ដើម្បីជំរុញ និងពង្រឹងការសិក្សា ជាពិសេសសុជីវធម៌របស់សិស្សផងនោះ មន្ត្រីជាន់ខ្ពស់ក្រសួងអប់រំ បានណែនាំដល់មាតាបិតា អ្នកអាណាព្យាបាលសិស្សទាំងអស់ ត្រូវចូលរួមតាមដានលទ្ធផលសិក្សា អត្តចរិត សីលធម៌ សុជីវធម៌របស់កូនៗពេលនៅផ្ទះឲ្យបានជាប្រចាំ ជាពិសេសការទិញសៀវភៅ ឧបករណ៍សិក្សាផ្សេងៗ ដើម្បីឱ្យកូនបានរៀនស្វែងយល់ពីអ្វីថ្មីៗបន្ថែមទៀត។
ថ្លែងក្នុងពិធីប្រគល់វិញ្ញាបនបត្របណ្ឌិតស្រមោល ប័ណ្ណសរសើរ ប័ណ្ណអាហារូបករណ៍ និងប្រគល់រង្វាន់លើកទឹកចិត្តដល់សិស្សឆ្នើម សាលាបឋមសិក្សា យូ អេស អេ ខេត្តសៀមរាប នៅព្រឹកថ្ងៃទី១ ខែតុលា ឆ្នាំ២០២៣នេះ ឯកឧត្តម ពឹង គិមឆេន អនុរដ្ឋលេខាធិការក្រសួងអបរំ យុវជន និងកីឡា មានប្រសាសន៍ថា ការចូលរួមចំណែករបស់អាណាព្យាបាលក្នុងការបង្រៀនកូនៗរបស់ខ្លួនពេលនៅផ្ទះ ពិតជាមានសារសំខាន់ណាស់ ដូច្នេះសូមអំពាវនាវដល់មាតាបិតាអាណាព្យាបាលសិស្ស មេត្តាបន្តជួយចំណាយពេលវេលាជាមួយកូនៗ ក្នុងការជួយបង្រៀនកូននៅផ្ទះ និងគ្រប់ទម្រង់រៀនសូត្រតាមគន្លងថ្មីនៃវិស័យអប់រំ។ មាតាបិតាគួរចំណាយពេលនៅក្បែរកូន ដើម្បីឱ្យកូនអានឱ្យស្តាប់ ដោយជ្រើសរើសសៀវភៅអាន ឬខ្លឹមសារឌីជីថលដែលកូនចូលចិត្តអានបន្ថែមពីលើសៀវភៅមេរៀនជាដើម។
ឯកឧត្តម អនុរដ្ឋលេខាធិការ ក៏បានបង្ហាញនូវការសាទរចំពោះប្អូនទាំងអស់ដែលជាជ័យលាភីនាពេលនេះ ដែលបានខិតខំ តស៊ូ ព្យាយាមរៀនសូត្រ រហូតទទួលបានជោគជ័យមួយដំណាក់កាលនាពេលនេះ ដែលវាជាចំនុចចាំផ្ដើមមួយរបស់ប្អូនក្នុងការកសាងសមត្ថភាព និងចំណេះដឹង ដើម្បីបន្តការសិក្សានូវថ្នាក់ធំៗបន្តទៅមុខទៀត។ ហើយដើម្បីឲ្យមានភាពជោគជ័យនេះបន្តទៀតនោះ យើងក៏ត្រូវអនុវត្តឲ្យបាននូវមុំចំនួន៣ ដែលមុំជម្រុញឲ្យប្អូនទទួលបានជោគជ័យពិតប្រាកដនោះគឺ គ្រួសារ សាលារៀន និងសង្គម ដោយមុំទាំង៣នេះ មានតួនាទីយ៉ាងសំខាន់ក្នុងការជួយជ្រុមជ្រេងប្អូនក្នុងការសិក្សា ហើយបើគ្មានមុំទាំង៣នេះជម្រុញទេ នោះអនាគតរបស់កូនៗយើងមិនអាចទទួលបានជោគជ័យបានឡើយ។
