គម្រោងផ្លូវគ្រួសក្រហម ៣គីឡូម៉ែត្រ ក្នុងឃុំកន្ទួត ស្រុកស្វាយលើ ខេត្តសៀមរាប ដែលជាគម្រោងមូលនិធិឃុំ ឆ្នាំ២០២៣ ត្រូវបានប្រកាសបញ្ចប់ការដេញថ្លៃដោយជ័យ នៅថ្ងៃ២៩ ខែកញ្ញា ឆ្នាំ២០២៣ ដោយមានការចូលរួមពីអាជ្ញាធរស្រុក មន្រ្តីបច្ចេកទេសសាលាខេត្ត គណៈកម្មការលទ្ធកម្មឃុំ អ្នកសារព័ត៌មាន រួមនឹងតំណាងក្រុមហ៊ុនដេញថ្លៃផងដែរ។
បើតាមលោក ឈង់ ឈាង ប្រធានគណៈកម្មការលទ្ធកម្មឃុំកន្ទួត បានឲ្យដឹងថា ឃុំបានដាក់ដេញថ្លៃគម្រោងជួសជុលផ្លូវដីក្រាលក្រួសក្រហមប្រវែង ៣គីឡូម៉ែត្រ ទទឹង ៥ម៉ែត្រ កម្រាស់គ្រួសក្រហម០.១៥ ម៉ែត្រ និងសាងសង់លូ៧កន្លែង សាងសង់លូមូលភ្លោះមុខកាត់១ម៉ែត្រ ចំនួន២កន្លែង និងសាងស់លូមូលទោលមុខកាត់១ ម៉ែត្រ ចំនួន៥ កន្លែង និងដាក់ស្លាកគម្រោងចំនួន១ ក្នុងតម្លៃប៉ាន់ស្មាន ១៦៧.៧២៣.១៥៥ រៀល។លទ្ធផលបានទៅលើ ក្រុមហ៊ុន ស៊ិម វឌ្ឍនា ក្នុងតម្លៃ ១៦៥.៧០០.០០០រៀល។
លោក ឡុង ហំ អភិបាលរងស្រុកស្វាយលើ បានណែនាំដល់ម្ចាស់ក្រុមហ៊ុនម៉ៅការធ្វើយ៉ាងណាឲ្យការងារជួសជុលនេះសម្រេចបានទៅតាមការគ្រោងទុក និងមានគុណភាពល្អ ក្នុងនោះដែរគ្រប់ក្រុមហ៊ុនត្រូវមានការសហការគ្នាជាមួយអាជ្ញាធរ ក្នុងការអនុវត្តការងារនេះ ហើយអាជ្ញាធរមូលដ្ឋានត្រូវតាមដានជាប្រចាំទៅលើការងារជួសជុលផ្លូវក្នុងមូលដ្ឋានខ្លួន ដើម្បីឲ្យសាងសង់បានត្រឹមត្រូវស្របទៅតាមគំនូរប្លង់បច្ចេកទេស និងទាន់ពេលវេលា ហើយប្រសិនបើមានបញ្ហាផ្សេងៗ ត្រូវទាក់ទងទៅក្រុមការងារបច្ចេកទេសស្រុក ឬខេត្ត ដើម្បីដោះស្រាយឲ្យបានទាន់ពេលវេលា។
ក្រោយបញ្ចប់គម្រោងនៃការដេញថ្លៃ ក្រុមហ៊ុនដែលទទួលបានការម៉ៅការគម្រោងផ្លូវខាងលើ បានធ្វើការប្ដេជ្ញាចិត្តដោយសន្យាថា ធ្វើឲ្យបានត្រឹមត្រូវស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដូចមាន ចែងនៅក្នុងកិច្ចសន្យា ជាពិសេសសហការជាមួយអាជ្ញាធរមូលដ្ឋាន៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
