបចំឡើងវិញ នូវគោលនយោបាយជាតិស្តីពីការជម្រុញចលនាភូមិមួយផលិតផលមួយឆ្នាំ២០១៦-២០២៦ និងបានកសាងផែនការយុទ្ឋសាស្ត្រជាតិជំរុញចលនាភូមិមួយផលិតផលមួយលើកទី១ឆ្នាំ២០១៩-២០២៣ ។
ឯកឧត្តមក៏បាន បញ្ជាក់បន្ថែមថា នៅចុងឆ្នាំ២០២១ ការជំរុញចលនាភូមិមួយ ផលិតផលមួយ បានចប់ដំណាក់កាលទី១ ដែលមានខេត្តចូលរួមចំនួន១០ និងចងក្រងផលិតផលក្នុងស្រុកបានចំនួន ១២០ផលិតផល ដោយឡែកនៅឆ្នាំ២០២២ គណៈកម្មាធិការ ចងក្រងផលិតផលក្នុងស្រុកបានចំនួន ៦០០ផលិតផល នៃ២៥ រាជធានី ខេត្ត ក្នុងនោះខេត្តសៀមរាប មាន ៤២ផលិតផល ។
ឯកឧត្តម ក៏បានអំពាវនាវ ក្រសួង ស្ថាប័ន មន្ទីរ អង្គភាពពាក់ព័ន្ធ ចូលរួមជំរុញឲ្យមានការអភិវឌ្ឍផលិតផលថ្មីៗ ដើម្បី ពង្រឹងគុណភាព និង សមត្ថភាពពាណិជ្ជកម្មនៃផលិតផលមានស្រាប់ ដែលនេះជាគោលការណ៍គ្រឺះ និងជាគោលដៅដែលយើងចង់បាន សំដៅធ្វើឲ្យទទួលបាននូវផលិតផលមានភាពសម្បូរបែប គុណភាពល្អ ស្របតាមយុទ្ឋសាស្ត្របញ្ចកោណ របស់រាជរដ្ឋាភិបាល នីតិកាលទី៧នេះផងដែរ៕
អត្ថបទ និងរូបភាព៖ លោក បូ សាវី និង លោក យូ វង្ស
កែសម្រួល៖ លោក សេង ផល្លី
