ថ្ងៃទី០៣ ខែតុលា ឆ្នាំ២០២៣នេះ មន្ទីរសាធារណការ និងដឹកជញ្ជូនខេត្តសៀមរាប បានចេញសេចក្ដីជូនដំណឹងមួយ ស្ដីពីការផ្អាកជាបណ្តោះអាសន្ននូវការធ្វើរបស់ចរាចរណ៍រថយន្តដឹកទំនិញធុនធ្ងន់គ្រប់ប្រភេទ លើកំណាត់ផ្លូវមួយចំនួន ក្នុងភូមិសាស្ត្រខេត្តសៀមរាប ដើម្បីបញ្ចៀសគ្រោះថ្នាក់ជាយថាហេតុ និងទប់ស្កាត់ការខូចខាតហេដ្ឋារចនាសម្ព័ន្ធផ្លូវថ្នល់-ស្ពាន ខណៈកម្រិតទឹកភ្លៀងបានបន្តធ្លាក់ពីកម្រិតមធ្យមទៅច្រើន ដែលបង្កជាជំនន់ទឹកភ្លៀង។
ចំពោះផ្លូវដែលសម្រេចផ្អាកចរាចរណ៍ជាបណ្ដោះអាសន្ន សម្រាប់រថយន្តធន់ធ្ងន់រួមមាន កំណាត់ផ្លូវជាតិលេខ ៦៤ ទិសដៅពីឃុំដំដែក ខេត្តសៀមរាប ឆ្ពោះទៅអូរប្រាំព្យាម ព្រំប្រទល់ព្រះវិហារ និង ផ្លូវជាតិលេខ៦៧ ទិសដៅពីប្រាសាទបាគង ខេត្តសៀមរាប ទៅកាន់ស្រុកអន្លង់វែង ខេត្តឧត្តរមានជ័យ។ ដោយឡែក សម្រាប់ផ្លូវក្នុងខេត្តរួមមាន ផ្លូវខេត្តលេខ ២៦៥E ពីឃុំរលួស ទៅឃុំកំពង់ភ្លុក នៃស្រុកប្រាសាទបាគង ផ្លូវខេត្តលេខ២៦៦៨ ចំណុចរង្វង់មូលស្វាយធំ ស្រុកប្រាសាទបាគង ទៅ ស្រុកបន្ទាយស្រី ផ្លូវខេត្តលេខ២៦៦F ពីស្រុកពួក ទៅស្រុកអង្គរជុំ ផ្លូវខេត្តលេខ២៦៧៣ ពីស្រុកអង្គរជុំ ទៅស្រុកវ៉ាវិន ផ្លូវខេត្តលេខ២៦៧៦ ពីឃុំទួលគ្រួស ស្រុកបន្ទាយស្រី ទៅឃុំតាសៀម ស្រុកស្វាយលើ ផ្លូវខេត្ត លេខ២៦៤៥ ពីឃុំស្វាយលើ ទៅឃុំស្រែណូយ នៃស្រុកស្វាយលើ និង ផ្លូវខេត្តលេខ៦២-៣ ពីឃុំបេងមាលា ស្រុកស្វាយលើ ទៅ ឃុំខ្វាវ ស្រុកជីក្រែង។
ចំពោះការបើកឱ្យធ្វើចរាចរណ៍សម្រាប់រថយន្តធន់ធ្ងន់សារជាថ្មី លើកកំណាត់ផ្លូវទាំង៩ខ្សែខាងលើ អាស្រ័យដោយសារមានការជូនដំណឹងជាថ្មី ពីមន្ទីរសាធារណការ និងដឹកជញ្ជូនខេត្តសៀមរាប។
អត្ថបទ និងរូបភាព៖ លោក ជា ស្រស់
កែសម្រួល៖ លោក សេង ផល្លី
