ដើម្បីធានាឲ្យបាននូវសុខសុវត្ថិភាព សណ្តាប់ធ្នាប់សាធារណ: និងកាត់បន្ថយគ្រោះថ្នាក់ចរាចរណ៍នៅតាមដងផ្លូវ អាជ្ញាធរស្រុកស្វាយលើបានជំរុញឲ្យអាជីវករអ្នកលក់ដូរជាប់ចិញ្ចើមផ្លូវ នៅភូមិស្វាយលើ ឃុំស្វាយលើ ស្រុកស្វាយលើ ខេត្តសៀមរាប ធ្វើការរុះរើតូប និងកាត់សំយ៉ាប ផ្ទាំងប៉ាយយីហោតូចធំ ដែលលយចូលមកដល់ផ្លូវសាធារណៈដោយខ្លួនឯង ចៀងវាងការខាតបង់ទ្រព្យសម្បត្តិ។
រសៀលថ្ងៃទី២៩ ខែមេសា ឆ្នាំ២០១៩ គណ:បញ្ជាការឯកភាពស្រុកស្វាយលើ ពាក់ព័ន្ធផ្លូវសាធារណ: បានធ្វើការប្រជុំជាមួយបងប្អូនអាជីវករលក់ដូរក្នុងផ្សារ និងលក់ដូរនៅតាមចិញ្ចើមផ្លូវ ដើម្បីធ្វើការណែនាំ និងជម្រាបអំពីផលប៉ះពាល់ដោយការយកដីចំណីផ្លូវ ឬដីសាធារណរបស់យកមកដល់ដូរប្រចាំថ្ងៃ។
មានប្រសាសន៍ទៅកាន់អាជីវករ លោក សាត ពៅ អភិបាលរងស្រុកស្វាយលើ បានបង្ហាញថា ចំពោះបញ្ហានេះ អាជ្ញាធរបាន ជូនដំណឹងដល់អាជីករនៅទីនេះជាច្រើនដងរួចមកហើយ ដូច្នេះវាមិនមែនជារឿងថ្មីទេ។ ការរៀបចំសណ្ដាប់ធ្នាប់ផ្លូវសាធារណ:របស់រដ្ឋ គឺដើម្បីចៀសវាងនូវការកក់ស្ទះចរាចរណ៏ និងកាត់បន្ថយគ្រោះថ្នាក់ចរារចណ៍ ដែលអាចឈានទៅដល់បាត់បង់អាយុជីវិត។
តាមរយៈការកំណត់ របស់អាជ្ញាធរ ប្រជាពលរដ្ឋនិងអាជីវករនៅទីនេះ ត្រូវទុកប្រវែងផ្លូវម្ខាងៗ ប្រវែង១៥ម៉ែត្រ (សរុបទំហំផ្លូវ៣០ម៉ែត្រ) ដោយគិតពីចំណុចអ័ក្សកណ្តាលទ្រូងផ្លូវ ប៉ុន្ដែប្រជាពលរដ្ឋបានស្នើសុំអាជ្ញាធរទុកប្រវែងផ្លូវម្ខាងៗត្រឹមតែ ១០ម៉ែត្រ ដោយសារមានផ្ទះ សំណង់នានាភាគច្រើនសាងសង់រួចរាល់ជាយូរមកហើយ បើមានការវាយកំទេចវានឹងធ្វើឲ្យប៉ះពាល់ដល់ជីវភាពរបស់ពួកគាត់។ ទន្ទឹមនឹងនោះ ប្រជាពលរដ្ឋនិងអាជីវករនៅទីនេះ បានសន្យាថា ក្នុងរយ:ពេល៥ថ្ងៃ ពួកគាត់នឹងរុះរើតូប ដាក់តាំងលក់នៅតាមចិញ្ចើមផ្លូវ និងកាត់សំយ៉ាប ផ្ទាំងប៉ាយយីហោតូចធំ ដែលលយចូលមកដល់ផ្លូវឲ្យអស់ ។
ជាការឆ្លើយតប អាជ្ញាធរស្រុកស្វាយលើ បានឯកភាពទៅនឹងសំណើប្រជាពលរដ្ឋនាពេលនេះ ក្នុងនោះលោក អភិបាលរងស្រុកស្វាយលើ បានណែនាំដល់អាជីវករថា នៅពេលបងប្អូនអាជីវករ បានរុះរើតូបហើយ ពុំមានកន្លែងលក់ដូរនោះ បងប្អូនអាចទៅលក់ដូរនៅផ្សារថ្មីបាន ដែលនៅទីនោះមានផាសុខភាព អនាម័យ និងមានសណ្តាប់ធ្នាប់ល្អ ងាយស្រួលក្នុងការលក់ដូរ ហើយក៏ជាឱកាសល្អសម្រាប់បងប្អូនអជីវករ ដែលផ្សារថ្មីនេះ មិនយកថ្លៃកន្លែងលក់ដូរក្នុងរយ:ពេល៣ឆ្នាំ បន្ទាប់មកក្រោយពី៣ឆ្នាំទើបគិតថ្លៃតូបមួយ៤០ដុល្លា បើយើងគិតបង់ប្រចាំថ្ងៃនោះតូបមួយបង់ត្រឹមតែ៥០០០រៀលប៉ុណ្ណោះទេ។
អ្នកស្រី សូរ៉ានី អាជីវករលក់ដូរជាប់ចិញ្ចើមផ្លូវបាននិយាយថា លោកស្រីឯកភាព ចំពោះចំណាត់ការរបស់អាជ្ញាធរស្រុក សព្វថ្ងៃនៅក្នុងផ្សារចាស់ស្រុកស្វាយដែលជាផ្សារដីរបស់រដ្ឋប្រសិនបើរដ្ឋត្រូវការយកដីទៅសាងសង់មន្ទីរពេទ្យស្រុកពេលណា ពួកខ្ញុំនឹងរើចេញពេលនោះដោយគ្មានលក្ខណឡើយ។
អ្នកស្រី គឹម ណាវី អាជីវករមានតូបលក់ដូរជាប់ចិញ្ចើមផ្លូវដែរនោះបានលើកឡើងថា អ្នកស្រីទទួលស្គាល់និងឯកភាពចំណាត់ការរបស់អាជ្ញាធរស្រុក ហើយអ្នកស្រីស្ម័គ្រចិត្ត នឹងរុះរើតូបដោយខ្លួនឯង គិតចាប់ពីថ្ងៃប្រជុំរហូតដល់ថ្ងៃទី៥ ខែឧសភា ឆ្នាំ២០១៩។
អត្ថបទ និង រូបភាព៖ លោក ស៊ាន សុផាត
កែសម្រួលអត្ថបទ ៖ លោក សេង ផល្លី
