តាមរបាយការណ៍របស់នាយកដ្ឋានអភិវឌ្ឍន៍ទេសចរណ៍អង្គរ នៃអាជ្ញាធរជាតិអប្សរា បានបង្ហាញថា ក្នុងរយៈពេលមួយត្រីមាស ទី១ឆ្នាំ២០១៩នេះ ក្រុមការងារជួយសង្គ្រោះភ្ញៀវទេសចរដែលរងរបួសដោយរអិលឬជំពប់ជើងដួល , គ្រិច ,ថ្លោះដៃជើង , ខ្យល់គរ , វិលមុខ , ចុកពោះ , សត្វស្វាខាំ និងពុលអាហារជាដើម បានចំនួន១១៣ករណី ខណៈដែល បញ្ហាទាំងនេះ ត្រូវបានភ្នាក់ងារទេសចរណ៍ដែលមានជំនាញសង្គ្រោះបឋម និងមានបរិក្ខារ សង្គ្រោះបឋមនៅជាប់ខ្លួន បានជួយសង្គ្រោះបឋមទាន់ពេលវេលានៅកន្លែងកើតហេតុក្នុងករណីស្រាលៗ និងសហការជាមួយនគរបាលទេសចរណ៍ និងនគរបាលការពារបេតិកភណ្ឌ បញ្ជូនទៅមន្ទីរពេទ្យក្នុងរកណីរបួសធ្ងន់ធ្ងរ ។
ជាមួយគ្នានេះដែរ ក្រុមភ្នាក់ងារទេសចរណ៍ ក៏បានរើសរបស់របរភ្ញៀវដែលភ្លេច ឬជ្រុះនៅតាមប្រាសាទ បានចំនួន៩៣ករណី ដោយក្នុងនោះ សម្ភារចំនួន៨៥ករណីត្រូវបានរកឃើញ រួមមាន៖ ទូរសព្ទដៃ , អាយផេត , កាបូបស្ពាយ , កាបូបយួរដៃ , កាបូប លុយ , កាតវីសារ និងម៉ាស៊ីនថតជាដើម ហើយបានរកឃើញនិងប្រគល់ជូនម្ចាស់ដើមវិញ។
ដោយឡែកក្រៅពីសកម្មភាពសង្គ្រោះ និងការរើសប្រគល់វត្ថុដែលភ្ញៀវបាត់ឬភ្លេចនោះ ក្រុមភ្នាក់ងារទេសចរណ៍ក៏បានហាមឃាត់ភ្ញៀវដែលប្រព្រឹត្តមិនសមរម្យបានចំនួន១៦៥ករណី រួមមាន៖ ការបង្ហោះត្រូន (Drone) , ការបន្ទោបង់ក្នុងបរិវេណប្រាសាទ , ករណីជនបរទេសថតរូបអាពាហ៍ពិពាហ៍ដោយគ្មានការអនុញ្ញាត , ការថតរូបបញ្ចេញកាយវិការមិនសមរម្យ (ថតបង្ហាញម៉ូត ថតរូបភាពមិនសមរម្យ) , ស្លៀកពាក់មិនសមរម្យ , សម្តែង សៀក នៅក្នុងប្រាសាទ , រៀបចំពិធីទទួលទានអាហារនៅក្នុងប្រាសាទ , ការប្រើប្រាស់ម៉ាស៊ីនថតខ្នាតធំ , ការធ្វើពិធីសាសនាដោយគ្មានការអនុញ្ញាត , ការថតរូបផ្សព្វផ្សាយពាណិជ្ជកម្មនិង គូរគំនូរ លក្ខណៈទ្រង់ទ្រាយធំដោយមិនមានការអនុញ្ញាត ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