ព័ត៌មានជាតិ ថ្មីៗ
ជាមួយគ្នានោះដែរ ឯកឧត្តមក៏បានជម្រុញដល់គ្រប់សាលារៀនទាំងអស់ក្នុងខេត្ត ទាំងរដ្ឋ និងឯកជន ត្រូវតាមដាន និងពិនិត្យឲ្យបានជាប្រចាំចំពោះការលក់ចំណីអាហារនៅក្នុងសាលារៀន ហើយក៏ស្នើសុំឱ្យលោកឳពុកអ្នកម្តាយជួយណែនាំកូនៗឱ្យចៀសវាងពីការបរិភោគនំកញ្ចប់ ប្រហិត ស្ករគ្រប់ប្រភេទ ភេសជ្ជៈប៉ូវកំលាំងផ្សេងៗ ដែលធ្វើឱ្យប៉ះពាល់ដល់សុខភាពពួកគាត់ ហើយចូលរួមលើកទឹកចិត្ត និងណែនាំឱ្យមកទទួលទាននូវចំណីអាហារណាដែលមិនប៉ះពាល់សុខភាពកូនៗ។
លោក ជា ហៀង នាយកប្រតិបត្តិ និងជាប្រធានក្រុមប្រឹក្សាភិបាលនៃសាលាអន្តរជាតិ យូ អេស អេ បានជម្រុញលើកទឹកចិត្តដល់លោកគ្រូអ្នកគ្រូទាំងអស់ ត្រូវខិតខំបំពេញការឲ្យប្រកបដោយស្មារតីទទួលខុសត្រូវខ្ពស់ ធ្វើឲ្យការសិក្សារបស់សិស្សទទួលបានលទ្ធផលល្អ តាមរយៈការផ្ដល់សេវាកម្មអប់រំប្រកបដោយទំនុកចិត្ត និងប្រសិទ្ធភាព ដើម្បីឲ្យកុមារគ្រប់គ្នាមានចំនេះដឹងខ្ពស់ អាចក្លាយជាថ្នាក់ដឹកនាំ និងទៅជាមនុស្សសកល អាចរស់នៅក្នុងភាពសុខដុមរមនា ប្រកបដោយឥរិយាបថ និងផ្នត់គំនិតថ្លៃថ្នូរផងដែរ។
បើតាមលោកស្រី កឿន សម្ភស្ស នាយិកាសាលាបឋមសិក្សា យូ អេស អេ បានឲ្យដឹងថា គិតមកទល់ពេលនេះ សាលាបានដំណើរការយៈពេលជាង ២៣ឆ្នាំមកហើយ ជាសាលាដែលមានការអប់រំប្រកបដោយគុណភាពខ្ពស់ស្របតាមស្តង់ដាជាតិ និងអន្តរជាតិ។ សម្រាប់ឆ្នាំសិក្សា ២០២២-២០២៣ កន្លងទៅនេះ សាលាមានសិស្សសរុបចំនួន ២.៧៧៩នាក់ ស្រី ១.៦៦៧នាក់ ក្នុងនោះសិស្សថ្នាក់ចំណេះដឹងទូទៅភាសាខ្មែរចំនួន ៤៦៩នាក់ ស្រី ២៥៨នាក់។ ដោយឡែកសម្រាប់សិស្សរៀនពូកែសាលាក៏បានផ្ដល់នូវអាហារូបករណ៍ ដោយសិស្សដែលជាប់ចំណាត់ថ្នាក់លេខ១ ប្រចាំឆមាស សាលាផ្ដល់ជូនអាហារជូនអាហារូបករណ៍ ៥០ភាគរយ, លេខ២ ទទួលបាន៣០ភាគរយ និងលេខ៣ ទទួលបាន ២០ភាគរយ៕
អត្ថបទ និងរូបភាព៖ លោក អ៊ុន ណារាជ្យ
