គម្រោងផ្លូវបេតុងអាមេ ៤៥០ម៉ែត្រ ស្ថិតចន្លោះភូមិបុស្ស និងភូមិរំដេញ ឃុំខ្នារពោធិ៍ ស្រុកសូទ្រនិគម ខេត្តសៀមរាប ដែលជាគម្រោងមូលនិធិឃុំ ឆ្នាំ២០២៣ ត្រូវបានប្រកាសបញ្ចប់ការដេញថ្លៃដោយជ័យ នៅថ្ងៃ០២ ខែតុលា ឆ្នាំ២០២៣ ដោយមានការចូលរួមពីមន្រ្តីបច្ចេកទេសសាលាខេត្ត មន្រ្តីបច្ចេកទេសស្រុក គណៈកម្មការលទ្ធកម្មឃុំ អ្នកសារព័ត៌មាន រួមនឹងក្រុមហ៊ុនដេញថ្លៃចំនួន៨ផងដែរ។
បើតាមលោក គឿន ឈឹង ប្រធានគណៈកម្មការលទ្ធកម្មឃុំខ្នារពោធិ៍ បានឲ្យដឹងថា ឃុំបានដាក់ដេញថ្លៃគម្រោងសាងសង់ផ្លូវបេតុងអាមេ ប្រវែង៤៥០ម៉ែត្រ ទទឹង៥ ម៉ែត្រ កំរាស់បេតុង០.១៥ម៉ែត្រ ប្រើប្រាស់ដែកទំហំ ៨មីលីម៉ែត្រ. កំលាតនៃការចងដែក០.២ម៉ែត្រ និងដាក់ស្លាកសញ្ញាចរាចរណ៍ចំនួន២ ស្លាកគម្រោងចំនួន១ និង និងដាក់លូរបាំងការពារផ្លូវ ក្នុងតំលៃប៉ាន់ស្មាន២៦៣.៤៩៧.៤១៥ រៀល។ លទ្ធផលបានទៅលើ ក្រុមហ៊ុន យ៉ែត សុខងីន ក្នុងតម្លៃ ១៤៤.០០០.០០០រៀល។
ប្រធានគណៈកម្មការលទ្ធកម្មបន្ថែមថា គម្រោងផ្លូវដែលបានដាក់ដេញថ្លៃរកក្រុមហ៊ុនសាងសង់នេះជាជំហានដំបូងទៅ ធ្វើតាមលទ្ធភាពរបស់ឃុំ ឆ្នាំក្រោយនិងធ្វើបន្តទៀត ដោយផ្លូវមួយខ្សែនេះមានប្រវែងសរុប ១៥៥០ម៉ែត្រ ឆ្នាំនេះធ្វើបានត្រឹមតែជាង ៤០០ម៉ែត្រ។ លោកបញ្ជាក់ថា ផ្លូវនេះជាផ្លូអទិភាព ព្រោះថាមានប្រជាពលរដ្ឋ បីភូមិជិះឆ្លងកាត់ មករកមណ្ឌលសុខភាពខ្នារពោធិ៍ ពិសេសសម្រួលដល់ការធ្វើដំណើរទៅសាលាអនុវិទ្យាល័យខ្នារពោធិ៍ របស់សិក្សានុសិស្ស។
លោក ប៊ិន រដ្ឋ មន្រ្តីបច្ចេកទេសខេត្ត ប្រចាំស្រុកសូទ្រនិគម បានណែនាំដល់ម្ចាស់ក្រុមហ៊ុនម៉ៅកា ត្រូវអនុវត្តការងារជួសជុលឲ្យស្របទៅតាមស្តង់ដា និងបទដ្ឋានបច្ចេកទេស ទោះស្ថិតនៅក្នុងតម្លៃប៉ុន្មានក៏ដោយ។ ជាមួយនោះក្រុមហ៊ុន និងអាជ្ញាធរឃុំត្រូវមានទំនាក់ទំនង ចុះពិនិត្យទីតាំងដើម្បីកំណត់ពេលវេលាសម្រាប់សាងសង់ និងចុះពិនិត្យតាមដានជាប្រចាំទៅលើការងារនេះ ហើយប្រសិនបើមានបញ្ហាផ្សេងៗ ត្រូវទាក់ទងបន្ទាន់ទៅក្រុមការងារបច្ចេកទេសស្រុក ឬខេត្ត ដើម្បីដោះស្រាយឲ្យបានទាន់ពេលវេលា។
ក្រោយបញ្ចប់គម្រោងនៃការដេញថ្លៃ ក្រុមហ៊ុនដែលទទួលបានការម៉ៅការគម្រោងផ្លូវខាងលើ បានធ្វើការប្ដេជ្ញាចិត្តដោយសន្យាថា ធ្វើឲ្យបានត្រឹមត្រូវស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដូចមាន ចែងនៅក្នុងកិច្ចសន្យា ជាពិសេសសហការជាមួយអាជ្ញាធរមូលដ្ឋាន៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
